ފްރެންޗް އޯޕަން ޓެނިސް މުބާރާތުގައި ދުނިޔޭގައި އެއްވަނައަށް ރޭންކް ކުރެވިފައިވާ ސްޕެއިންގެ ކާލޯސް އަލްކަރާޒް އާއި ތިންވަނައަށް ސީޑް ކުރެވިފައިވާ ސާބިއާގެ ނޯވަކް ޖޮކޮވިޗް ކުޅުނު މެޗުތައް ކާމިޔާބުކޮށްފިއެވެ.
މިމުބާރާތުގައި އެއްވަނައަށް ސީޑް ކުރެވިފައިވާ އަލްކަރާޒް އޭނާ ކުޅުނު ފުރަތަމަ މެޗް ކާމިޔާބުކުރީ އިޓަލީވިލާތުގެ ފްލާވިއޯ ކޮބޯލީ އާއި ބައްދަލުކުރި މެޗް ސީދާ ތިން ސެޓުންނެވެ. މިމެޗްގެ ސެޓްތައް އަލްކަރާޒް ކާމިޔާބުކޮށްފައިވަނީ ހައެއް ސުމެއް، ހައެއް ދޭއް އަދި ހަތެއް ފަހަކުންނެވެ. ދެވަނަ ބުރުގައި އުމުރުން 20 އަހަރުގެ އަލްކަރާޒް ބައްދަލުކުރާނީ ޖަޕާންގެ ޓާރޯ ޑެނިއެލް އާއެވެ.
މީގެ އިތުރުން ޖޮކިވިޗް އޭނާގެ ފުރަތަމަ މެޗް ކާމިޔާބުކުރީ އެމެރިކާގެ އެލެކްސެންޑަރ ކޮވަސެވިޗާ ބައްދަލުކުރި މެޗް ސީދާ ތިން ސެޓުންނެވެ. އެއީ ހައެއް ތިނެއް، ހައެއް ދޭއް އަދި ހަތެއް ހަޔަކުންނެވެ. މިމެޗްގެ ފަހު ސެޓް ޖޮކޮވިޗަށް ކާމިޔާބު ކުރެވުނީ ޓައި ބްރޭކަކަށް ގޮސްގެންނެވެ. ޓައި ބްރޭކް އޭނާ ކާމިޔާބުކޮށްފައިވަނީ ހަތެއް އެކަކުންނެވެ.
މިފަހަރުގެ މުބާރާތުގައި އެންމެ މަތިން ސީޑް ކުރެވިފައިވާ ފިރިހެން ދިހަ ކުޅުންތެރިންގެ ތެރެއިން އެންމެ ފުރަތަމަ މުބާރާތާ އަލްވަދާއުކީ ކުޅުންތެރިޔަކަށް ވެފައިވަނީ ކެނެޑާގެ ފީލިކްސް އައުގާ އެލިއަސީމެވެ. 10 ވަނައަށް ސީޑް ކުރެވިފައިވާ މިކުޅުންތެރިޔާ ބަލިވީ އިޓަލީވިލާތުގެ ފަބިއޯ ފޮގްނީނީއާ ބައްދަލުކުރި މެޗުން ސީދާ ތިން ސެޓުންނެވެ. އެއީ ހައެއް ހަތަރެއް، ހައެއް ހަތަރެއް އަދި ހައެއް ތިނަކުންނެވެ.
މުބާރާތުގައި އަށްވަނައަށް ސީޑް ކުރެވިފައިވާ އިޓަލީވިލާތުގެ ޔަނިކް ސިނާ ވަނީ ފަރަންސޭސިވިލާތުގެ އެލެގްޒެންޑާ މުލާއާ ބައްދަލުކުރި މެޗް ހައެއް އެކެއް، ހައެއް ހަތަރެއް އަދި ހައެއް އެކަކުން ކާމިޔާބުކޮށްފައެވެ.