އެމެރިކާއިން ޔޫކްރެއިނަށް އަސްކަރީ އެހީގެ އިތުރު ޕެކޭޖެއް ފޮނުވަން ނިންމައިފިއެވެ. މި ކަން އިޢުލާނު ކުރައްވާފައި ވަނީ ރައީސް ޖޯ ބައިޑަން ޔޫކްރެއިންގެ ރައީސް ވޮލޮޑޮމީރް ޒެލެންސްކީއާ އެކު ބޭއްވެވި ބައްދަލުވުމެއްގައެވެ. އެ ދެ ބޭފުޅުން ބައްދަލުކުރައްވާފައި ވަނީ ޖަޕާނުގެ ހިރޮޝީމާގައި ބޭއްވި އިޤުތިޞާދީ ގޮތުން އެންމެ ކުރިއަރާފައިވާ ގްރޫޕް އޮފް ސެވަން (ޖީ7)ގެ ޤައުމުތަކުގެ ސަމިޓުގެ ހަވާސާގައެވެ.
ބައިޑަން ވިދާޅުވީ ޔޫކްރެއިނަށް ފޮނުވަން ނިންމާފައިވާ އަސްކަރީ އެހީގެ ޕެކޭޖުގައި ވަޒަނާއި، އާޓިލަރީ ބަޑިއާއި ޝެލްގެ އިތުރުން ސިފައިން އުފުލާ އުޅަނދުފަހަރު ހިމެނޭނެ ކަމުގައެވެ. ޔޫކްރެއިނަށް އިތުރު ހަތިޔާރު ފޯރުކޮށްދޭން ނިންމާފައިވާ ކަން އިޢުލާނު ކުރުމުގެ އެއް ދުވަސް ކުރިން އޭނާ ވަނީ އެމެރިކާގައި އުފައްދާ "އެފް-16" މަރުކާގެ އަސްކަރީ މަތިންދާބޯޓު ޔޫކްރެއިނަށް ފޮނުވުމުގެ ހުއްދަ ވެސް ނޭޓޯގެ ޤައުމުތަކަށް ދެއްވާފައެވެ.
ޒެލެންސްކީގެ އިސް މުޝީރެއް ކަމުގައިވާ އެންޑްރީ ޔަރްމެކް ވިދާޅުވީ، އެމެރިކާއިން ފޯރުކޮށްދޭ އަސްކަރީ އެހީގެ ޕެކޭޖުގައި ހައިމާސް ރޮކެޓް ލޯންޗަރާއި، އާޓިލަރީ ޝެލްގެ އިތުރުން އަސްކަރީ ޓޭންކުފަހަރަށް ޙަމަލާދޭން ބޭނުންކުރާ ގައިޑެޑް މިސައިލާއި، ތަރމަލް އިމެޖިންގް ސިސްޓަމްތައް ހިމެނޭނެ ކަމުގައެވެ. އަދި، މި ޕެކޭޖުގެ އަގު 375 މިލިޔަން އެމެރިކާ ޑޮލަރަށް އަރާނެ ކަމުގައި ވެސް އޭނާ ވިދާޅުވިއެވެ.
ޖީ7ގެ ބައްދަލުވުމުގައި ބައިވެރިވެ ވަޑައިގަތުމަށް ޒެލެންސްކީ ޖަޕާނަށް ކުރެއްވި ދަތުރުފުޅުގައި، އެ ސަމިޓުގައި ބައިވެރިވެ ވަޑައިގެންނެވި އެހެން ޤައުމުތަކުގެ އިސްވެރިންނާ ވަނީ ބައްދަލުކުރައްވާފައެވެ. ޖީ7ގައި ހިމެނެނީ އެމެރިކާ، ޖަޕާން، ޖަރުމަނުވިލާތް، އިނގިރޭސިވިލާތް، ފަރަންސޭސިވިލާތް، ކެނެޑާ އަދި އިޓަލީވިލާތެވެ. އޭގެ އިތުރުން މި އަހަރުގެ ސަމިޓުގައި އޮސްޓްރޭލިޔާ، ބްރެޒިލް، ކޮމޮރޯސް، ކުކް އައިލެންޑްސް، އިންޑިޔާ އަދި އިންޑޮނީޝިޔާގެ އިތުރުން ދެކުނު ކޮރެޔާއާއި ވިއެޓްނާމްގެ އިސްވެރިން ވެސް ބައިވެރިވެ ވަޑައިގެންނެވިއެވެ.
"ޒެލެންސްކީގެ ވޭން އަޅުގަނޑަށް އިހުސާސް ކުރެވޭ. ޔޫކްރެއިން ރައްޔިތުންގެ ވޭން އަޅުގަނޑަށް އިހުސާސް ކުރެވޭ. މި ހަނގުރާމަ ނިމުމަކަށް ގެންނަން އިންޑިޔާއަށް ކުރެވެން އޮތް ހުރިހާ މަސައްކަތެއް ކުރާނަން. އަޅުގަނޑަށް ކުރެވެން އޮތް ހުރިހާ މަސައްކަތެއް ވެސް އަޅުގަނޑު ކުރާނަން،" ސަމިޓުގެ ހަވާސާގައި ޒެލެންސްކީއާ ބައްދަލުކުރައްވައި އިންޑިޔާގެ ބޮޑުވަޒީރު ނަރެންދްރަ މޯދީ ވިދާޅުވިއެވެ.
