އޯގަސްޓް މަހުގެ ފަސްވަނަ ދުވަހު ޗެލްސީގެ ސްޓެމްފަޑް ބްރިޖުގައި ކުޅުމަށް ހަމަޖެހިފައިވާ ގޭމް ފޯ ޔޫކްރެއިން ޗެރިޓީ މެޗުގައި ވާދަކުރާ ދެ ޓީމުގެ ކެޕްޓަނުންގެ ގޮތުގައި ޔޫކްރެއިނުގެ ކުރީގެ ތަރި އަންދްރޭ ޝެވްޗެންކޯ އާއި ޤައުމީ ޓީމުގެ މިހާރުގެ ކެޕްޓަން އޮލެގްޒެންޑާ ޒިންޗެންކޯ ހަމަޖައްސައިފިއެވެ.
މިމެޗަކީ ޔޫކްރެއިން އާއި ރަޝިއާގެ މެދުގައި ހިނގަމުންދާ ހަނގުރާމައިގާ ހަލާކުވެފައިވާ ޔޫކްރެެއިންގެ ސްކޫލެއް އަލުން ހެދުމަށްޓަކައި ފައިސާ ހޯދުމަށް ކުޅެވޭ މެޗެކެވެ. މިމެޗްގެ ވާހަކަވަނީ ރޭގެ ވަގުތެއްގައި ޔޫކްރެއިންގެ ރައީސް ވޮލޮޑިމީރު ޒެލެންސްކީ ހާމަކުރައްވާފައެވެ. މިގޮތުން އޭނާ ހާމަކުރެއްވިގޮތުގައި މިމެޗްގައި ޔޫކްރެއިންގެ ފާހަގަ ކޮށްލެވޭ ގިނަ ކުޅުންތެރިންތަކެއް ފެނިގެންދާނެކަމަށެވެ.
ޔޫކްރެއިންގައި އުފެދުނު ކަމަށް ބުނެވޭ އެންމެ މޮޅު ކުޅުންތެރިންގެ ތެރޭގައި ހިމެނޭ ޝެވްޗެންކޯ އަކީ ޔޫކްރެއިން ޤައުމީ ޓީމަށް އެންމެ ގިނަ ލަނޑު ޖަހާދީފައިވާ ކުޅުންތެރިޔާއެވެ. އަދި އޭނާވަނީ ޤައުމީ ޓީމަށް ފަސް އަހަރު ވަންދެން ކޯޗްކަންވެސް ކޮށްދީފައެވެ.
މިމެޗް ކުޅުމަށް ހަމަޖެހިފައިވަނީ 2023-2024 ވަނަ އަހަރުގެ ސީޒަން ފެށުމުގެ ކުރީ ހަފްތާގައެވެ. މިއަންނަ ހޮނިހިރު ދުވަހު މެންޗެސްޓަރ ސިޓީ އާއި މެންޗެސްޓަރ ޔުނައިޓެޑް ބައްދަލުކުރާ މެޗް ސިޓީ ކާމިޔާބުކޮށްފި ކަމަށްވާނަމަ ސީޒަން ހުޅުވަން ކުޅޭ ކޮމިއުނިޓީ ޝީލްޑް މެޗްގައި ޒިންޗެންކޯ އެޓީމަކަށް ކުޅޭ އާސެނަލް ވާދަކުރާނެއެވެ.
ޒިންޗެންކޯ ހާމަކުރިގޮތުގައި މިމެޗްގައި އާސެނަލް އާއި ޗެލްސީއަށް ނިސްބަތްވާ އެހާރާއި މިހާރު ގިނަ ކުޅުންތެރިންތަކެއް ފެނިގެންދާނެކަމަށް ގަބޫލް ކުރާ ކަމަށެވެ.