ކުރީގެ ރައީސް މައުމޫން އަބްދުލްގައްޔޫމް އިސްކޮށް ހުންނަވައިގެން އުފެއްދި މޯލްޑިވްސް ރީފޯމް މޫވްމަންޓް، އެމްއާރުއެމް އުވާލަން އިލެކްޝަންސް ކޮމިޝަން އީސީން ނިންމައިފިއެވެ.
އެމްއާރުއެމް އުވާލަން އީސީން ނިންމީ ސިޔާސީ ޕާޓީތަކުގެ ގާނޫނުގައި ބުނާ 3000 މެމްބަރުން ހަމަނުވެގެން ދެ ވަނަ ނޯޓިސްއެއް ދިނުމަށްފަހުއެވެ.
މެމްބަރުން ހަމަނުވެގެން މިދިޔަ ފެބުރުއަރީމަހުގެ ތެރޭގައި އެމްއާރުއެމްއަށް ދިން ދެވަނަ ނޯޓިސްގެ މުއްދަތު މިދިޔަ ބުދަ ދުވަހު ވަނީ ހަމަވެފައެވެ.
މެންބަރުން ހަމަކުރުމަށް ދެވުނު 3 މަސްދުވަހުގެ މުއްދަތުގައި 3000 މެންބަރުން ހަމަވެފައި ނުވާތީ މޯލްޑިވްސް ރިފޯމް މޫވްމަންޓް (MRM)އުވާލުމަށާ މިއަދުން ފެށިގެން އެއްވެސް ސިޔާސީ ހަރަކާތެއް ނުހިންގުމަށް އެޕާޓީއަށް އެންގުމަށް ކޮމިޝަނުން މިއަދު ނިންމައިފި
— Elections Commission (@ElectionsMv) May 24, 2023
ގާނޫނުގައި ބުނާ އަދަދު ހަމަނުވެއްޖެނަމަ ކޮމިޝަނުގެ ޖަލްސާއެއް ބާއްވައި ޕާޓީ އުވާލެވޭނެ ކަމަށް ގާނޫނުގައިވެއެވެ. އިލެކްޝަންސް ކޮމިޝަނުން ވިދާޅުވީ މެންބަރުން ހަމަކުރުމަށް ދެވުނު 3 މަސްދުވަހުގެ މުއްދަތުގައި 3000 މެންބަރުން ހަމަވެފައި ނުވާތީ މޯލްޑިވްސް ރިފޯމް މޫވްމަންޓް އުވާލުމަށާއި މިއަދުން ފެށިގެން އެއްވެސް ސިޔާސީ ހަރަކާތެއް ނުހިންގުމަށް އެޕާޓީއަށް އެންގުމަށް ކޮމިޝަނުން މިއަދު ނިންމާފައިވާކަމަށެވެ.
އިލެކްޝަންސް ކޮމިޝަނުން އެމްއާރުއެމް އުވާލަން ނިންމުމާއި ގުޅިގެން އެ ޕާޓީގެ ވެރިން ވަނީ އެކަމާއި ކަންބޮޑުވުން ފާޅުކޮށްފައެވެ. ޕާޓީގެ ޒައީމް މައުމޫންއާއި ޕާޓީގެ ރައީސް ފާރިސް ވަނީ މިއީ ޤާނޫނާއި ހިލާފު ނިންމެވުމެއްކަމަށް ވިދާޅުވެ، އެ ނިންމެވުމާއި ދެކޮޅަށް މަސައްކަތްކުރައްވާނެކަމަށް ވިދާޅުވެފައެވެ.