އައިކެއަރއިން ކުޑަކުދިންގެ ހިޔާއަށް ބޭނުންވާ ބައެއް ސާމާނު ހަދިޔާކޮށްފިއެވެ. މިއީ އެ ކުންފުނީގެ 20 ވަނަ އަހަރީ ދުވަހާ ގުޅުވައިގެން ކުންފުނީގެ އިޖްތިމާޢީ ޒިންމާގެ ދަށުން ހަދިޔާކުރި ތަކެއްޗެވެ.
އައިކެއަރއިން ހަދިޔާކުރީ ފިޔަވައްޗަށް ބޭނުންވާ ބައެއް ފަރުނީޗަރެވެ.
މި ތަކެތީގެ ރަމްޒީ އެހީ ފިޔަވައްޗާ ޙަވާލުކޮށްދެއްވީ އައިކެއަރގެ އެޑްމިނިސްޓްރޭޓަރ ޢާމިނަތު އީނާސްއެވެ. މިއެހީއާ ފިޔަވަތީގެ ފަރާތުން ހަވާލުވެވަޑައިގަތީ ފިޔަވަތީގެ ސީއީއޯ ޒީނާ ޤާސިމެވެ.
އައިކެއަރއިން އަބަދުވެސް މަސައްކަތްކުރަނީ، މުޖުތަަމަޢަށް ފައިދާވާނެ ކޮންމެވެސް ކަމަކަށް އެހީވުމަށްކަމަށް އެކުންފުނިން ބުނެއެވެ. މިދިޔަ އަހަރު އިޖްތިމާޢީ ޒިންމާގެ ދަށުން އެކުންފުނީގެ ވަނީ، ޙާލުގައި ދިރިއުޅެމުންދާ އާއިލާތަކަށް "މަމްސް އެންޖީއޯ"ގެ އެހީއާއެކު ތަކެތި ހަދިޔާކޮށްފައެވެ.
ފިޔަވަތީގައި ބަލަހައްޓަނީ، އެކިސަބަބުތަކާ ހުރެ ދައުލަތުގެ ބެލުމުގެ ދަށަށް ނަގާ ކުދިންނެވެ. ހުޅުމާލޭގައި ހުންނަ ފިޔަވަތީގައި މިހާރުވެސް 80 އަށްވުރެ ގިނަ ކުދިން އަންނަނީ ބަލަހައްޓަމުންނެވެ. މީގެތެރޭގައި އުމުރުން 5އަހަރުން ދަށުގެ ސާޅީހަކަށް ކުދިން އެބަތިއްބެވެ. ފިޔަވަތީގައި ބަލަހައްޓާނީ އުމުރުން 12 އަހަރުން ދަށުގެ ކުދިންނެވެ.