ޕާކު ކޮށްފައި އޮތް ވޭނެއްގެ ތެރެއިން ގިނަ އަދަދެއްގެ ފައިސާ ހުރި ވޮލެޓެއް ނަގައިގެން ފިލަން މަސައްކަތް ކުރި މީހަކު ފުލުހުންގެ ބެލުމުގެ ދަށަށް ގެންގޮސްފިއެވެ.
މިމައްސަލައިގައި ފުލުހުންގެ ބެލުމުގެ ދަށަށް ގެންގޮސްފައި ވަނީ 26 އަހަރުގެ ދިވެހި ފިރިހެނެއް ކަމަށް ފުލުހުން ވިދާޅުވެއެވެ. އޭނާ ފުލުހުންގެ ބެލުމުގެ ދަށަށް ގެންގޮސްފައި ވަނީ މިދިޔަ ބުރާސްފަތި ދުވަހު 11:10 ހާއިރު ތީފަރިދޫ މާޓު ކައިރީގައި ޕާކުކޮށްފައި އޮތް ވޭނެއްގެ ތެރެއިން ގިނަ އަދަދެއްގެ ފައިސާ ހުރި ވޮލެޓެއް ވަގަށް ނެގުމަށް ފަހު ފިލަން ދުވަނިކޮށް ކަމަށް ފުލުހުން ވިދާޅުވެއެވެ. ފުލުހުން އެ ސަރަޙައްދަށް ދިޔައިރު އާންމުން އޭނާ ހިފަހައްޓާފައިވާ ކަމަށް ފުލުހުން ވިދާޅުވެއެވެ.
މި ހާދިސާ ހިނގުމުން ފުލުހުން ގޮސް ބަލައި ފާސްކުރިއިރު އޭނާގެ ޖީބުގައި އޮތް ވޮލެޓު ތެރޭގައި 17،000 އަށްވުރެ ގިނަ ދިވެހި ރުފިޔާއާއި 700 އަށްވުރެ ގިނަ އެމެރިކާ ޑޮލަރާއި ބަންގްލަދޭޝް ފައިސާގެ 100 ޓާކާ އާއި 5 ޔޫރޯ ހުރި ކަމަށް ފުލުހުން ވިދާޅުވެއެވެ. މިމައްސަލައިގައި ފުލުހުންގެ ބެލުމުގެ ދަށަށް ގެނައި މީހާއަކީ ވައްކަން ކުރުމާއި މަސްތުވާތަކެތި ބޭނުން ކުރުމުގެ ކުށުގެ ރެކޯޑު އޮންނަ މީހެއް ކަމަށް ފުލުހުން މަޢުލޫމާތުދެއްވައެވެ.