އިނގިރޭސި ޕްރިިމިއަރ ލީގުގެ ޗެލްސީގެ އައު ކޯޗަކަށް މައުރީސިއޯ ޕޮޗެޓީނޯ ހަމަޖައްސައިފިއެވެ.
މައުލޫމާތުލިބިފައިވާގޮތުގައި ޕޮޗެޓީނޯ ޗެލްސީގެ ކޯޗުކަމާ ރަސްމީކޮށް ހަވާލުވާނީ އަންނަ ޖުލައި މަހުގެ އެއްވަނަ ދުވަހުއެވެ.
ޕޮޗެޓީނޯ ޗެލްސީގެ ކޯޗުކަމާއި ހަވާލުވެފައިވަނީ ދެ އަހަރު ދުވަހުގެ އެއްބަސްވުމެއްގެ ދަށުންނެވެ. ޗެލްސީއިން އާންމު ކުރި ބަޔާނެއްގައި ބުނީ ޕޮޗެޓީނޯއަކީ ދުނިޔޭގެ ފެންވަރުގެ ކޯޗެއް ކަމަށާއި، އޭނާ އެކަން ފާއެތުވެދިޔަ ތަނުގައި ސާބިތު ކޮށްދީފައިވާ ކަމަށެވެ. އަދި ޕޮޗެޓީނޯއަކީ އެ މަގާމަށް ގެނައުމަށް އެކްލަބުން ބޭނުންވި ހަމައެކަނި ކޯޗް ކަމަށާއި، އަދި ކްލަބުން އިތުރު ކޯޗަކާ ވާހަކަވެސް ދައްކާފައިނުވާނެ ކަމަށްވެސް ވަނީ ބުނެފައެވެ.
ޕޮޗެޓީނޯއަކީ ވޭތުވެދިޔަ ފަސް އަހަރުގެ ތެރޭގައި ޗެލްސީއާ ހަވާލުވާ ފަސްވަނަ ކޯޗެވެ. އަދި ނިމިގެންދިޔަ ސީޒަންގައި ޗެލްސީއިން ވަނީ ތޯމަސް ޓުކެލް އާއި ގްރަހަމް ޕޮޓަރ މަގާމުން ވަކިކޮށްފައެވެ. އަދި ޕޮޗެޓީނޯ ވެގެންދާނީ އެ ކުލަބުގެ އައު ވެރިން ކަމަށްވާ ޓޮޑް ބޮއެލީގެ ދައުރުގައި ކްލަބާއި ހަވާލުވާ ހަތަރުވަނަ ކޯޗަށެވެ. އަދި ބޮއެލީ ވަނީ މިދިޔަ އަހަރުގެ ޖުލައި މަހު ޓީމާ ހަވާލުވުމަށްފަހު ކުޅުންތެރިން ގަތުމަށް 550 މިލިއަން ޕައުންޑް ހޭދަކޮށްފައެވެ. އަދި ގިނަ ބަޔަކު ފާހަގަކުރާ ގޮތުގައި ނިމިދިޔަ ސީޒަންގެ އެންމެ ނާކާމިޔާބު އެއް ޓީމަކީ ޗެލްސީއެވެ. އެގޮތުން ޗެލްސީއިން ލީގު ނިންމާލީ ތާވަލްގެ 12 ވަނައިގާ އޮވެގެންނެވެ.
ޕޮޗެޓީނޯގެ ކޯޗިންގ ދައުރުގެ އެންމެ ފާހަގަ ކޮށްލެވޭ ދުވަސްތައް ހޭދަކޮށްފައިވަނީ ޗެލްސީއާ ވާދަވެރި ޓޮޓްނަމް ހިޓްސްޕާގައެވެ. ޕޮޗެޓީނޯ ވަނީ ސްޕާސްގެ ކޯޗް ކަމުގައި ހޭދަކުރި ފަސް އަހަރުގައި އެޓީމަށް ގިނަ ކުރި އެރުންތަކެއް ހޯދާދީ، ޔުއެފާ ޗެމްޕިއަންސް ލީގުގެ ފައިނަލަށް އެޓީމް ގެންގޮސްދީފައެވެ. އަދި ސްޕަރސްގެ ފަހުން އޭނާ ވަނީ ޕީއެސްޖީގެ ކޯކަންވެސް ކޮށްފައެވެ. ޕޮޗެޓީނޯގެ ކޯޗިންގ ކެރިއަރުގެ ފުރަތަމަ ތަށި ކާމިޔާބު ކުރެވިފައިވަނީ ޕީއެސްޖީއާއެކުއެވެ.