ޔޫކްރެއިންގެ އަސްކަރިއްޔާއިން ރަޝިޔާގެ ވެރިރަށް މޮސްކޯއަށް ވަރުގަދަ ޑްރޯން ޙަމަލާތަކެއްދީ، ރަޝިޔާގެ ސަރުކާރާއި ރައްޔިތުންނަށް ހާސްކަން ގެނުވައިފިއެވެ. 2022 ވަނަ އަހަރުގެ ފެބުރުވަރީ މަހުގެ 24 ވަނަ ދުވަހު ރަޝިޔާއިން ޔޫކްރެއިނަށް ސިފައިން ފޮނުވައިގެން ހަނގުރާމަ ފަށާފައިވާއިރު، މިހާތަނަށް ހަނގުރާމަ ހިނގަމުން ގޮސްފައި ވަނީ ޔޫކްރެއިންގައެވެ. ރަޝިޔާއަކަށް ބިރުވެރިކަމެއް ނެތެވެ. ނަމަވެސް، މިއަދު މި ވަނީ ހާލަތު ބަދަލުވެފައެވެ.
އަސްކަރީ ޑްރޯންތަކެއް ބޭނުންކޮށްގެން މޮސްކޯއަށް ޙަމަލާ ދިނުމުގެ ފަހަތުގައި އޮތީ ޔޫކްރެއިންގެ ސަރުކާރާއި އަސްކަރިއްޔާ ކަމަށް ރަޝިޔާއިން ތުހުމަތު ކުރި ނަމަވެސް، ޔޫކްރެއިނުން ވަނީ އެ ތުހުމަތު ދޮގުކޮށްފައެވެ. ރައީސް ވޮލޮޑޮމީރް ޒެލެންސްކީގެ އިސް މުޝީރެއް ކަމުގައިވާ މިޚައިލް ޕޮޑޮލްޔެކް ވިދާޅުވީ މޮސްކޯއަށް ޙަމަލާދިނުމުގައި ޔޫކްރެއިނުން ބައިވެރިވެފައި ނުވާނެ ކަމުގައެވެ.
ރަޝިޔާގެ ޤާނޫނު ހަދާ މަޖިލީހުގެ މެންބަރެއް މި ޙަމަލާތައް ސިފަކޮށްފައި ވަނީ، ދެވަނަ ބޮޑު ހަނގުރާމައަށް ފަހު މޮސްކޯއަށް ދީފައިވާ އެންމެ ނުރައްކާތެރި ޙަމަލާތަކުގެ ގޮތުގައެވެ. ޔޫކްރެއިނުން މޮސްކޯއަށް ޑްރޯން ޙަމަލާތަކެއްދިން ނަމަވެސް، ރަޝިޔާގެ އަސްކަރިއްޔާއިން ވަނީ ޑްރޯންތައް ވައްޓައިލާފައެވެ.
މި ޙަމަލާތަކުގައި ދެ މީހަކު ޒަޚަމުވި ކަމުގައި މޮސްކޯގެ މޭޔަރު ސަރްގޭ ސޮބިޔަނިން ވިދާޅުވިއެވެ. އަދި، ޑްރޯނެއްގެ ބައިތަކެއް ވެއްޓުމު ސަބަބުން ޢާންމުން ދިރިއުޅޭ ގެއަކަށް ގެއްލުންވެ، އެ ޢިމާރާތުން މީހުން ހުސްކުރަން ޖެހުނު ކަމުގައި ވެސް އޭނާ ވިދާޅުވިއެވެ.
ޔޫކްރެއިންގެ ޙަމަލާތަކުގައި 25 ޑްރޯން ބޭނުންކޮށްފައިވާ ކަމުގައި އެ ޤައުމުގެ މީޑިޔާތަކުން ރިޕޯޓްކުރެއެވެ. ނަމަވެސް، އެ ޤައުމުގެ ދިފާޢީ ވުޒާރާއިން ބުނީ ޔޫކްރެއިނުން ބޭނުންކޮށްފައި ވަނީ އަށް ޑްރޯން ކަމަށާއި، އެ ޑްރޯންތައް ދިފާޢުކޮށް ވައްޓައިލާފައިވާ ކަމުގައެވެ.
