ރާއްޖޭގެ ޤައުމީ ޓީމުތަކުން މިމަހު ވާދަކުރި ބައިނަލްއަޤްވާމީ މުބާރާތްތަކުގައި ހޯދި ކާމިޔާބީތަކާއި، ކުރި ހިތްވަރު ފާހަގަކޮށް އެ ޓީމްތަކަށް ކުޅިވަރާ ބެހޭ ވަޒީރު އަޙްމަދު މަޚްލޫފު ހިތްވަރުދެއްވައިފިއެވެ.
ޒުވާނުންގެ މަރުކަޒުގައި އެތްލީޓުންނަށް ހާއްސަކޮށް ބޭއްވި ހަފުލާގައި ވަޒީރު މަހުލޫފު ވަނީ އައިއެޗްއެފް ޓްރޮފީގެ ދެކުނު/ސެންޓްރަލް އޭޝިއާ ޒޯނުގައި ވާދަކޮށް ލޯ މެޑަލް ހޯދި 17 އަހަރުން ދަށުގެ އަންހެން ހޭންޑްބޯޅަ ޓީމާއި، 19 އަހަރުން ދަށުގެ އަންހެން ހޭޑްބޯޅަ ޓީމާއި، ސައުތު އޭޝިއަން ޖޫނިއާ އެންޑް ކެޑޭޓް ޓޭބަލް ޓެނިސް މުބާރާތުން ރާއްޖެއަށް އަށް މެޑަލް ހޯދައިދިން ގައުމީ ޖޫނިއާ ޓީމުގެ އިތުރުން ނޭޕާލްގައި ނިމުނު ސެންޓްރަލް އޭޝިއަން ވޮލީބޯލް އެސޯސިއޭޝަން (ކާވާ) ވިމެންސް ޗެލެންޖް ކަޕްގައި ވާދަކުރި ޤައުމީ އަންހެން ވޮލީބޯޅަ ޓީމާވެސް ބައްދަލުކުރައްވާފައެވެ.
މި ޓީމްތަކުގެ އިތުރުން އަންނަ މަހު އިންޑިއާގެ ބެންގަލޫރުގައި އޮންނަ ސާފް ޗެމްޕިއަންޝިޕްގައި ވާދަކުރާ ޤައުމީ ފުޓްބޯޅަ ޓީމާއި، އަންނަމަހު ރާއްޖޭގައި ބާއްވާ ފައިވް ނޭޝަންސް ބާސްކެޓްބޯޅަ މުބާރާތުގައި ވާދަކުރާ ޤައުމީ ބާސްކެޓްބޯޅަ ޓީމާއިވެސް ބައްދަލުކުރައްވާ ދެ މުބާރާތުން ޤައުމަށް ރީތި ނަން ހޯދައިދީ ކާމިޔާބީހޯދުމަށް މިނިސްޓަރު ވަނީ ދެ ޓީމަށްވެސް ހިތްވަރުދެއްވާފައެވެ.
އެތްލީޓުންނަށް ހިތްވަރުދިނުމުގެ ގޮތުން ވާހަކަދައްކަވަމުން މަހްލޫފް ވިދާޅުވީ ކުރިޔަށްއޮތް ފައިވް ނޭޝަންސް ބާސްކެޓް މުބާރާތާއި ސާފް ޗެމްޕިއަންޝިޕުގައި ރާއްޖެއިން އަމާޒު ކަނޑައަޅަންވީ ގަދަ ހިތްވަރާއެކު ކާމިޔާބީ ހޯދުމަށް ކަމަށެވެ.
މި ހަފުލާގައި ހޭންޑްބޯލް މޯލްޑިވްސް، ޓޭބަލްޓެނިސް އެސޯސިއޭޝަން އޮފް މޯލްޑިވްސް، ފުޓުބޯލް އެސޯސިއޭޝަން އޮފް މޯލްޑިވްސް އަދި މޯލްޑިވްސް ބާސްކެޓްބޯލް އެސޯސިއޭޝަނުގެ އިސްވެރިން ވެސް ވަނީ ބައިވެރިވެވަޑައިގެންފައެވެ.