ޔަހޫދީ އިސްރާޢީލުގެ ޖައްބާރު ސިފައިން ހުޅަނގު އައްސޭރީގެ ނާބުލުސްއަށް އަރައި ހިންގި ލާއިންސާނީ އުދުވާންތަކެއްގައި ފަލަސްޠީނުގެ ތިން މީހުން ޝަހީދުކޮށްލައިފިއެވެ. ނާބުލުސްގެ އުތުރުގައި އޮންނަ ބަލާތާ ރެފިއުޖީ ކޭމްޕަށް ޔަހޫދީ ސިފައިން އަރާފައި ވަނީ ދަންވަރުގެ ވަގުތުގައެވެ. އެ ތަނަށް ވަދެ ހިންގި އުދުވާންތަކުގައި އިތުރު ހަތް މީހުން ވަނީ ޒަޚަމުކޮށްލާފައެވެ.
ބަލާތާ ރެފިއުޖީ ކޭމްޕަށް ވަނުމުގެ ކުރިން ޔަހޫދީ އިސްރާޢީލުގެ ޓެރެރިސްޓު ސިފައިން ވަނީ އެ ތަން ވަށައިލާ، ބަންދުކޮށްފައެވެ. ކޭމްޕުގައި ހިންގި އުދުވާންތަކުގައި ޝަހީދުކޮށްލާފައި ވަނީ އުމުރުން 24 އަހަރުގެ ޢަބްދުالله އަބޫ ޙަމްދާނާއި، 30 އަހަރުގެ ފާތީ އަބޫ ރިޒްކުގެ އިތުރުން 32 އަހަރުގެ މުޙައްމަދު އަބޫ ޒައިޠޫން ކަމުގައި ފަލަސްޠީނުގެ ޞިއްޙަތާ ބެހޭ ވުޒާރާއިން ބުނެއެވެ.
ޔަހޫދީ ޖައްބާރު ސިފައިން ހިންގި އުދުވާންތަކުގައި ޒަޚަމުކޮށްލާފައިވާ މީހުންގެ ތެރެއިން ހަތަރު މީހެއްގެ ހަށިގަނޑަށް ވަނީ ވަޒަން އަރާފައެވެ. އެ މީހުންނަށް މިހާރު ދަނީ ފަރުވާ ދެމުންނެވެ. އަދި، ގިނަ ޢަދަދެއްގެ ބަޔަކަށް ވަނީ ކަރުނަ ގޭހުގެ އަސަރުކޮށްގެން ފަރުވާދޭން ޖެހިފައެވެ.
ފަލަސްޠީން ސަރުކާރުގެ ތަރުޖަމާނު ނަބީލް އަބޫ ރުދައިނާ މި އުދުވާންތައް ސިފަ ކުރައްވާފައި ވަނީ ގަތުލްޢާންމެއްގެ ގޮތުގައެވެ. "ނާބުލުސްއަށް އަރައި އެ ރަށުގެ އަވަށްތަކާއި ރެފިއުޖީ ކޭމްޕުތަކަށް ޔަހޫދީ އަސްކަރިއްޔާއިން އަރައި ހިންގާފައި ވަނީ ހަނގުރާމައިގެ ކުށްތަކެއް. ލާއިންސާނީ ޖަރީމާތަކެއް. މި ލޭއޮހޮރުވުންތަކަށް ނިމުމެއް ގެންނަންޖެހޭ. ޔަހޫދީ ސިފައިން މި ފަދަ ލާއިންސާނީ އަމަލުތައް ހިންގަމުންދާއިރު އެމެރިކާއިން ހަނުހުރުމަކީ އެ މީހުންނަށް ލިބޭ ހިތްވަރެއް،" ރުދައިނާ ވިދާޅުވިއެވެ.
ދަންވަރު 1 ޖެހިއިރު ބަލާތާ ރެފިއުޖީ ކޭމްޕަށް އެރި ޔަހޫދީ ޓެރެރިސްޓު ސިފައިން އެ ތަނުން ފައިބާފައި ވަނީ ފަތިހު 5 ޖެހި ފަހުންނެވެ. އެ މީހުން ބަލާތާ ރެފިއުޖީ ކޭމްޕަށް ވަނީ ބުލްޑޯޒަރުތަކާއި ބަރު ހަތިޔާރު ހިފައިގެންނެވެ. އަދި، ފަލަސްޠީނުގެ ރައްޔިތުން ދިރިއުޅޭ ހަތް ގެއެއް އެ މީހުން ވަނީ ސުންނާފަތިކޮށް، ބިމާ ހަމަކޮށްލާފައެވެ.
