އެމެރިކާގެ މޭޖަރ ލީގު ސޮކަރގެ ޓީމެއްކަމުގައިވާ އިންޓަރ މައޭމީގެ ކޯޗް ފިލް ނެވީލް މަގާމުން ވަކިކޮށްފިއެވެ.
އިންޓަރ މައޭމީއިން އެޓީމްެ ކޯޗް ވަކިކުރީ އީސްޓަން ކޮންފަރެންސްގައި 15 މެޗް ސީޒަންގައި ކުޅެވުނުއިރު ތާވަލްގެ އެންމެ ފުލުގައިއޮތުމުންނެވެ.
މިދިޔަ ބުދަ ދުވަހު ނިއުޔޯކް ރެޑް ބުލްސް އަތުން އެއްލަނޑު ސުންލަނޑުން ބަލިވި މެޗާއެކު އެޓީމުން މިވަނީ އެންމެ ފަހުން ކުޅުނު 13 މެޗްގެ ތެރެއިން 10 މެޗުން ބަލިވެފައެވެ.
އުމުރުން 46 އަހަރުގެ ނެވީލް އިންޓަރ މައޭމީގެ ކޯޗް ކަމުގެ މަގާމަށް އައްޔަން ކޮށްފައިވަނީ 2021 ވަނަ އަހަރުއެވެ. އަދި މިދިޔަ ސީޒަންގައި އެޓީމް ވަނީ އެމްއެލްއެސް ކަޕް ޕްލޭ އޮފްސްއިން ޖާގަހޯދާފައެވެ. ނެވީލް އަކީ މިކްލަބްގެ އެއް ވެރިޔާ ކަމުގައިވާ އިންގްލަންޑްގެ ކުރީގެ މަޝްހޫރު ކުޅުންތެރިޔާ ޑެވިޑް ބެކަމްއާއެކު މެންޗެސްޓަރ ޔުނައިޓެޑަށް ގިނަ ދުވަހު ކުޅުމުގެ އިތުރުން ގާތް އެކުވެރިއެކެވެ.
ބެކަމް ބުނިގޮތުގައި މިކުޅިވަރުގައި ބައެއް ފަހަރު އުނދަގޫ ނިންމުންތައްވެސް ނިންމަން ޖެހޭކަމަށެވެ. މިގޮތުން މިއި އެފަދަ ނިންމުމެއްކަމަށާއި ނަމަވެސް މިއީ ޓީމަށް ބަދަލެއް ގެއްނަން އެންމެ ރަނގަޅު ވަގުތު ކަމަށް އޭނާ ބުންޏެވެ. އަދި ނެވީލް އެޓީމަށް ކޮށްދިން ހިދުމަތަށް ބެކަމް ވަނީ ޝުކުރު އަދާކޮށްފައެވެ.
ނެވީލްގެ އިތުރުން އެސިސްޓަންޓް ކޯޗް ޖޭސަން ކްރެއިސްވެސް ވަނީ އޭނާގެ މަގާމް ދޫކޮށްލާފައެވެ. އެހެންކަމުން ހޮނިހިރު ދުވަހު ޑީސީ ޔުނައިޓެޑާއި ދެކޮޅަށް ނިކުންނަ މެޗްގައި އިންޓަރ މައޭމީގެ ކޯޗްކަން ވަގުތީގޮތުން ކުރާނީ އެސިސްޓަންޓް ކޯޗް ހާވިއޭ މޮރާލޭސްއެވެ.