ކާވާ ވިމެންސް ޗެލެންޖް ކަޕް: ރޭންކިންގެ ފަހު މެޗުގައި ބަންގްލަދޭޝް އަތުން ރާއްޖެއަށް މޮޅެއް

ނޭޕާލުގައި ކުރިއަށްދާ ކާވާ ވިމެންސް ވޮލީބޯލް ޗެލެންޖް ކަޕް 2023 ގެ ރޭންކިންގެ ފަހު މެޗުގައި ރާއްޖެއިން ބަންގްލަދޭޝް ބަލިކޮށްފިއެވެ.

މި މުބާރާތުގެ ގްރޫޕް ސްޓޭޖުގައި ރާއްޖެއިން ކުޅުނު ހުރިހާ މެޗަކުން ވަނީ ބަލިވެފައެވެ. އެހެންވެ ރޭންކިން މެޗުތައް ކުޅެން ޖެހުނުއިރު، ރޭންކިންގެ ފުރަތަމަ މެޗުގައި ރާއްޖެއިން ނުކުތީ ކިރްގިސްތާނާ ދެކޮޅަށެވެ. އެ މެޗުން ރާއްޖެ ވަނީ ސީދާ ތިން ސެޓުން ބަލިވެފައެވެ.

މި މުބާރާތުގެ ރޭންކިންގެ ފަހު މެޗުގައި ރާއްޖެއިން މިއަދު މެންދުރުފަހު ނުކުތީ ބަންގްލަދޭޝްއާ ދެކޮޅަށެވެ. އެ މެޗު 3-1 ސެޓުން ރާއްޖެއިން ވަނީ ކާމިޔާބުކޮށްފައެވެ. މި މެޗުގެ ސެޓުތައް ދިޔައީ، 25-21، 25-14، 25-23 އަދި 25-15 އިންނެވެ.

މި މޮޅާއެކު 8 ގައުމު ވާދަކުރި ސެންޓްރަލް ޒޯން ވޮލީބޯޅަ މުބާރާތް ރާއްޖެ ނިންމާލީ ހަތްވަނައިގައެވެ. މީގެ ކުރިން 2019 ވަނަ އަހަރު ރާއްޖެއިން ވަނީ މި މުބާރާތުގެ ރިހި މެޑަލް ހޯދައިފައެވެ. އެކަމަކު 2021 ވަނަ އަހަރުގެ މުބާރާތް ރާއްޖެ ނިންމާލީ ހުރިހާ މެޗަކުން ބަލިވެގެންނެވެ.

ރާއްޖެއިން ވަނީ މިއަހަރު ކުރީކޮޅު އަމިއްލަ ގައުމުގައި ބޭއްވި ފޯ ނޭޝަންސް ކަޕުގައި ރިހި މެޑަލް ހޯދާފައެވެ.