ފްރެންޗް އޯޕަން ޓެނިސް މުބާރާތުގެ ތިންވަނަ ބުރުން ދުނިޔޭގައި އެއްްވަނައަށް ރޭންކް ކުރެވިފައިވާ އަދި މިމުބާރާތުގައި އެއްވަނައަށް ސީޑް ކުރެވިފައިވާ އަންހެން ކުޅުންތެރިޔާ ޕޯލަންޑްގެ އީގާ ސްވިއަޓެކް ޖާގަ ހޯދައިފިއެވެ.
މިމުބާރާތުގެ އެންމެ ފަހުގެ ޗެމްޕިއަން ސްވިއަޓެކް މިމުބާރާތުގެ ތިންވަނަ ބުރުން ޖާގަހޯދީ ދެވަނަ ބުރުގައި އެމެރިކާގެ ކްލައަރ ލިއު އާއި ބައްދަލުކުރިމެޗް ސީދާ ދެސެޓުން ކާމިޔާބުކޮށްގެންނެވެ.
މިމެޗްގެ ދެސެޓް ސްވިއަޓެކް ކާމިޔާބުކޮށްފައިވަނީ ހައެއް ހަތަރެއް އަދި ހައެއް ސުމަކުންނެވެ. މިމުބާރާތުގެ ތިންވަނަ ބުރުގައި ސުވިއަޓެކް ބައްދަލުކުރުމަށް ހަމަޖެހިފައިވަނީ ޗައިނާގެ ވޭންގް ޒީޔޫއާއެވެ. މިމުބާރާތުގެ ތިންވަނަ ބުރުން ވަނީ ކަޒަކިސްތާންގެ އެލޭނާ ރީބަކީނާވެސް ޖާގަ ހޯދާފައެވެ. ތިންވަނަ ބުރުން ރީބަކީނާ ޖާގަ ހޯދީ ދެވަނަ ބުރުގައި ޗެކް ރިޕަބްލިކްގެ ލިންޑާ ނޮސްކޯވާ އާއި ބައްދަލުކުރިމެޗް ހައެއް ތިނެއް އަދި ހައެއް ތިނަކުން ކާމިޔާބުކޮށްގެންނެވެ. މިފަހަރުގެ މުބާރާތުގައި ހަތަރުވަނައަށް ސީޑް ކުރެވިފައިވާ ރީބަކީނާ ތިންވަނަ ބުރުގައި ބައްދަލުކުރުމަށް ހަމަޖެހިފައިވަނީ ސްޕެއިންގެ ސާރާ ސޮރީބޭސް ޓޯމޯ އާއެވެ.
މިދެކުޅުންތެރިންގެ އިތުރުން ހަވަނައަށް ސީޑް ކުރެވިފައިވާ އެމެރިކާގެ ކޯކޯ ގައުފް އާއި ހަތްވަނައަށް ސީޑް ކުރެވިފައިވާ ޓިއުނީޝިއާގެ އޯންސް ޖެބެއަރވެސް ވަނީ ތިންވަނަ ބުރުން ޖާގަހޯދާފައެވެ.
މިގޮތުން ގައުފް ތިންވަނަ ބުރުން ޖާގަހޯދީ އޮސްޓްރިއާގެ ޔޫލިއާ ގްރެބަރ އާއި ބައްދަލުކުރިމެޗް ހައެއް ދެއެއް އަދި ހައެއް ތިނަކުން ކާމިޔާބުކޮށްގެންނެވެ. އޭނާ ތިންވަނަ ބުރުގައި ބައްދަލުކުރާނީ ރަޝިއާގެ އުމުރުން 16 އަހަރުގެ މީރާ އަންޑްރީވާ އާއެވެ. އަދި ޖެބެއަރ ތިންވަނަ ބުރުން ޖާގަހޯދީ ފަރަންސޭސިވިލާތުގެ އޯސިއާން ޑޮޑިން އާއި ބައްދަލުކުރިމެޗް ހައެއް ދެއެއް އަދި ހައެއް ތިނަކުން ކާމިޔާބު ކޮށްގެންނެވެ. އޭނާ ތިންވަނަ ބުރުގައި ބައްދަލުކުރުމަށް ހަމަޖެހިފައިވަނީ ސަރބިއާގެ އޮލްގާ ޑަނިލޮވިޗް އާއެވެ.