މޭ 28 ވަނަ ދުވަހު ތުރުކީވިލާތުގައި ބޭއްވި ރިޔާސީ އިންތިޚާބުގެ ދެވަނަ ބުރަކީ އެ ޤައުމުގައި މިހާތަނަށް ބާއްވާފައިވާ އެންމެ ނާއިންސާފުން ފުރިގެންވާ އިންތިޚާބު ކަމަށް ސިފަކުރައްވައި، އިންތިޚާބުގައި ނާކާމިޔާބީއާ ކުރިމަތިވެ ވަޑައިގެންނެވި ކެނޑިޑޭޓް ކެމާލް ކްލިޗްތަރޯލޯ ފާޑުވިދާޅުވެއްޖެއެވެ. ދެވަނަ ބުރު ކާމިޔާބު ކުރައްވައި ރިޔާސީ އިތުރު ދައުރަކަށް އިންތިޚާބުވެ ވަޑައިގަންނަވާފައި ވަނީ ރައީސް ރަޖަބް ޠައްޔިބް އުރުދުޣާނެވެ.
އުރުދުޣާނަށް ތާޢީދުކުރާ މީހުންނާއި އޭނާގެ ޖަސްޓިސް އެންޑް ޑިވެލޮޕްމެންޓް ޕާޓީ (އޭ.ކޭ. ޕާޓީ)އަށް ނިސްބަތްވާ މެންބަރުން ދަނީ ވެރިރަށް އަންކާރާއާއި އިސްތަންބޫލް ފަދަ ބޮޑެތި އެހެން ރަށްތަކުގައި އުފާ ފާޅުކުރަމުންނެވެ. މި އިންތިޚާބަކީ އުރުދުޣާންގެ ދިގު ސިޔާސީ ހަޔާތުގައި ކުރިމަތިވެ ވަޑައިގެންނެވި އެންމެ ބޮޑު އިމްތިހާނެވެ. ވާދަވެރި މި އިންތިޚާބުގައި އުރުދުޣާން ކާމިޔާބީ ހޯއްދަވާފައި ވަނީ ވަރަށް ހަނި އަޢުލަބިއްޔަތަކުންނެވެ.
އިންތިޚާބުގެ ވަގުތީ ނަތީޖާ ދައްކާ ގޮތުން އުރުދުޣާނަށް ކާމިޔާބު ކުރެވުނީ 52.24 އިންސައްތަ ވޯޓެވެ. ކްލިޗްތަރޯލޯ ވަނީ 47.8 އިންސައްތަ ވޯޓު ކާމިޔާބު ކުރައްވާފައެވެ. އުރުދުޣާންގެ ވެރިކަމުގެ ދައުރު އިތުރު ފަސް އަހަރަށް ދެމެން ގޮސްފައިވާއިރު، ކުރިއަށް އޮތީ ވަރަށް ދަތި، އަދި އުނދަގޫ ދުވަސްތަކެއް ކަމުގައި ކްލިޗްތަރޯލީ ސިފަކުރައްވައެވެ. ނަމަވެސް، އިންތިޚާބުގެ ނަތީޖާ ގަބޫލުފުޅު ނުކުރައްވާނެ ކަން އޭނާ ވިދާޅުވެފައެއް ނުވެއެވެ.
މޭ މަހުގެ 14 ވަނަ ދުވަހު ބޭއްވި ޚިޔާލު ހޯދުމުގެ ވޯޓުތަކުން ފެނިގެންދިޔައީ ކްލިޗްތަރޯލޯ އިންތިޚާބު ކާމިޔާބު ކުރައްވައި، އުރުދުޣާންގެ ސިޔާސަތުތައް ބަދަލުކުރައްވާ މަންޒަރެވެ. ދިރިއުޅުމުގެ ޚަރަދުތަކުގެ އަގުތައް އުފުލި، ތުރުކީވިލާތުގެ އާބާދީގެ ބޮޑު ބައެއް އުރުދުޣާންގެ ސަރުކާރާ މެދު ހިތްހަމަނުޖެހިފައިވާ ކަން އެ ވޯޓުތަކުން ހާމަވެގެން ދިޔައެވެ. ނަމަވެސް، އިންތިޚާބުގެ ފުރަތަމަ ބުރު ނިމިގެންދިޔައީ އެއްވެސް ކެނޑިޑޭޓަކަށް 50 އިންސައްތައަށް ވުރެ މަތިން ވޯޓު ކާމިޔާބު ނުވެއެވެ.
"އިންތިޚާބުގައި ކާމިޔާބީ ލިބިފައި ވަނީ ޑިމޮކުރަސީއަށް. ކުރިއަށް އޮތީ ހަސަދަވެރިކަން އެއް ފަރާތްކޮށް އެންމެން ގުޅިގެން ޤައުމުގެ އަމާޒިތައް ހާސިލުކުރަން މަސައްކަތް ކުރުން،" އިންތިޚާބުގައި ލިބުނު ކާމިޔާބީ ފާހަގަކުރައްވަން އުރުދުޣާނަށް ތާޢީދުކުރާ މީހުންނާ ބައްދަލުކޮށް ވާހަކަފުޅު ދައްކަވަމުން އުރުދުޣާން ވިދާޅުވިއެވެ.
މި ކާމިޔާބީއާ އެކު އުރުދުޣާންގެ ވެރިކަން އިތުރު ފަސް އަހަރުގެ ދައުރަކަށް ދެމިގެންދިޔައީއެވެ. ތުރުކީވިލާތުގެ ރައީސް ކަމުގެ މަޤާމަށް އޭނާ އެންމެ ފުރަތަމަ ފަހަރަށް އިންތިޚާބުވެ ވަޑައިގަތީ 2014 ވަނަ އަހަރުގެ އޮގަސްޓު މަހުގެ 28 ވަނަ ދުވަހުއެވެ. އަދި، 2003 ވަނަ އަހަރުން ފެށިގެން 2014 ވަނަ އަހަރު ރައީސް ކަމުގެ މަގާމަށް އިންތިޚާބުވެ ވަޑައިގަންނަވަން ދެން އޭނާ ހުންނެވީ ބޮޑުވަޒީރު ކަމުގެ މަގާމުގައެވެ.