ރާއްޖެފަދަ ވަކިވަކި ރަށްތަކެއް ހިމެނޭ ޖަޒީރާ ޤައުމެއްގައި މާލީ ހިދުމަތްތައް ފޯރުކޮށްދިނުމަށްހުރި ދަތިތައް ނެތިގެންދިޔައީ ފިންޓެކް ނުވަތަ ފައިނޭންޝަލް ޓެކްނޮލޮޖީގެ ސަބަބުންކަމަށް މިނިސްޓަރ އޮފް އެންވަޔަރަމަންޓް، ކްލައިމެޓް ޗޭންޖު އެންޑް ޓެކްނޮލޮޖީ އައިމިނަތު ޝައުނާ ވިދާޅުވެއްޖެއެވެ.
މިނިސްޓަރ ޝައުނާ މިހެން ވިދާޅުވީ މިއަދު ޕެންޝަން އޮފީހުން އިންތިޒާމްކޮށްގެން މިއަދު ފެށި 10 ވަނަ ފައިނޭންސް ފޯރަމް ހުޅުވުމުގެ ރަސްމިއްޔާތުގައި ދެއްކެވި ވާހަކަފުޅުގައެވެ.
2012 ވަނަ އަހަރުން ފެށިގެން ބާއްވަމުން އަންނަ ފައިނޭންސް ފޯރަމްއަކީ ކަމާއި ގުޅުންހުރި ދާއިރާތަކުގެ ބޭފުޅުންނާއި ތަޖުރިބާކާރުން މަޝްވަރާކޮށް، ރާއްޖޭގެ މާލީ ދާއިރާ ހަރުދަނާކުރުމުގެ މަޤްޞަދުގައި ކުރިއަށްގެންދާ ފޯރަމެކެވެ.
ކުރުނބާ މޯލްޑިވްސްގައި އޮތް ފައިނޭންސް ފޯރަމް ހުޅުވުމުގެ ރަސްމިއްޔާތު ޝަރަފުވެރިކޮށްދެއްވައި، ވާހަކަފުޅުދައްކަވަމުން މިނިސްޓަރ ޝައިނާ ވިދާޅުވީ ރާއްޖެއަކީ ޖަޒީރާ ރަށްތަކެއްކަމުން، މާލީ ދާއިރާގެ ހިދުމަތްތައް ފޯރުކޮށްދިނުމަށް ދަތިތަކެއް ކުރިމަތިވެފައި އޮތްކަމަށެވެ. ނަމަވެސް ފައިނޭންސް ޓެކްނޮލޮޖީގެ ސަބަބުން އެކަމަށް ހުރި ދަތިތައް ނެތި، ވަކިވަކިން ހުރި ޖަޒީރާތައް ރަށްތައް ފައިނޭންސްގެ ދާއިރާއިން ގުޅާލެވި، ހުރިހާ ރަށަކަށްވެސް މާލީ ކަންކަމާއި ގުޅޭ ހިދުމަތްތައް ފޯރުކޮށްދެވިގެންދާކަމަށް މިނިސްޓަރ ވިދާޅުވިއެވެ.
ފައިނޭންސް ޓެކްނޮލޮޖީގެ ދާއިރާ ރާއްޖޭގައި ކުރިއަރަމުންދާއިރު އެކަމަށް ހަރުދަނާ ޤާނޫނީ އޮނިގަނޑެއްވެސް ބޭނުންވާތީ، ސަރުކާރުން ދަނީ އެކަމަށް މަސައްކަތްކުރައްވަމުންކަން މިނިސްޓަރ ފާހަގަކުރެއްވިއެވެ. އެގޮތުން އިލެކްޓްރޯނިކް މުއާމަލާތްތަކާއި ގުޅޭ ޤާނޫނެއް އެކުލަވާލެވި، ފައިސާގެ ޑިޖިޓަލް މުއާމަލާތްތަކާއި އެއްބަސްވުންތަކަށް ޤާނޫނީގޮތުން ބަލައިގަންނަ ކަމަކަށް ހެދިފައިވާއިރު އެ ޤާނޫނުގެ ސަބަބުން ފައިނޭންސް ޓެކްނޮލޮޖީގެ ދާއިރާ އިތުރަށް ކުރިއަރައި ފުޅާކުރުމަށް މަގުފަހިވެގެންދާނެކަމަށްވެސް މިނިސްޓަރ ވިދާޅުވިއެވެ.
މީގެއިތުރުން ސަރުކާރުން މިހާރު މަސައްކަތްކުރަނީ ޑިޖިޓަލް ދާއިރާއާ ގުޅުންހުރި ކަންކަމުގެ ތެރެއިން މީހުންގެ ޒާތީ މައުލޫމާތާއި އެހެނިހެން މައުލޫމާތުތަކުގެ ރައްކާތެރިކަން ކަށަވަރުކުރުމާއި ގުޅޭ ޤާނޫނެއް އެކުލަވާލުމަށްކަމަށްވެސް މިނިސްޓަރ ވިދާޅުވިއެވެ. އަދި އެ ޤާނޫނުގެ ސަބަބުން ޑިޖިޓަލް ޓްރާންސެކްޝަންތަކަށް އޮންނަ ޔަގީންކަން ބޮޑުވެގެންދާނެކަންވެސް ފާހަގަކުރެއްވިއެވެ.
