ތުރުކީވިލާތުގެ ރިޔާސީ އިންތިޚާބުގެ ދެވަނަ ބުރުގެ ވޯޓު ގުނަން ފަށައިފިއެވެ. އިންތިޚާބުގެ ދެވަނަ ބުރަކަށް ދާން ޖެހުނީ މޭ 14 ވަނަ ދުވަހު ބޭއްވި އިންތިބުގެ ފުރަތަމަ ބުރުގައި އެއްވެސް ކެނޑިޑޭޓަކަށް 50 އިންސައްތައަށް ވުރެ މަތިން ވޯޓު ނުލިބުމުންނެވެ. ދެވަނަ ބުރުގައި ވާދަކުރައްވަނީ ރިޔާސީ އިތުރު ދައުރަކަށް ކުރިމަތިލައްވާފައިވާ ރައީސް ރަޖަބް ޠައްޔިބް އުރުދުޣާނާއި އިދިކޮޅު ހަ ޕާޓީއެއް ހިމެނޭ ކޯލިޝަންގެ ކެނޑިޑޭޓު ކެމާލް ކްލިޗްތަރޯލޯއެވެ.
އިންތިޚާބުގެ ފުރަތަމަ ބުރުގައި އުރުދުޣާނަށް ލިބިވަޑައިގަތީ 49.5 އިންސައްތައެވެ. ރިޕަބްލިކަން ޕީޕަލްސް ޕާޓީ (ސީ.އެޗް.ޕީ) ގެ ކެނޑިޑޭޓު ކަމުގައިވާ ކްލިޗްތަރޯލޯއަށް ކާމިޔާބު ކުރެވުނީ 44.89 އިންސައްތައެވެ. އޭނާއަކީ ހަ ޕާޓީ މައްޗަށް އެކުލެވިގެންވާ ނޭޝަނަލް އެލަޔަންސްގެ ކެނޑިޑޭޓެވެ. އިންތިޚާބުގެ ދެވަނަ ބުރުގެ ވޯޓުލުން ފެށިގެން ކުރިއަށްދާއިރު، ދެ ކެނޑިޑޭޓުން ވެސް މިހާރު ވަނީ ވޯޓު ލައްވާފައެވެ.
ދެވަނަ ބުރުގައި އުރުދުޣާން ކުރި ހޯއްދަވައި، ރިޔާސީ އިތުރު ދައުރަކަށް އިންތިޚާބުވެ ވަޑައިގަންނަވާނެ ކަމަށް މަސްރަޙު ދިރާސާކުރާ ފަރާތްތަކުން ގަބޫލުކުރެއެވެ. އެއް ސަބަބަކީ، އިންތިޚާބުގެ ފުރަތަމަ ބުރުގައި ތިންވަނައަށް ދިޔަ ކެނޑިޑޭޓް ސިނާން އޮޣާން އުރުދުޣާނަށް ތާޢީދުކުރައްވަން ނިންމެވުމެވެ. އިންތިޚާބުގެ ފުރަތަމަ ބުރުގައި އޭ.ޓީ.އޭ. އެލަޔަންސްގެ ކެނޑިޑޭޓުގެ ގޮތުން ވާދަކުރެއްވި އޮޢާނަށް ލިބިވަޑައިގަތީ 5.2 އިންސައްތައެވެ. އޮޣާންގެ މި ނިންމެވުމާއެކު، ކްލިޗްތަރޯލޯގެ ކެމްޕޭން ޓީމަށް ވަނީ ނުތަނަވަސްކަމާ ކުރިމަތިވެފައެވެ.
އުރުދުޣާނަކީ ވީހާވެސް ގިނަ ދުވަހަކު ވެރިކަމުގައި ދެމިހުންނަވަން މަސައްކަތް ކުރައްވަމުން ގެންދަވާ ޚުދުމުހުތާރު ވެރިއެއްގެ ގޮތުގައި އޭނާގެ ވާދަވެރިން ގެންދަނީ ތުހުމަތު ކުރަމުންނެވެ. މި ކަމަށް ބާރުދޭ އެއް ސަބަބަކީ 2017 ވަނަ އަހަރު ފެންނަ ނުފެންނަ ވޯޓެއް ނަގައި، ބޮޑުވަޒީރުގެ މަޤާމު އުވައިލާ، ދަޢުލަތުގެ އެންމެ މަތީ ވެރިޔާގެ މަޤާމާއި މަސްއޫލިއްޔަތުތަކާ އުރުދުޣާން ހަވާލުވެ ވަޑައިގެންނެވުމެވެ. މި އިންތިޚާބުގައި އުރުދުޣާންގެ ކެމްޕޭންގައި އެންމެ ބޮޑަށް ކުރިއަރުވާފައި ވަނީ ތުރުކީގެ އިޤްތިޞާދާއި، ސަލާމަތާއި، ދާޚިލީ އަދި ބައިނަލްއަޤުވާމީ މަސްރަޙުގައި އެ ޤައުމުން ކުޅޭ ދައުރު ފުޅާ ކުރުމެވެ.
