ފަންނުވެރިންގެ ކުރެހުންތައް ދާއިމީކޮށް ފެންނާނެ އިންތިޒާމް ނޭޝަނަލް އަރޓް ގެލަރީގައި ހަމަޖައްސަވައިފިއެވެ.
ނޭޝަނަލް އަރޓް ގެލަރީގައި މިއަދު ހުޅުވި "ޕަރމަނަންޓް ކަލެކްޝަން" އަކީ ދާއިމީކޮށް ފަންނުވެރިންގެ ކުރެހުންތައް ދައްކާލުމަށް ބެހެއްޓޭގޮތަށް ހުޅުވި ގެލަރީއެކެވެ. މިކަމަށްޓަކައި ބޭއްވި ޙަފްލާއެއްގައި މިގެލަރީ އިފްތިތާޙު ކޮށްދެއްވީ ރައީސުލްޖުމްޙޫރިއްޔާ އިބްރާޙިމް މުޙައްމަދު ޞާލިޙެވެ.
ދިވެހިރާއްޖޭގައި ނޭޝަނަލް އާޓް ގެލެރީއެއް ޤާއިމް ކުރެވިގެންދިޔައީ 2005 ވަނަ އަހަރުގެ އޮކްޓޫބަރު މަހުއެވެ. ނޭޝަނަލް އާޓް ގެލެރީ ހުޅުވީއްސުރެ ގެލެރީގައި ޕަރމަނަންޓް ކަލެކްޝަނެއް ޤާއިމް ކުރުމުގެ ސިޔާސަތެއް އޮތްނަމަވެސް މިއަދާ ހަމައަށް ޕަރމަނަންޓް ކަލެކްޝަނެއް ޤާއިމްކޮށް، އާންމުންނަށް ފެންނާނޭހެން މައުރަޒުކުރެވިފައެއް ނުވެއެވެ. އެތަނުގައި މިހާތަނަށްވެސް ބާއްވަމުން އައީ، ވަކިވަކި ކުރެހުންތެރިންނާއި، އަރޓިސްޓް ކޮމިއުނިޓީތަކުން ބާއްވަމުން އައި ކުރު އެގްޒިިބިޝަންތަކެވެ.
"ޕަރމަނަންޓް ކަލެކްޝަން" ހުޅުއްވާދެއްވުމަށްފަހު ރައީސުލްޖުމްހޫރިއްޔާގެ ދެކަނބަލުން ވަނީ ނޭޝަނަލް އާޓް ގެލެރީގެ ޕަރމަނަންޓް ކަލެކްޝަނާއި ރާއްޖޭގެ ބައެއް ސީނިއަރ އާޓިސްޓުންގެ ކުރެހުންތަކާއި އެތަނުގައި ކުރިޔަށްދިޔަ ކުރެހުމުގެ ހަރަކާތްތައް ބައްލަވާލައްވާފައެވެ.
"ޕަރމަނަންޓް ކަލެކްޝަން" ހުޅުވުމުގެ ރަސްމިއްޔާތުގައި ވާހަކަފުޅު ދައްކަވަމުން މިނިސްޓަރ އޮފް އަރޓްސް ކަލްޗަރ އެންޑް ހެރިޓޭޖް ޔުމްނާ މަޢުމޫނު ވިދާޅުވީ، "ޕަރމަނަންޓް ގެލަރީ"އެއް ޤާއިމުކުރުމަށް ބޭނުންވާ ކުރެހުންތައް އެއްކުރުމުގެ މަސައްކަތް 2006ވަނަ އަހަރު ފަށްޓަވާފައިވާ ކަމަށެވެ. މިގެލަރީގައި ހިމަނާފައިވާ ފުރަތަމަ 24 ކުރެހުމަކީ، ރާއްޖޭގެ ތާރީޚާއި ސަޤާފަތް ދައްކުވައިދޭ ކުރެހުންތަކެކެވެ. އަހަރުތަކެއްގެ މަސައްކަތަށް ފަހު ގެލަރީ ހުޅުވިގެންދިއުމަކީ، ލިބުނު ވަރަށް ބޮޑު ކާމިޔާބީއެއްކަމަށްވެސް މިނިސްޓަރ ވިދާޅުވިއެވެ.
