ތުރުކީވިލާތުގެ ރިޔާސީ އިންތިޚާބުގެ ދެވަނަ ބުރު ކާމިޔާބު ކުރައްވައި ރައީސް ރަޖަބް ޠައްޔިބް އުރުދުޣާން ރިޔާސީ އައު ދައުރަކަށް އިންތިޚާބުވެ ވަޑައިގަންނަވާފައިވާ ކަމަށް ވަގުތީ ނަތީޖާއިން ދައްކައިފިއެވެ. އިންތިޚާބުގެ ވޯޓުފޮށިތަކުގެ 93 އިންސައްތަ ގުނައި ނިމިފައިވާއިރު ކުރީގައި އުޅުއްވަނީ އުރުދުޣާން ކަމަށް އެ ޤައުމުގެ މީޑިޔާތަކުން ދަނީ ރިޕޯޓު ކުރަމުންނެވެ. އޭނާ މިހާރު ވެސް ވަނީ، އިންތިޚާބު ކާމިޔާބު ކުރައްވަން ބޭނުންފުޅުވާ 50 އިންސައްތައަށް ވުރެ މަތިން ވޯޓު ކާމިޔާބު ކުރައްވާފައެވެ.
ތުރުކީވިލާތުގެ ރިޔާސީ އިންތިޚާބުގެ ދެވަނަ ބުރަކަށް ދާން ޖެހުނީ މޭ 14 ވަނަ ދުވަހު ބޭއްވި އިންތިޚާބުގެ ފުރަތަމަ ބުރުގައި އެއްވެސް ކެނޑިޑޭޓަކަށް 50 އިންސައްތައަށް ވުރެ މަތިން ވޯޓު ނުލިބުމުންނެވެ. ދެވަނަ ބުރުގައި އުރުދުޣާނާ ވާދަކުރައްވާފައި ވަނީ އިދިކޮޅު ހަ ޕާޓީއެއް ހިމެނޭ ކޯލިޝަންގެ ރިޕަބްލިކަން ޕީޕަލްސް ޕާޓީ (ސީ.އެޗް.ޕީ)ގެ ކެނޑިޑޭޓު ކެމާލް ކްލިޗްތަރޯލޯއެވެ.
ދެވަނަ ބުރުގެ ވޯޓުފޮށިތަކުގެ 93 އިންސައްތަ ގުނައި ނިމިފައިވާ ކަމަށް އެ ޤައުމުގެ މީޑިޔާތަކުން ރިޕޯޓު ކުރަމުންދިޔަ ނަމަވެސް، އެ ޤައުމުގެ އިންތިޚާބާ ބެހޭ މައި އިދާރާ – ހައި އިލެކްޝަން ބޯޑުން ބުނީ އަދި މިހާތަނަށް ރަސްމީކޮށް ނަތީޖާ ލިބިފައި ވަނީ 54.6 އިންސައްތަ ވޯޓު ފޮށީގެ ކަމުގައެވެ. އަދި، އެ ވޯޓުފޮށިތަކުން 54.47 އިންސައްތަ ވޯޓާ އެކު ކުރީގައި އުޅުއްވަނީ އުރުދުޣާން ކަމަށް އެ ބޯޑުގެ ވަގުތީ ނަތީޖާ ޝީޓުތަކުން ދައްކައެވެ.
އިންތިޚާބުގައި ކާމިޔާބީ ލިބިވަޑައިގަތުމާ އެކު އުރުދުޣާންގެ ވެރިކަން އިތުރު ފަސް އަހަރުގެ ދައުރަކަށް ދެމިގެންދާނެއެވެ. ތުރުކީވިލާތުގެ ރައީސް ކަމުގެ މަޤާމަށް އޭނާ އެންމެ ފުރަތަމަ ފަހަރަށް އިންތިޚާބުވެ ވަޑައިގަތީ 2014 ވަނަ އަހަރުގެ އޮގަސްޓު މަހުގެ 28 ވަނަ ދުވަހުއެވެ. އަދި، 2003 ވަނަ އަހަރުން ފެށިގެން 2014 ވަނަ އަހަރު ރައީސް ކަމުގެ މަގާމަށް އިންތިޚާބުވެ ވަޑައިގަންނަވަން ދެން އޭނާ ހުންނެވީ ބޮޑުވަޒީރު ކަމުގެ މަގާމުގައެވެ. އޭނާގެ ވެރިކަމުގެ މުއްދަތު 20 އަހަރަށް ދެމިގެން ގޮސްފައިވާއިރު، އިތުރު ފަސް އަހަރުގެ ދައުރެއް ކަށަވަރު ކުރެއްވުން މި އޮތީ ވަރަށް ގާތުގައެވެ.
އުރުދުޣާނަކީ ވީހާވެސް ގިނަ ދުވަހަކު ވެރިކަމުގައި ދެމިހުންނަވަން މަސައްކަތް ކުރައްވަމުން ގެންދަވާ ޚުދުމުހުތާރު ވެރިއެއްގެ ގޮތުގައި އޭނާގެ ވާދަވެރިން ގެންދަނީ ތުހުމަތު ކުރަމުންނެވެ. މި ކަމަށް ބާރުދޭ އެއް ސަބަބަކީ 2017 ވަނަ އަހަރު ފެންނަ ނުފެންނަ ވޯޓެއް ނަގައި، ބޮޑުވަޒީރުގެ މަޤާމު އުވައިލައްވައި، ދަޢުލަތުގެ އެންމެ މަތީ ވެރިޔާގެ މަޤާމާއި މަސްއޫލިއްޔަތުތަކާ އުރުދުޣާން ހަވާލުވެ ވަޑައިގެންނެވުމެވެ.
އުރުދުޣާނަށް ތާޢީދުކުރާ ޢާންމުންނާއި އޭނާގެ ޖަސްޓިސް އެންޑް ޑިވެލޮޕްމެންޓް ޕާޓީ (އޭ.ކޭ. ޕާޓީ)އަށް ނިސްބަތްވާ މެންބަރުން މިހާރު ވެސް ވަނީ މަގުތަކަށް ނިކުމެ، އުފާފާޅުކުރަން ފަށާފައެވެ. ވެރިރަށް އިސްތަންބޫލުގައި ހުންނަ އުރުދުޣާންގެ ގެކޮޅު ކައިރިއަށް އޭނާއަށް ތާޢީދުކުރާ ގިނަ ޢަދަދެއްގެ ބަޔަކު ވަނީ ޖަމާވެފައެވެ.
އިންތިޚާބުގެ ދެވަނަ ބުރުގައި އުރުދުޣާނަށް ކާމިޔާބީ ލިބުމުގެ ފަހަތުގައިވާ އެއް ސަބަބަކީ އިންތިޚާބުގެ ފުރަތަމަ ބުރުގައި ތިންވަނައަށް ދިޔަ ކެނޑިޑޭޓް ސިނާން އޮޣާން އުރުދުޣާނަށް ތާޢީދުކުރައްވަން ނިންމެވުން ކަމުގައި މަސްރަޙު ދިރާސާކުރާ ފަރާތްތަކުން ބުނެއެވެ. އިންތިޚާބުގެ ފުރަތަމަ ބުރުގައި އޭ.ޓީ.އޭ. އެލަޔަންސްގެ ކެނޑިޑޭޓުގެ ގޮތުން ވާދަކުރެއްވި އޮޣާނަށް ލިބިވަޑައިގަތީ 5.2 އިންސައްތައެވެ.