ތުރުކީވިލާތުގެ ވެރިކަމާ އުރުދުޣާން ހަވާލުވެ ވަޑައިގަތީ މީގެ 20 އަހަރު ކުރިންނެވެ. އިންތިޚާބުގެ ފުރަތަމަ ބުރުގައި އޭނާ ވަނީ ގިނަ ޢަދަދެއްގެ ވޯޓު ކަށަވަރު ކުރައްވާފައެވެ. މޭ 14 ވަނަ ދުވަހު ބޭއްވި ރިޔާސީ އިންތިޚާބާ އެކުއެކީގައި އޮތް ޢާންމު އިންތިޚާބުގައި އޭނާގެ ޖަސްޓިސް އެންޑް ޑިވެލޮޕްމެންޓް ޕާޓީ (އޭ.ކޭ. ޕާޓީ)އަށް ވަނީ ކޮންމެ ވެސް ވަރެއްގެ ނުތަނަވަސްކަމެއް ކުރިމަތިވެފައެވެ. އެ އިންތިޚާބުގައި އެ ޕާޓީއަށް ވޯޓު ލިބިފައި ވަނީ، 2018 ވަނަ އަހަރުގެ ޢާންމު އިންތިޚާބާ އަޅައިބަލާއިރު ހަތެއް އިންސައްތަ މަދުންންނެވެ. 2018 ވަނަ އަހަރު އެ ޕާޓީން ވަނީ 42.6 އިންސައްތަ ކާމިޔާބުކޮށްފައެވެ.
މި އަހަރު ބޭއްވި ޢާންމު އިންތިޚާބުގައި ކުރި ހޯދާފައި ވަނީ އުރުދުޣާންގެ އޭ.ކޭ. ޕާޓީންނެވެ. އަދި، އެ ޕާޓީއާ އިއްތިހާދުވެފައިވާ ނޭޝަނަލިސްޓް މޫވްމަންޓް ޕާޓީ (އެން.އެޗް.ޕީ)އިން ވަނީ 10 އިންސައްތަ ވޯޓު ކާމިޔާބު ކޮށްފައެވެ.
ރިޔާސީ އިތުރު ދައުރެއް ހޯއްދެވުމަށް ކުރިމަތިލައްވާފައިވާ އުމުރުފުޅުން 69 އަހަރުގެ އުރުދުޣާނަކީ ދޫހެލޭ ބޭފުޅެކެވެ. އަދި، ކެމްޕޭން ކުރުމުގެ އުކުޅުތައް ވަރަށް ފުރިހަމައަށް ދެނެވަޑައިގަންނަވާ، ވިސްނުންތެރި، ތޫނުފިލި ބޭފުޅެކެވެ. 2016 ވަނަ އަހަރު އޭނާގެ ސަރުކާރު ބަޣާވާތަކުން ވައްޓައިލަން ކުރި މަސައްކަތްތައް އޭނާ ވަނީ ނާކާމިޔާބު ކޮށްލައްވާފައެވެ. އަދި، އޭނާއާއި އޭނާގެ ސަރުކާރުގެ އިސްވެރިންނާ ދެކޮޅަށް ކޮރަޕްޝަންގެ ގިނަ ތުހުމަތުތަކެއް ކޮށްފައިވީ ނަމަވެސް، އެ ދަޢުވާތައް ކާމިޔާބުވެފައެއް ނުވެއެވެ.
އޭނާއާ ވާދަކުރައްވާ 74 އަހަރުގެ ކްލިޗްތަރޯލޯއަކީ ކުރިން ސަރުކާރުގައި ސިވިލް ސަރވެންޓެއްގެ ގޮތުގައި މަސައްކަތް ކުރައްވާފައިވާ ބޭފުޅެކެވެ. އުރުދުޣާންގެ އިޤްތިޞާދީ ސިޔާސަތުތަކާއި، ހަރުކަށި ގޮތްތައް ދޫކޮށްލައްވާނެ ކަމުގައި އޭނާ ގެންދަވަނީ ވިދާޅުވަމުންނެވެ. އަދި، ވެރިކަމުގެ ނިޒާމު ބަރުލަމާނީ ނިޒާމަކަށް ބަދަލު ކުރުމަކީ ވެސް އޭނާގެ ވަޢުދެކެވެ. އަދި، ޝަރުޢީ ދާއިރާ މިނިވަން ކުރަން ވެސް އޭނާ ވަނީ ވަޢުދުވެ ވަޑައިގަންނަވާފައެވެ.