ޓެކްސްއާގުޅޭ މުހިއްމު އެއްބަސްވުމެއްގައި ދިވެހިރާއްޖެއާއި މެލޭޝިޔާއިން ސޮއިކޮށްފިއެވެ.
މި އެއްބަސްވުމުގައި ސޮއިކުރައްވާފައިވަނީ ފިނޭންސް މިނިސްޓަރ އިބްރާހިމް އަމީރު މެލޭޝިޔާއަށް މިހާރު ކުރައްވަމުން ގެންދަވާ ދަތުރުފުޅުގެ ތެރެއިންނެވެ.
މެލޭޝިޔާ ސަރުކާރާއި ދިވެހި ސަރުކާރާއި ދެމެދު ސޮއިކުރީ ޓެކްސް އެވޮއިޑަންސް އެގްރިމަންޓެއްގައެވެ. މިއީ ދެޤައުމުގެ ދެމެދު ކުރެވޭ ވިޔަފާރި މުއާމަލާތްތަކުން އެއް އާމްދަނީއަކުން ދެފަހަރު ޓެކްސް ކުރުން ހުއްޓުވައި، ޓެކުހާއިގުޅޭ މައުލޫމާތުތައް ބަދަލުކުރުމަށް މަގުފަހިކުރާ އެއްބަސްވުމެކެވެ. މީގެއިތުރުން ޓެކްސްއަށް މަކަރު ހެދުން ހުއްޓުވުމަކީވެސް މި އެއްބަސްވުމުން ހާސިލުވާނެ މަޤްޞަދެކެވެ.
Maldives signs a Double Tax Avoidance Agreement with Malaysia. The Agreement aims to enhance taxpayer certainty and avoid double taxation of income from residents of both countries. 1/2 pic.twitter.com/11aO1aO6sE
— Ministry of Finance (@MoFmv) May 24, 2023
ޓެކްސްއާ ގުޅޭ މައްސަލަތައް ހައްލުކުރުމުގެ އިތުރުން، މި އެއްބަސްވުމުގެ ސަބަބުން ދެ ޤައުމުގެ ދެމެދުގައި އިޤްތިޞާދީ ގުޅުންވެސް އިތުރަށް ބަދަހިވެގެންދާނޭކަމަށް ސަރުކާރުން ވިދާޅުވެއެވެ.
މި އެއްބަސްވުމުގައި ދިވެހި ސަރުކާރުގެ ފަރާތުން ސޮއިކުރެއްވީ ފިނޭންސް މިނިސްޓަރ އިބްރާހިމް އަމީރެވެ. މެލޭޝިޔާ ސަރުކާރުގެ ފަރާތުން ސޮއިކުރެއްވީ ޑެޕިއުޓީ ފިނޭންސް މިނިސްޓަރ އަހުމަދު މަސްލަންއެވެ. މިއީ ރާއްޖެއިން ސޮއިކުރި ޓެކްސް އެވޮއިޑަންސްއާ ގުޅޭ 3 ވަނަ އެއްބަސްވުމެވެ. އަދި އިތުރު ޤައުމުތަކާއެކު މިފަދަ އެއްބަސްވުންތައް ޤާއިމްކުރުމަށް ސަރުކާރުން ދަނީ މަސައްކަތްކުރަމުންނެވެ.