"ޔަހޫދީ ސިފައިން ވަނީ އެ މީހުންގެ ޙަމަލާތަކުގައި ޒަޚަމުވި މީހުންނަށް ފަރުވާދޭން މަސައްކަތްކުރި ރެޑް ކްރެސެންޓުގެ ޓީމުތަކަށް ވެސް ހުރަސްއަޅާފައި. އެ ސަރަޙައްދަށް ދާން މަސައްކަތް ކުރި އެމްބިޔުލާންސްތަކަށް ވެސް ޔަހޫދީ ސިފައިން ވަނީ ހުއްޓުވާފައި،" ފަލަސްޠީނުގެ ޞިއްޙަތާ ބެހޭ ވަޒީރު މާއީ އަލް-ކައިލާ ވިދާޅުވިއެވެ.
ބަލާތާ ރެފިއުޖީ ކޭމްޕަކީ ހުޅަނގު އައްސޭރީގައި އޮންނަ އެންމެ ގިނަ ޢަދަދެއްގެ ރެފިއުޖީން ދިރިއުޅޭ ކޭމްޕެވެ. 24 ހެކްޓަރުގެ ސަރަޙައްދެއްގައި ހަދާފައިވާ އެ ކޭމްޕުގައި ފަލަސްޠީނުގެ 30,000 އަށްވުރެ ގިނަ މީހުން ދިރިއުޅެއެވެ. އެ ތަނަށް އަރައި އުދުވާންތައް ހިންގުމުގެ ކުރިން ޔަހޫދީ ޓެރެރިސްޓު ސިފައިން ވަނީ ނާބުލުސްގައި އޮންނަ ޖިނީން ރެފިއުޖީ ކޭމްޕަށް ވެސް އަރައި ފަލަސްޠީނުގެ ތިން މީހަކު ހައްޔަރުކޮށްފައެވެ.
2021 ވަނަ އަހަރުގެ ޖޫން މަހުން ފެށިގެން ޔަހޫދީ ޖައްބާރު އަސްކަރިއްޔާގެ ސިފައިން ދަނީ ކޮންމެ ދުވަހަކު ކަހަލަ ގޮތަކަށް ހުޅަނގު އައްސޭރިއަށް އަރައި އުދުވާންތައް ހިންގަމުންނެވެ. ފަލަސްޠީން ރައްޔިތުންގެ ލޭއޮހޮރުވައިލަމުންނެވެ. 2022 ވަނަ އަހަރު ޔަހޫދީ ސިފައިން ހިންގާފައިވާ އުދުވާންތަކުގައި ފަލަސްޠީނުގެ 170 މީހުން ޝަހީދުކޮށްލާފައިވެއެވެ.
މި އަހަރުގެ މިހާތަނަށް ޔަހޫދީ ސިފައިން ހިންގާފައިވާ ލާއިންސާނީ ޖަރީމާތަކުގައި ފަލަސްޠީނުގެ 156 މީހުން ވަނީ ޝަހީދުކޮށްލާފައެވެ. އޭގެ ތެރޭގައި 26 ކުޑަކުދިން ވެސް ހިމެނެއެވެ. އަދި، ގިނަ ޢަދަދެއްގެ ޢާންމުންނާއި އަންހެނުން ވެސް ހިމެނެއެވެ. މުސްކުޅިންގެ ފުރާނައަށް ވެސް ފަރުވާލެއް ނުބަހައްޓައެވެ. ހުސްވި މޭ މަހުގެ 9 އިން 13 އަށް ޔަހޫދީ އަސްކަރިއްޔާއިން ހިންގި އުދުވާންތަކުގައި އެކަނިވެސް ފަލަސްޠީނުގެ 36 މީހުން ވަނީ ޝަހީދުކޮށްލާފައެވެ.