"ކުރެހުމުގެ ދާއިރާގައި ދުވަސްވީ އެތައް ބޭފުޅުންނެއްގެ ކުރެހުންތައް އެބަހުރި. ފަންނުވެރިކަމުގެ ތާރީޚުވެސް އެބަ ދައްކުވައިދޭ. އަދި މިގޮތަށް އަބަދު ފެންނާނެހެން ކުރެހުންތައް ބެހެއްޓުމަކީ، ޒުވާން ކުރެހުންތެރިންނަށްވެސް ނަމޫނާ މަސައްކަތްތަކެއް." މިނިސްޓަރ ވިދާޅުވިއެވެ.
މިނިސްޓަރ ވިދާޅުވީ ފަންނާނުންނަށް ބޭނުންވާ މުހިންމު ބަދަލުތަކެއް ގެނެވިއްޖެކަމަށެވެ. އެގޮތުން އަރޓް ގެލަރީގެ ވަސީލަތްތައް ފުރިހަމަކުރެވިގެން ދިއުމަކީ ކުރެހުންތެރިން ވަރަށް ބޮޑަށް އެދެމުން އައި ކަމެއްކަމަށެވެ.
މިއަދު އިފްތިތާޙު ކުރި ނޭޝަނަލް އާޓް ގެލެރީގެ ޕަރމަނަންޓް ކަލެކްޝަންގައި އެކިއެކި ދިވެހި ކުރެހުންތެރިންނާއި، ބޭރުގެ ބައެއް ފަރާތްތަކުން ހަދިޔާކުރައްވާފައިވާ ޖުމްލަ 44 ކުރެހުން ހިމެނެއެވެ. މީގެ ތެރެއިން ދިވެހި ކުރެހުންތެރިންގެ 24 ކުރެހުމެއް މިވަގުތު ޕަރމަނަންޓް ކަލެކްޝަންގައި މައުރަޒުކުރެވިފައިވެއެވެ. މި24 ކުރެހުމުގެ އިތުރުން މިވަގުތު ޤައުމީ ދާރުލްއާސާރުގެ ދާއިމީ ކަލެކްޝަންގައި ހިމެނޭ ދެ ކުރެހުމަކާއި، ބޭރުގެ ބައެއް ޤައުމުތަކާއި، ރާއްޖޭގައި އެކި ދުވަސްވަރު ޚިދުމަތްކުރެއްވި އެކި ޤައުމުތަކުގެ ސަފީރުން ހަދިޔާކުރައްވާފައިވާ ބައެއް ކުރެހުންތައްވެސް ޕަރމަނަންޓް ކަލެކްޝަންގައި ހިމެނެއެވެ. އަދި ނޭޝަނަލް އާޓް ގެލެރީގައި ވަގުތީ ގޮތުން މައުރަޒު ކުރުމަށް ހ.ހިކަރީ، އަހްމަދު އާދަމް ދެއްވާފައިވާ، ކުރީގެ ޚާރިޖީ ވަޒީރު އަލްއުސްތާޛު ފަތުޙުﷲ ޖަމީލް ކުރައްސަވާފައިވާ ކުރެހުމެއްވެސް ހިމެނެއެވެ.
ޕަރމަނަންޓް ކަލެކްޝަންގައި މިވަގުތު ހިމެނޭ ކުރެހުންތައް ކުރައްސަވާފައިވާ ދިވެހި އާޓިސްޓުންނަކީ، އަލްމަރްޙޫމް ސަރުދާރު ދޮންމަނިކު، އަލްމަރްޙޫމް ނތ ޙަސަން ދީދީ، ޙުސައިން އަފީފު، ޙުސައިން ޢަލީ މަނިކު، އަފްޒަލް ޝާފިއު ޙަސަން، އަޙުމަދު ނަޞީރު، ޙަސަން ޝަމީމް، ޚަދީޖާ އަބޫބަކުރު، އައިމިނަތު ޙިލްމީ، މުޙައްމަދު މަދީޙު، އަޙުމަދު ޝުޖާ، ސަމާޙް އަޙުމަދު އަދި ޙަސަން ޒިޔާދްއެވެ.
މި ކަލެކްޝަން މެއި މަހުގެ 22 އަދި 23 ވަނަ ދުވަހު ހެނދުނު 10 އިން ރޭގަނޑު 10 އަށް އަދި އޭގެ ފަހުން ކޮންމެ ދުވަހަކުވެސް ހެނދުނު 10 އިން އިރުއޮއްސި 6 އަށް ހުޅުވާފައި ހުންނާނެއެވެ.