ސާފް ޗެމްޕިއަންޝިޕް ފުޓްބޯޅަ މުބާރާތުގައި ރާއްޖޭގެ ޤައުމީ ފުޓްބޯޅަ ޓީމުން މެޑެލް ހޯދައި، ރާއްޖޭގައި ފަނޑުވެފައިވާ ފުޓްބޯޅަ ފޯރި އަލުން ގެންނަން މަސައްކަތްކޮށްދެއްވުމަށް ކުޅިވަރާ ބެހޭ ވަޒީރު އަޙްމަދު މަޚްލޫފް އެދިވަޑައިގެންފިއެވެ.
އިޓަލީގެ ފްރެންޗެސްކޯ މޮރިއޭރޯގެ ކޯޗުކަމުގެ ދަށުން ރާއްޖެއިން ވަނީ 30 ކުޅުންތެރިންގެ ސްކޮޑަކާއެކު ޤައުމީ ޓީމުގެ ފަރިތަކުރުންތައް ފަށާފައެވެ. މި ޓީމާއެކު ދާދިފަހުން ވަނީ މަހިބަދޫގެ "ޕެލޭ ސްޓޭޑިއަމް" ހުޅުވުމުގެ ގޮތުން އެކުވެރިިކަމުގެ މެޗެއްވެސް ކުޅެފައެވެ.
މި ކުޅުންތެރިންނާއެކު ޤައުމީ ޓީމުން މިހާރު މަސައްކަތްކުރަނީ ޖޫން މަހުގެ ކުރީކޮޅު ޖަޕާނުގައި ކޭމްޕުކުރުމަށެވެ. އަދި އެ ކޭމްޕަށްފަހު ބެންގަލޫރުގައި ޖޫން 21 ވަނަ ދުވަހު ބެންގަލޫރުގައި ބާއްވާ މުބާރާތުގައި ވާދަކުރުމަށް ޓީމު އިންޑިއާއަށް ދާނީ ޖަޕާނު މަގުންނެވެ.
ޤައުމީ ޓީމުތަކަށް ހިތްވަރުދިނުމުގެ ގޮތުން ބޭއްވި ހަފުލާގައި ވާހަކަފުޅުދައްކަވަމުން މަހްލޫފް ވިދާޅުވީ ފުޓުބޯޅައިގެ ފޯރި ބަދަލުކޮށް ކުރިން އޮތް ފުޓުބޯޅައިގެ ޖޯޝު ގެނައުމަށް މުޅި ޓީމުންވެސް ހިތްވަރެއް ލާންޖެހޭ ކަމަށާއި ޖަޕާނަށް ކުރާ ދަތުރަށްފަހު މުބާރާތަށް ގޮސްދިވެހިރާއްޖޭގެ ރައްޔިތުންނަށް މެޑަލްއެއް ގެނެސްދިނުމަކީ ވަރަށް ބޮޑު އެދުމެއް ކަމަށް މަހްލޫފް ވިދާޅުވިއެވެ.
މި ފަހަރުގެ މުބާރާތް ކުރިއަށްދާނީ އިންޑިއާގެ ބެންގަލޫރުގައި ޖޫން މަހުގެ 21 އިން ޖުލައި މަހުގެ 4 ގެ ނިޔަލަށެވެ. މި ފަހަރުގެ މުބާރާތުގެ ސާފް ސަރަހައްދުން ކުޅެވޭ ހަ ޤައުމުގެ އިތުރުން، ސަރަހައްދުން ބޭރުން ދެ ގައުމަކަށް ދައުވަތު ދީގެން، އަށް ޓީމުގެ މެދުގައި މުބާރާތް ބާއްވަން ވަނީ ނިންމާފައެވެ. ސަރަހައްދުން ބޭރުން ވާދަކުރާ ދެ ޤައުމަކީ ލުބުނާން އާއި ކުވެއިތެވެ.
މި ފަހަރުގެ ސާފް ޗެމްޕިއަންޝިޕުގެ ފޯމެޓް ރޭވިފައިވާ ގޮތުން މުބާރާތް ކުރިއަށްދާނީ ދެ ގްރޫޕަކަށް ބަހާލައިގެންނެވެ. ކޮންމެ ގްރޫޕެއްގައި ހަތަރު ޓީމު ހިމެނޭއިރު، ގްރޫޕް އޭގައި ހިމެނެނީ އެންމެ ފަހުގެ ޗެމްޕިއަން އިންޑިއާ އާއި، ޕާކިސްތާނާއި، ކުވެއިތުގެ އިތުރުން ނޭޕާލެވެ. އަދި ރާއްޖެ އާއެކު ގްރޫޕް ބީގައި ހިމެނެނީ ލުބުނާނާއި، ބޫޓާން އަދި ބަންގްލަދޭޝްއެވެ.