ފްރެންޗް ލީގުގެ ޗެމްޕިއަން ޕީއެސްޖީއަށް ކުޅެމުން އަންނަ ސްޕެއިންގެ ތަޖުރިބާކާރު ޑިފެންޑަރ ސާޖިއޯ ރާމޯސް، މި ސީޒަން ނިމުމުން ކުލަބު ދޫކޮށްދާނެކަން ހާމަކޮށްފިއެވެ.
ރާމޯސް އަކީ މިސީޒަނަށް ފަހު ޕީއެސްޖީ ދޫކޮށްދާނެކަން ހާމަކުރި މިފެންވަރުގެ ދެވަނަ ކުޅުންތެރިޔާއެވެ.
މީގެކުރިން ޕީއެސްޖީއިންވަނީ އާޖެންޓީނާގެ ލިއޮނެލް މެސީވެސް ކްލަބް ދޫކޮށް ދާނެކަން ހާމަކޮށްފައެވެ. ރާމޯސް ޓްވިޓަރގައި ހާމަކުރިގޮތުގައި މިރޭގެ މެޗަކީ ވަރަށް ހާއްސަ މެޗެއް ކަމަށާއި މިމެޗަކީ އޭނާ ޕީއެސްޖީއަށް އަލްވަދާއު ކިޔާ މެޗް ކަމަށެވެ.
އުމުރުން 37 އަހަރުގެ ރާމޯސް 2021 ވަނަ އަހަރު ރެއާލް މެޑްރިޑުން ޕީއެސްޖީއަށް ބަދަލުވުމަށްފަހު މިހާތަނަށްވަނީ 57 މެޗް ކުޅެދީފައެވެ. ޕީއެސްޖީގެ ރައީސް ނާސެރު އަލް ހެލައިފީ ހާމަކުރިގޮތުގައި ރާމޯސް އަކީ ތަޖްރިބާކާުރު މޮޅު ކުޅުންތެރިއެއް ކަމަށާއި ޕީއެސްޖީއަށް އޭނާ ކުޅުން ވެގެން ގޮސްފައިވަނީ އެކްލަބަށް ލިބިގެންދިޔަ ޝަރަފަކަށެވެ.
ސްޕެއިން ޤައުމީ ޓީމާއެކު ފީފާ ވާރލްޑް ކަޕާއި ދެ ޔޫރޯ ކާމިޔާބުކޮށްފައިވާ ރާމޯސްއަކީ ސްޕެއިން ޤައުމީ ޓީމަށް މިހާތަނަށް އެންމެ ގިނަ މެޗް ކުޅެދީފައިވާ ކުޅުންތެރިޔާއެވެ. ރާމޯސް ޕީއެސްޖީގައި ހޭދަކުރި ފުރަތަމަ ސީޒަންގެ ބޮޑުބައި ހޭދަކުރަން ޖެހުނީ އަނިޔާގެ ސަބަބުން ކުޅުމާއި ދުރުގައެވެ. އަދި މިސީޒަންގައި އޭނާގެ ފަރާތުން ރަނގަޅު ކުޅުމެއް ފެނިގެންދިޔަ ނަމަވެސް ޕީއެސްޖީއިން އެންމެ ބޮޑަށް ބޭނުންވެފައިވާ ޗެމްޕިއަންސް ލީގުގެ ތަށި ހޯދާދިނުމުގައި ރާމޯސްއަށް މާބޮޑު އެހީތެރިކަމެއް ފޯރުކޮށްދެވޭގޮތެއްނުވިއެވެ.