މީގެ ކުރިން ވެސް ޔޫކްރެއިނުން ވަނީ ޑްރޯންތަކެއް ބޭނުންކޮށްގެން މޮސްކޯއަށް ޙަމަލާތަކެއް ދޭން މަސައްކަތް ކޮށްފައެވެ. މޮސްކޯގައި ހުންނަ ރިޔާސީ ގަނޑުވަރު ކްރެމްލިނަށް ޙަމަލާދޭން ޔޫކްރެއިނުން ބޭނުންކުރި ދެ ޑްރޯނެއް ރަޝިޔާއިން ވަނީ ދިފާޢުކޮށް ވައްޓައިލާފައެވެ. އެއީ، ރައީސް ވްލަޑިމިޔަރ ޕުޓިން އަވަހާރަކޮށްލަން ދީފައިވާ ޙަމަލާއެއް ކަމުގައި މޮސްކޯއިން ތުހުމަތު ކުރި ނަމަވެސް، ޔޫކްރެއިނުން ވަނީ އެ ޙަމަލާތަކުގައި ބައިވެރި ނުވާ ކަމަށް ބުނެފައެވެ.
މޮސްކޯއަށް އަމާޒުކޮށް ޑްރޯން ޙަމަލާތަކެއް ދީފައި ވަނީ ރަޝިޔާއިން ޔޫކްރެއިންގެ ވެރިރަށް ކީވްގެ އިތުރުން އެހެން ބޮޑެތި ރަށްތަކަށް ވެސް ވަރުގަދަ ޙަމަލާތަކެއް ދެމުންދިޔަ ދަނޑިވަޅެއްގައެވެ. ފާއިތުވި 24 ގަޑިއިރުގެ ތެރޭގައި ރަޝިޔާއިން ވަނީ ތިން ފަހަރެއްގެ މަތިން ކީވަށް ޙަމަލާދީފައެވެ. އަދި، މި މޭ މަހުގެ ތެރޭގައި ކީވަށް ޙަމަލާދީފައިވާ 16 ވަނަ ފަހަރެވެ.
ކީވްގެ އިތުރުން ޔޫކްރެއިންގެ އިރުމަތީގައިވާ ޑޮނެޓްސްކުގެ ރަށެއް ކަމުގައިވާ ޓޮރެޓްސްކަށް ދިން ޙަމަލާތަކުގައި ޢާންމުންގެ ދެ މީހުން މަރުވެ، އިތުރު އަށް މީހުން ވަނީ ޒަޚަމުވެފައެވެ. ރަޝިޔާއިން ޔޫކްރެއިނުގެ ބަނދަރުމަތީ ރަށެއް ކަމުގައިވާ އޮޑެސާއަށް ދިން ޙަމަލާތަކުގައި ބައެއް ޢިމާރާތްތަކަށް ގެއްލުންވެ، ނުރައްކާތެރި އަލިފާނުގެ ހާދިސާއެއް ވަނީ ހިނގާފައެވެ.
ކީވަށް ޙަމަލާދޭން ރަޝިޔާއިން 35 ޑްރޯނާއި 40 ކްރޫޒް މިސައިލް ބޭނުން ކުރި ކަމުގައި ޔޫކްރެއިނުން ބުނެއެވެ. އޭގެ ތެރެއިން 29 ޑްރޯނާއި 37 ކްރޫޒް މިސައިލް ދިފާޢުކޮށް ވައްޓައިލާފައިވާ ކަމުގައިވެސް ޔޫކްރެއިނުގެ ދިފާޢީ ވުޒާރާއިން ބުނެއެވެ. ނަމަވެސް، މި ޙަމަލާތަކުގައި ޔޫކްރެއިންގެ ހުޅަނގުގައިވާ ޚްމެލްނިޓްސްކީގައި އޮންނަ އަސްކަރީ މަރުކަޒަކަށް ވަނީ ބޮޑެތި ގެއްލުންތަކެއް ލިބިފައެވެ.