The Maldives Finance Forum 2023 begins with over 160 participants at Kurumba Maldives.#FinanceForumMV pic.twitter.com/AKPQJ1urp5
— Pension Office (@PensionOffice) May 29, 2023
މިނިސްޓަރ ވިދާޅުވީ ދިވެހިންނަކީ ފައިނޭންސް ޓެކްނޮލޮޖީގެ ދާއިރާއަށް ވަރަށް ބޮޑަށް ހޭލުންތެރިވެފައިވާ ބައެއްކަން 2022 ވަނަ އަހަރު ހެދި ނެޝަނަލް ފައިނޭންޝަލް އިންކުލޫޝަން ސާވޭއިން ހާމަވެފައިވާކަމަށެވެ.
"ރާއްޖޭގެ ބޮޑު އާބާދީއެއް އިންޓަނެޓް ބެންކިންގއާއި މޮބައިލް ބެންކިންގ ބޭނުންކުރާކަން އެ ސާވޭއިން ހާމަވޭ. އަދި މީގެއިން ހާމަކޮށްދެނީ ފައިނޭންސް ޓެކްނޮލޮޖީގެ ދާއިރާއިން އިތުރު ކުރިއެރުންތައް ހޯދަން ރާއްޖެއިން ތައްޔާރުވެފައި އޮތް މިންވަރު" ޝައުނާ ވިދާޅުވިއެވެ. ކޯވިޑާއެކު ރާއްޖޭގެ އިޤްތިޞާދުގައި ހިމެނޭ ސިނާއަތްތައް މަޑުޖެހުނަސް، އައިސީޓީ ދާއިރާއާއި ފައިނޭންސް ޓެކްނޮލޮޖީގެ ދާއިރާއިން ހޯދި ކުރިއެރުންތަކުން، އެ ދާއިރާތަކަކީ އިޤްތިޞާދު ކުރިއެރުމަށް ވަރަށް ބޮޑަށް އެހީތެރިވެދޭނެ ދާއިރާތަކެއްކަންވެސް ޝައުނާ ފާހަގަކުރެއްވިއެވެ.
ފައިނޭންސް ޓެކްނޮލޮޖީގެ ދާއިރާއަކީ ހަމައެކަނި އިޤްތިޞާދު ކުރިއެރުވުމަށް އެހީތެރިވެދޭނެ ދައިރާއެއް ނޫޏްކަމަށާއި އެއީ ފައިނޭންސް ޑިވެލޮޕްމަންޓާއި އައު އިޖާދުތައް ތައާރަފްކުރުމަށް އެހީތެރިވެދޭނެ ދާއިރާއެއްކަމުން ފައިނޭންސް ޓެކްނޮލޮޖީގެ ދާއިރާއަށް އިންވެސްޓްކުރާ މިންވަރު އިތުރުކޮށް، އެ ދާއިރާ ކުރިއެރުވުމަށް އެހީތެރިކަން ފޯރުކޮށްދޭންޖެހޭކަންވެސް މިނިސްޓަރގެ ވާހަކަފުޅުގައި ފާހަގަކުރެއްވިއެވެ. އަދި ސަރުކާރުން އެމަގުން ގިނަ މަސައްކަތްތަކެއް ކުރަމުންދާކަމަށާއި ސަރުކާރުން މާލީ ކަންކަމާއި ގުޅޭގޮތުން ތަޢާރަފްކޮށްފައިވާ ބައެއް ޑިޖިޓަލް ވަސީލަތްތަކަކީ އެކަމުގެ ހެއްކެއްކަމަށްވެސް އެކަމަނާ ވިދާޅުވިއެވެ.
.
މިއަހަރުގެ ފައިނޭންސް ފޯރަމްގައި ރާއްޖެއާއި ރާއްޖެއިން ބޭރުގެ ތަޖުރިބާކާރުންނާއި ފައިނޭންސް ދާއިރާގައި ހަރަކާތްތެރިވާ ބޭފުޅުން ބައިވެރިވެއެވެ.
"މޯލްޑިވްސް ފައިނޭންސް ފޯރަމް" އަކީ ޕެންޝަން އޮފީހުން 2012 ވަނަ އަހަރުން ފެށިގެން ބައްވަވަމުން އަންނަ ޚާއްޞަ ފޯރަމްއެކެވެ. ކޮންމެ އަހަރަކުވެސް ސަރުކާރުގެ އޮފީސްތަކާއި، އަމިއްލަ ކުންފުނިތައް ހިމެނޭހެން ގިނަ ބަޔަކު މި ފޯރަމްގައި ބައިވެރިވެއެވެ. މި ފޯރަމްގައި ދާއިރާއާ ގުޅޭ ތަފާތު އެކި ކަންކަމާއި ގުޅޭގޮތުން މަޝްވަރާތައް ކުރުމަށް ޕެނަލް ޑިސްކަޝަންތައްވެސް ބާއްވާފައިވެއެވެ.