އިޓާލިއަން ސެރީއާގައި އޭސީ މިލާނާއި ޔުވެންޓަސް ބައްދަލުކުރިމެޗް ކާމިޔާބުކޮށް މިއަންނަ ސީޒަންގައި ޗެމްޕިއަންސް ލީގުގައި ކުޅެވޭނެކަން މިލާނުން ކަށަވަރުކޮށްފިއެވެ.
ޔުވެންޓަސްގެ ދަނޑުގައި ކުޅުނު މިމެޗް މިލާނުން ކާމިޔާބުކޮށްފައިވަނީ އެއްލަނޑު ސުންލަނޑުންނެވެ.
ދެޓީމްގެ ފަރާތުން ވާދަވެރި ކުޅުމެއް ފެނިގެންދިޔަ މިމެޗްގައި މިލާނުން ގިނައިރު ބޯޅަ ގެންގުޅުނުއިރު ގިނަ ހަމަލާ އުފައްދާފައިވަނީ ޔޫވެންޓަސްއިންނެެވެ. މިމެޗްގައި މިލާނުން ކާމިޔާބުކުރި ހަމައެކަނި ލަނޑު މެޗްގެ 40 ވަނަ މިނެޓްގައި ޑޭވިޑް ކަލަބްރިއާ ނަގާދިން ހުރަހަކުން ކާމިޔާބުކޮށްދިނީ އޮލިވަރ ޖިރޫއެވެ. މިމެޗްގައި މީގެ އިތުރުންވެސް ލަނޑު ޖަހާނެ ރަނގަޅު ފުރުސަތު ދެޓީމަށް ލިބިގެންދިޔަ ނަމަވެސް އެއިން އެއްވެސް ފުރުސަތެއްގެ ބޭނުން ހިފޭގޮތެއްނުވިއެވެ.
މިކާމިޔާބީއާއެކު މިލާނުން މިވަނީ މިސީޒަންގައި ލީގުގައި ޔޫވޭ އާއި ބައްދަލުކުރި ދެމެޗްވެސް ކާމިޔާބުކޮށްފައެވެ. މިއީ ވޭތުވެދިޔަ 50 އަހަރުގެ ތެރޭގައި މިލާނަށް މިކަން ހާސިލް ކުރެވުނު ތިންވަނަ ފަހަރެވެ. މިކާމިޔާބީއާއެކު މިލާނަށް މިހާރުވަނީ ތާވަލްގެ ހަތަރުވަނަ މަގާމް ކަށަވަރުވެފައެވެ. އެޓީމަށްވަނީ 37 މެޗުން 67 ޕޮއިންޓް ލިބިފައެވެ. އަދި ފަސްވަނައިގާ އުޅޭ އެޓަލާންޓާއަށް ލިބިފައިވަނީ 61 ޕޮއިންޓް ކަމުން ބާކީ އޮތް އެއް މެޗުން މިލާނާއި އަރާ ހަމަނުކުރެވޭނެކަން ޔަގީންވުމުންނެވެ.
މެޗުން ބަލިވުމާއެކު ޔުވެންޓަސްއަށް އަންނަ ސީޒަންގައި ޗެމްޕިއަންސް ލީގަށް ކޮލިފައިވުމަށް އޮތް ހަނި ފުރުސަތުވެސް މިވަނީ ގެއްލިގެން ގޮސްފައެވެ. މީގެ އެންމެ ބޮޑު އެއް ސަބަބަކަށް ވެފައިވަނީ އެޓީމް އަތުން މިދިޔަ ހަފްތާގައި އުނިކުރި 10 ޕޮއިންޓެވެ. މިއާއެކު މިވަގުތު ޔޫވޭ އުޅެނީ 59 ޕޮއިންޓާއެކު ތާވަލްގެ ހަތްވަނައިގައެވެ.