މި އަހަރުގެ ސަމިޓުގެ އެޖެންޑާގައި އެންމެ ކުރީގައި އޮތީ ރަޝިޔާއިން ޔޫކްރެއިނަށް އަރައި ކުރަމުންދާ ހަނގުރާމަ ހުއްޓުމަކަށް ގެނައުމަށް މަސައްކަތް ކުރުމެވެ. އަދި، ރަޝިޔާގެ އިސްތިއުމާރީ ސިފައިންގެ އަތްދަށުން މިނިވަންކަން ހޯދުމަށް ޔޫކްރެއިނުން ކުރަމުންދާ ހަނގުރާމައިގައި އެ ޤައުމަށް އެހީތެރިކަން ފޯރުކޮށްދިނުމެވެ. މި ކަމުގައި އެއްބާރުލުން ދޭން ޖީ7ގެ ޤައުމުތަކާއި، ބައްދަލުވުމުގެ އެހެން ބައިވެރިން ވަނީ އެއްބަސްވެފައެވެ.
ޒެލެންސްކީ ޖަޕާނުގައި ހުންނެވި ދަނޑިވަޅުގައި ރަޝިޔާގެ ފައުޖުތަކުން ވަނީ ޔޫކްރެއިނުގެ އިރުމަތީގައިވާ ބަޚްމުތް ހިފާފައެވެ. ބަޚްމުތަކީ އެ ޤައުމުގެ އިރުމަތީގައި އޮންނަ ދޮންބާސް ސަރަޙައްދުގެ ދެ ސަރަޙައްދުގެ ތެރެއިން ޑޮނެޓްސްކުގައި އޮންނަ ރަށެކެވެ. އެ ރަށް ހިފުމަކީ، ފާއިތުވި 10 ވަރަކަށް މަހުގެ ތެރޭގައި ރަޝިޔާގެ ސިފައިންނަށް ލިބިފައިވާ އެންމެ ބޮޑު ކާމިޔާބީއެވެ.
އެ ރަށް ހިފުމަށް ކުރަމުންދިޔަ ދިގު ހަނގުރާމައިގެ ކުރީ ސަފަށް ރަޝިޔާއިން ފޮނުވާފައި ވަނީ ވެގްނަރ ގުރޫޕުގެ ކުލީ ސިފައިންނެވެ. އެ ރަށް ހިފުމުގައި ބައިވެރިވި ވެގްނަރގެ ކުލީ ސިފައިންނާއި ރަޝިޔާގެ އަސްކަރިއްޔާގެ ސިފައިންނަށް ރައީސް ވްލަޑިމިޔަރ ޕުޓިން ވަނީ މަރުޙަބާ ވިދާޅުވެފައެވެ. "ބަޚްމުތެއް ނެތް. އެ ރަށް އޮތީ ސުންނާފަތިކޮށްލާފައި. އެ ރަށް މިހާރު އޮތީ އަޅުގަނޑުމެންގެ ހިތުގައި އެކަނި،" ރަޝިޔާއިން ބަޚްމުތް ހިފާފައިވާ ކަން އިޢުލާނު ކުރުމާ ގުޅިގެން ޒެލެންސްކީ ވިދާޅުވިއެވެ.
ޔޫކްރެއިނަށް އެފް-16 މަރުކާގެ ޒަމާނީ އަސްކަރީ މަތިންދާބޯޓު ފޯރުކޮށްދޭން އެމެރިކާއިން ނިންމުމާ ގުޅިގެން ރަޝިޔާއިން ވަނީ އެ ކަމަށް ފާޑުކިޔާފައެވެ. ރަޝިޔާއިން އެމެރިކާއަށް ކަނޑައަޅާފައި ހުންނަވާ ސަފީރު އެނެޓޮލީ އެންޓޮނޮފް ވިދާޅުވީ، މިއީ ނޭޓޯއިން މި ހަނގުރާމައިގައި އަމަލީ ގޮތުން ބައިވެރިވުމުގެ ގޮތުން ރަޝިޔާއިން ދެކޭނެ ކަމުގައެވެ. އަދި، މި ނިންމުމާ ބައްދަލު ރައްދެއް ދޭނެ ކަމުގެ އިންޒާރު ވެސް ރަޝިޔާއިން ވަނީ ދީފައެވެ.
ރަޝިޔާ-ޔޫކްރެއިން ހަނގުރާމައަށް 15 މަސް ފުރުމާ ގާތްވެފައިވާއިރު، ރަޝިޔާގެ ސިފައިން ވަނީ ޔޫކްރެއިނުގެ ބައެއް ސަރަޙައްދުތަކަށް އަތްގަދަކޮށްފައެވެ. އޭގެ ތެރޭގައި އެ ޤައުމުގެ އިރުމަތީގައިވާ ދޮންބާސް ސަރަޙައްދުގެ ލުހާންސްކާއި ޑޮނެޓްސްކުގެ އިތުރުން ދެކުނުގައިވާ ޒަޕޮރީޜިޔާ ހިމެނެއެވެ. އަދި، އެންމެ ދެކުނުން އޮންނަ ކްރައިމިޔާއަކީ 2014 ވަނަ އަހަރު ރަޝިޔާއިން އަތްގަދަކޮށްފައިވާ ސަރަޙައްދެކެވެ.