އިޓާލިއަން ލީގުގެ ޗެމްޕިއަންކަން ނާޕޮލީއަށް ހޯދައިދިން ކޯޗު ލޫސިއާނޯ ސްޕަލެއްޓީ، ސީޒަން ނިމުމުން ކުރިއަށް އޮތް އެއް އަހަރު ފުޓްބޯޅައާ ދުރުގައި ހޭދަކުރަން ނިންމައިފިއެވެ.
ސްޕަލެއްޓީ ވަނީ 33 އަހަރަށް ފަހު އިޓާލިއަން ލީގުގެ ޗެމްޕިއަންކަން މި ސީޒަނުގައި ނާޕޮލީއަށް ހޯދައިދީފައެވެ.
އުމުރުން 64 އަހަރުގެ ސްޕަލެއްޓީ ބުނީ އޭނާ އަރާމުކުރަން ވަގުތު ކޮޅެއް ބޭނުންވާ ކަމަށާއި، މިހާރު ވަރަށް ވަރުބަލިވެފައިވާ ކަމަށެވެ. އަދި ކުރިއަށް އޮތް އަހަރެއްހާ ދުވަހު ނާޕޮލީއަށްވެސް އަދި އެހެން އެއްވެސް ޓީމަކަށް ކޯޗް ކޮށްދޭތަން ނުފެންނާނެ ކަމަށެވެ.
ސްޕަލެއްޓީ ނާޕޮލީގެ ކޯޗުކަމާއި ހަވާލުވެފައިވަނީ 2021 ވަނަ އަހަރުގެ ޖުލައި މަހުއެވެ. އަދި އޭނާ ނާޕޮލީއާއެކު ހެދި އެއްބަސްވުމުގައި ބާކީ އެއް އަހަރު އެބައޮތެވެ. ނަމަވެސް ނާޕޮލީގެ ރައީސް ވަނީ އެ ކްލަބުން ސްޕަލެއްޓީގެ ނިންމުމަށް އިހްތިރާމް ކުރާނެ ކަމަށް ވިދާޅުވެފައެވެ.
ނާޕޮލީން ވަނީ 1990 ވަނަ އަހަރަށް ފަހު ފުރަތަމަ ފަހަރަށް މިސީޒަންގައި އިޓާލިއަން ލީގުގެ ތަށި ކާމިޔާބުކޮށްފައެވެ. އަދި ޔުއެފާ ޗެމްޕިއަންސް ލިގުގެ ކްއާޓަރ ފައިނަލުންވެސް ވަނީ ޖާގަހޯދާފައެވެ. މައުލޫމާތުލިބޭގޮތުގައި ނާޕޮލީގެ ކޯޗްކަމާއި ހަވާލުން އެންމެ ގާތްކަމަށް ބެލެވިފައިވަނީ ސްޕެއިން ޤައުމީ ޓީމްގެ އިތުރުން ބާސެލޯނާގެ ކުރީގެ ކޯޗް ލުއިސް އެންރީކޭއެވެ.