ސޫދާންގެ އަސްކަރިއްޔާއާއި ރެޕިޑް ސަޕޯޓް ފޯސަސް (އާރް.އެސް.އެފް)ގެ ފައުޖުތަކާ ދެމެދު ފަށާފައިވާ ހަމަނުޖެހުންތަކާ ގުޅިގެން އެ ޤައުމުގެ މިލިޔަނެއްހާ މީހުން އަމިއްލަ ވަޒަނާއި ގެދޮރު ދޫކޮށް އެހެން ޤައުމުތަކަށް ހިޖުރަކުރަން ޖެހޭނެ ކަމަށް ބެލެވޭ ކަމުގައި އ.ދއިން ބުނެފިއެވެ. އ.ދގެ ރެފިއުޖީންނާ ބެހޭ އިދާރާ (ޔޫ.އެން.އެޗް.ސީ.އާރް) އިން ބުނީ މި އަހަރުގެ އޮކްޓޫބަރު މަހުގެ ކުރިން ސޫދާނުގެ މިލިޔަނެއްހާ ރެފިއުޖީން އަވައްޓެރި ޤައުމުތަކަށް ހިޖުރަކުރާނެ ކަމަށް ބެލެވޭ ކަމުގައެވެ.
ސޫދާންގެ އަސްކަރިއްޔާގެ އިސްވެރިޔާ ޖެނެރަލް ޢަބްދުލް ފައްތާޙް އަލް-ބުރުހާނާއި އާރް.އެސް.އެފްގެ އިސްވެރިޔާ ޖެނެރަލް މުޙައްމަދު ޙަމްދާން ދަގަލޯގެ ފައުޖުތަކާ ދެމެދު ޙަމަލާ ބަދަލުކުރަން ފަށާފައި ވަނީ އޭޕްރިލް 15 ވަނަ ދުވަހުއެވެ. މި ހަމަނުޖެހުންތަކުގައި މަރުވެފައިވާ މީހުންގެ ޢަދަދު މިހާރު 850 އަށްވުރެ މައްޗަށް އަރާފައިވާ ކަމަށް ދުނިޔޭގެ ޞިއްޙަތު ޖަމުޢިއްޔާ (ޑަބްލިޔު.އެޗް.އޯ)އިން ބުނެއެވެ. އަދި، އިތުރު 5,500 އަށްވުރެ ގިނަ މީހުން ވަނީ ޒަޚަމުވެފައެވެ.
އޭޕްރިލް 15 ވަނަ ދުވަހު އާރް.އެސް.އެފްގެ ފައުޖުތަކުން ވަނީ ވެރިރަށް ޚަރްތޫމަށް އަރައި ރިޔާސީ ގަނޑުވަރާއި އަލް-ބުރްހާންގެ ގެކޮޅު ވަށައިލާ، އެ ތަންތަން ހިސާރުކުރަން މަސައްކަތް ކޮށްފައެވެ. ރިޔާސީ ގަނޑުވަރާއި ޚަރްތޫމްގެ ވައިގެ ބަނދަރުގެ ބޮޑު ބައެއް މިހާރު އޮތީ އާރް.އެސް.އެފްގެ ބާރުގެ ދަށުގައެވެ. ނަމަވެސް، އަސްކަރީ އެއްވެސް މަރުކަޒެއް ހިފިފައެއް ނުވެއެވެ.
49 މިލިޔަން މީހުންގެ އާބާދީއެއް އޮންނަ ސޫދާންގެ 350,000 އަށްވުރެ ގިނަ ރެފިއުޖީން މިހާރު ވެސް އަވައްޓެރި ޤައުމުތަކަށް ހިޖުރަކޮށްފައިވާ ކަމުގައި ޔޫ.އެން.އެޗް.ސީ.އާރުން ބުނެއެވެ. އޭގެ ތެރެއިން ގިނަ މީހުން ދަތުރުކޮށްފައި ވަނީ މިޞްރާއި ޗާޑް އަދި ދެކުނު ސޫދާނަށެވެ. ކުރިއަށް އޮތް ހައެއްކަ މަހުގެ ތެރޭގައި އެ ޢަދަދު 800,000 އަރާނެ ކަމަށާއި، އެ ޤައުމުގައި ދިރިއުޅޭ އެހެން ޤައުމުތަކުގެ 200,000 އެއްހާ މީހުން ވެސް އެހެން ޤައުމުތަކަށް ހިޖުރަކުރާނެ ކަމުގައި ޔޫ.އެން.އެޗް.ސީ.އާރްގެ އިސްވެރިޔާ ފިލީޕޯ ގްރަންދީ ވިދާޅުވިއެވެ.
