ތުރުކީވިލާތުގެ ރިޔާސީ އިންތިޚާބުގެ ދެވަނަ ބުރު ކާމިޔާބު ކުރައްވައި އިތުރު ދައުރަކަށް އިންތިޚާބުވެ ވަޑައިގަންނަވާފައިވާ ކަން ރައީސް ރަޖަބް ޠައްޔިބް އުރުދުޣާން އިޢުލާނު ކުރައްވައިފިއެވެ. އިންތިޚާބުގެ ނަތީޖާ ގުނުމުގެ މަސައްކަތް އެ ޤައުމުގެ އިންތިޚާބާ ބެހޭ މައި އިދާރާ – ހައި އިލެކްޝަން ބޯޑުން މިހާރު ވެސް ދަނީ ކުރަމުންނެވެ. ދެވަނަ ބުރުގައި ކާމިޔާބީ ލިބިވަޑައިގަންނަވާފައިވާ ކަން އުރުދުޣާން އިޢުލާނު ކުރައްވާފައި ވަނީ ވެރިރަށް އިސްތަންބޫލުގައި އޭނާއަށް ތާޢީދު ކުރާ މީހުންނާ ބައްދަލު ކުރައްވާ ވާހަކަފުޅު ދައްކަވަމުންނެވެ.
ވަގުތީ ނަތީޖާތަކުން ދައްކާ ގޮތުގައި އުރުދުޣާން ވަނީ ވޯޓުގެ 52 އިންސައްތަ ކާމިޔާބު ކުރައްވާފައެވެ. އޭނާއާ ވާދަކުރައްވާފައިވާ އިދިކޮޅު ހަ ޕާޓީއެއް ހިމެނޭ ކޯލިޝަންގައި ހިމެނޭ ރިޕަބްލިކަން ޕީޕަލްސް ޕާޓީ (ސީ.އެޗް.ޕީ)ގެ ކެނޑިޑޭޓު ކެމާލް ކްލިޗްތަރޯލޯއަށް ލިބިވަޑައިގަތީ 48 އިންސައްތައެވެ.
އިންތިޚާބުގައި ކާމިޔާބީ ލިބިވަޑައިގަންނަވާފައިވާ ކަން އުރުދުޣާން އިޢުލާނު ކުރެއްވުމުން އޭނާއަށް ތާޢީދުކުރާ މީހުންނާއި، އޭނާގެ ޖަސްޓިސް އެންޑް ޑިވެލޮޕްމެންޓް ޕާޓީ (އޭ.ކޭ. ޕާޓީ)އަށް ނިސްބަތްވާ މެންބަރުން ދަނީ އުފާފާޅުކުރަމުންނެވެ. އިންތިޚާބުގެ ދެވަނަ ބުރަކަށް ދާން ޖެހުނީ މޭ 14 ވަނަ ދުވަހު ބޭއްވި އިންތިބުގެ ފުރަތަމަ ބުރުގައި އެއްވެސް ކެނޑިޑޭޓަކަށް 50 އިންސައްތައަށް ވުރެ މަތިން ވޯޓު ނުލިބުމުންނެވެ.
އިންތިޚާބުގެ ފުރަތަމަ ބުރުގައި އުރުދުޣާނަށް ލިބިވަޑައިގަތީ 49.5 އިންސައްތައެވެ. އޭނާއާ އެންމެ ގާތުން ވާދަކުރެއްވި ކްލިޗްތަރޯލޯއަށް ކާމިޔާބު ކުރެވުނީ 44.89 އިންސައްތައެވެ. އޭނާއަކީ ހަ ޕާޓީ މައްޗަށް އެކުލެވިގެންވާ ނޭޝަނަލް އެލަޔަންސްގެ ކެނޑިޑޭޓެވެ. އޭނާ އަދި މިހާތަނަށް ބަލި ގަބޫލުފުޅު ކުރައްވާފައިވާ ކަން އިޢުލާނު ކުރައްވާފައެއް ނުވެއެވެ.
އިންތިޚާބުގެ ދެވަނަ ބުރުގެ ވޯޓުފޮށިތަކުގެ ތެރެއިން 93 އިންސައްތަ ވޯޓުފޮށި ގުނައި ނިމިފައިވާ ކަމަށް އެ ޤައުމުގެ މީޑިޔާތަކުން ދަނީ ރިޕޯޓު ކުރަމުންނެވެ. އަދި، އެ ފޮށިތަކުން ކުރި ހޯއްދަވައި އުރުދުޣާން އިންތިޚާބު ކާމިޔާބު ކުރައްވާފައި ކަން ވެސް މީޑިޔާތަކުން ދަނީ ރިޕޯޓު ކުރަމުންނެވެ. ނަމަވެސް، ހައި އިލެކްޝަން ބޯޑުން އަދި މިހާތަނަށް ރަސްމީކޮށް ވަގުތީ ނަތީޖާ އިޢުލާނު ކޮށްފައެއް ނުވެއެވެ.
އިންތިޚާބުގައި ކާމިޔާބީ ލިބިވަޑައިގަތުމާ އެކު އުރުދުޣާންގެ ވެރިކަން އިތުރު ފަސް އަހަރުގެ ދައުރަކަށް ދެމިގެންދިޔައީއެވެ. ތުރުކީވިލާތުގެ ރައީސް ކަމުގެ މަޤާމަށް އޭނާ އެންމެ ފުރަތަމަ ފަހަރަށް އިންތިޚާބުވެ ވަޑައިގަތީ 2014 ވަނަ އަހަރުގެ އޮގަސްޓު މަހުގެ 28 ވަނަ ދުވަހުއެވެ. އަދި، 2003 ވަނަ އަހަރުން ފެށިގެން 2014 ވަނަ އަހަރު ރައީސް ކަމުގެ މަގާމަށް އިންތިޚާބުވެ ވަޑައިގަންނަވަން ދެން އޭނާ ހުންނެވީ ބޮޑުވަޒީރު ކަމުގެ މަގާމުގައެވެ.