ސްޕެނިޝް ލަލީގާގެ ޗެމްޕިއަންކަން މިސީޒަންގައި ހޯދި އެފްސީ ބާސެލޯނާއިން މަޔޯކާ ބަލިކޮށް މިސީޒަންގައި އެޓީމުން އަމިއްލަ ދަނޑުގައި ކުޅުނު ފަހު މެޗް ކާމިޔާބުކޮށްފިއެވެ.
ބާސާއިން މެޗު ކާމިޔާބުކޮށްފައިވަނީ 3 ލަނޑު ސުންލަނޑުންނެވެ.
ބާސާގެ ދަނޑު ކޭމްޕް ނޫ ގައި ކުޅުނު މިމެޗަކީ އަންނަ އަހަރުގެ ނޮވެމްބަރު މަހުގެ ކުރިން ބާސާ އެދަނޑުގައި ކުޅުނު ފަހު މެޗެވެ. މިދަނޑު މަރާމާތު ކުރުމަށްޓަކައި ބާސާއިން މިއަންނަ ސީޒަންގައި އެޓީމްގެ އަމިއްލަ ދަނޑުގައި ކުޅޭ މެޗްތައް ކުޅުމަށް ހަމަޖެހިފައިވަނީ އޮލިމްޕިކް ސްޓޭޑިއަމްގައެވެ.
ބާސާ އެނބުރި ކޭމްޕް ނޫއަށް އައުމަށް ހަމަޖެހިފައިވަނީ 2024-2025 ވަނަ އަހަރުގެ ސީޒަނަށެވެ. ނަމަވެސް އެއީ އެދަނޑުގެ ފަންސާސް އިން ސައްތަ ބޭނުން ކުރެވޭގޮތަށެވެ. އެސްޓޭޑިއަމް އެއްކޮށް ހަދާނިމޭނެކަމަށްވަނީ 2025-2026 ވަނަ އަހަރުގެ ސީޒަނަށެވެ.
ރޭގެ މެޗްގައި ބާސާގެ ފުރަތަމަ ލަނޑު މެޗްގެ ފުރަތަމަ މިނެޓްގައި އެޓީމަށް ކާމިޔާބުކޮށްދީ މެޗްގެ ލީޑު އެޓީމަށް ނަގާދިނީ އަންސޫ ފާޓީއެވެ. އަދި މެޗްގެ 24 ވަނަ މިނެޓްގައި ބާރސާގެ ލީޑު ފުޅާކޮށްދިނީވެސް އަންސޫ ފާޓީއެވެ. މިމެޗްގައި ބާރސާގެ ފަހު ލަނޑު މެޗްގެ 70 ވަނަ މިނެޓްގައި ޖަހާދިނީ ގާވީއެވެ.
މިސީޒަނަށްފަހު ބާސާ އާއި ވަކިވުމަށް ހަމަޖެހިފައިވާ ދެ ކުޅުންތެރިންކަމަށްވާ ސަރޖިއޯ ބުސްކޭޓްސް އާއި ޖޯޑީ އަލްބާ ދެވަނަ ހާފްގައި ބަދަލު ކުރުމާއެކު ބާރސާގެ ސަޕޯޓަރުންވަނީ މިދެކުޅުންތެރިންނަށް ހޫނު މަރްހަބާއެއް ކިޔާފައެވެ. ބާސާއިން މިސީޒަން ނިންމާލާނީ އަންނަ އާދިއްތަ ދުވަހު ސެލްޓަވީގޯ އާއި ރަށުން ބޭރުގައި ކުޅޭ މެޗުންނެވެ.