ސޫދާންގައި ހިނގަމުންދާ ހަމަނުޖެހުންތަކުގެ އަސަރު އެ ޤައުމާ އިންވެގެން އޮންނަ އެހެން ޤައުމުތައް ކަމުގައިވާ ދެކުނު ސޫދާނާއި، ސެންޓްރަލް އެފްރިކަން ރިޕަބްލިކާއި، އިތިއޯޕިޔާގެ އިތުރުން ލީބިޔާއަށް ކުރަމުންދާ ކަމުގައި ވެސް ބައިނަލްއަޤުވާމީ އިދާރާތުން ބުނެއެވެ.
ސޫދާންގެ ހަމަނުޖެހުންތަކާ ގުޅިގެން އެ ޤައުމަށް ދޫކޮށް ގިނަ ޢަދަދެއްގެ ބަޔަކު ހިޖުރަކުރަން މަސައްކަތް ކުރާތީ، އިންސާނީ ވަގުފާރީގައި ހަރަކާތްތެރިވާ މީހުން އެ ކަމުގެ ނާޖާއިޒު ފައިދާ ނަގާނެ ކަމުގައި ގްރަންދީ ވިދާޅުވިއެވެ. އަދި، ހަތިޔާރުގެ ވަގު ވިޔަފާރި ކުރާ ފަރާތްތަކަށް ވެސް ސޫދާންގެ ހަމަނުޖެހުންތަކާ އެކު ގިނަ ފުރުޞަތުތަކެއް ފަހިވެފައިވާ ކަމުގައި ވިދާޅުވެ، އޭނާ ވަނީ ކަންބޮޑުވުން ފާޅުކުރައްވާފައެވެ.
ސޫދާންގެ ދާޚިލީ ހަމަނުޖެހުންތަކާ ގުޅިގެން އެތަކެއް މިލިޔަން ރައްޔިތުންނެއް ހާލުގައި ޖެހިފައިވާއިރު، އެ މީހުންނަށް އިންސާނީ އެހީތެރިކަން ފޯރުކޮށްދިނުމުގެ މަސައްކަތްތަކަށް ކުރިއަށް އޮތް ހައެއްގެ މަހުގެ ތެރޭގައި 470 މިލިޔަން އެމެރިކާ ޑޮލަރު ބޭނުންވާނެ ކަމުގައި އ.ދއިން ވަނީ ބުނެފައެވެ. މި ފައިސާ ހޯދަން އެހީދޭ ޤައުމުތަކާއި ޖަމުޢިއްޔާތަކުގެ ބައްދަލުވުމެއް ބޭއްވުން ވަރަށް މުހިންމު ކަމުގައި ވެސް ގްރަންދީ ވިދާޅުވިއެވެ.
ރަޝިޔާ-ޔޫކްރެއިން ހަނގުރާމައާ ގުޅިގެން ސޫދާންގެ ހާލަތައް ބައިނަލްއަޤުވާމީ މަސްރަޙުން އިސްކަންދޭ މިންވަރު ކުޑަކަން ފާހަގަކުރައްވައި ގްރަންދީ ވަނީ ސޫދާންގައި ހާލުގައި ޖެހިފައިވާ މީހުންނަށް އިންސާނީ އެހީތެރިކަން ފޯރުކޮށްދޭން ބޭނުންވާ 470 މިލިޔަން ޑޮލަރުގެ ތެރެއިން މިހާތަނަށް ހޯދިފައި ވަނީ އެންމެ އެކެއް އިންސައްތަ ކަން ވެސް ހާމަކުރައްވާފައެވެ.
ޔޫ.އެން.އެޗް.ސީ.އާރުން މިހާރު ދަނީ ސޫދާންގެ އުތުރުގައިވާ ވާދީ ޙަލްފާގައި މަރުކަޒުވާން މަސައްކަތް ކުރަމުންނެވެ. ސޫދާނުން ބޭރަށް ހިޖުރަކުރަން މަސައްކަތް ކުރާ އެތަކެއް ހާސް ރެފިއުޖީންނެއް އެ ރަށުގައި ތާށިވެފައިވާ ކަމުގައި އެ ޖަމުޢިއްޔާއިން ބުނެއެވެ. އޭގެ ތެރޭގައި ގިނަ ޢަދަދެއްގެ އަންހެނުންނާއި، އުމުރުން ދުވަސްވީ މީހުންނާއި، ކުޑަކުދިން ހިމެނޭއިރު، އެ މީހުންނަށް އެހީތެރިކަން ފޯރުކޮށްދޭން އެ ޖަމުޢިއްޔާއިން ދަނީ މަސައްކަތް ކުރަމުންނެވެ.