ސަޢޫދީ ޢަރަބިއްޔާގެ ފުރަތަމަ އަންހެން އެސްޓްރޮނޯޓް ރައްޔާނާ ބަރްނަވީ ބައިނަލްއަޤުވާމީ ޖައްވީ ސްޓޭޝަން (އައި.އެސް.އެސް)އަށް ދިއުމަށް ކުރާ ދަތުރު ފަށައިފިއެވެ. އެ ޤައުމުގެ އެހެން އެސްޓްރޮނޯޓެއް ކަމުގައިވާ ޢަލީ އަލް-ޤަރްނީ ވެސް ބަރްނަވީއާ އެކު އައި.އެސް.އެސްއަށް ކުރާ ދަތުރުގައި ބައިވެރިވެއެވެ.
ބަރްނަވީއާއި އަލް-ޤަރްނީ އައި.އެސް.އެސްއަށް ދަތުރު ކުރާ ސްޕޭސްއެކްސް ފެލްކަން 9ގެ އުޅަނދު އެމެރިކާގެ ފްލޮރިޑާގެ ކޭޕް ކެނެވެރަލްގައި އޮންނަ ކެނެޑީ ސްޕޭސް ސެންޓަރުން އުދުއްސައިލާފައި ވަނީ މޭ 21 ވަނަ ދުވަހުގެ ހަވީރުއެވެ. މި ދަތުރުގައި އެމެރިކާގެ ދެ އެސްޓްރޮނޯޓުން ކަމުގައިވާ ޕެގީ ވިޓްސަނާއި ޖޯން ޝޮފްނަރ ވެސް ބައިވެރިވެއެވެ. ބަރްނަވީއާއި އަލް-ޤަރްނީ އައި.އެސް.އެސްއަށް ކުރާ މި ދަތުރަކީ، ދިރާސާތަކެއް ކުރުމުގެ މަޤުޞަދުގައި ކުރާ ދަތުރެކެވެ.
"ސަޢޫދީ ޢަރަބިއްޔާގެ ފުރަތަމަ އަންހެން އެސްޓްރޮނޯޓަށް ވެވުމަކީ އަޅުގަނޑަށް ލިބޭ ވަރަށް ބޮޑު ޝަރަފެއް. އައި.އެސް.އެސްއަށް އަޅުގަނޑު މި ދަނީ ހަމައެކަނި ސަޢޫދީ ޢަރަބިއްޔާ ތަމްސީލުކުރާކަށް ނޫން. އަޅުގަނޑުގެ ދަތުރުގައި މުޅި ޢަރަބި ދުނިޔެ ތަމްސީލުކުރާނަން. މިއީ އަޅުގަނޑަށް ލިބޭ ވަރަށް ބޮޑު އުފަލެއް،" ބަރްނަވީ ބުންޏެވެ.
ބަރްނަވީއަކީ އުރަމަތީގެ ކެންސަރާ ގުޅޭ ދިރާސާތައް ކުރާ ސައިންޓިސްޓެކެވެ. އަލް-ޤަރްނީއަކީ އަސްކަރީ މަތިންދާބޯޓު ދުއްވާ ޕައިލެޓެކެވެ. އައި.އެސް.އެސްއަށް ދެ މީހުން ކުރާ ދަތުރުގައި ތަފާތު 14 ތަހުލީލަކާއި ދިރާސާއެއް ކުރުމަށް ވަނީ ހަމަޖެހިފައެވެ. މީގެ ތެރޭގައި އިންސާނުންގެ ޞިއްޙަތާ ގުޅޭ ދިރާސާތަކާއި، ކްލައުޑް ސީޑިންގްއާ ގުޅޭ ދިރާސާތައް ހިމެނެއެވެ. ސައިންސްގެ ދާއިރާއިން މަތީ ތަޢުލީމު ހާސިލުކުރަމުންދާ ސަޢޫދީ ޢަރަބިއްޔާގެ ދަރިވަރުން ވެސް ބިމުގައި ތިބެގެން މި ދިރާސާތަކުގައި ބައިވެރިވެ، އެހީތެރިކަން ފޯރުކޮށްދޭނެއެވެ.
ސަޢޫދީ ޢަރަބިއްޔާގެ ދެ އެސްޓްރޮނޯޓުން އައި.އެސް.އެސްއަށް ކުރާ މި ދަތުރަކީ އެ ޤައުމުގެ ވިޜަން 2030 ލަނޑުދަނޑިތަކުގެ ދަށުން ކުރާ ދަތުރެކެވެ. އެ ލަނޑުދަނޑިތަކުގެ މައިގަނޑު އެއް އަމާޒަކީ ތެލަށް ބަރޯސާވާ މިންވަރު ކުޑަކޮށް، ސަޢޫދީ ޢަރަބިއްޔާގެ ޒުވާން ޖީލުތަކަށް ވަޒީފާގެ އިތުރުން ފުރުޞަތުތައް ފަހިކޮށްދިނުމެވެ. މި ލަނޑުދަނޑިތަކުގެ ދަށުން ސަޢޫދީ ޢަރަބިއްޔާއިން ސަޢޫދީ ސްޕޭސް ކޮމިޝަންގެ ނަމުގައި ވަކި އިދާރާއެއް އުފައްދާފައި ވަނީ 2018 ވަނަ އަހަރުއެވެ.
ސަޢޫދީ ޢަރަބިއްޔާގެ އެސްޓްރޮނޯޓުން މީގެ ކުރިން ވެސް ވަނީ ޖައްވަށް ދަތުރުކޮށްފައެވެ. އެންމެ ފުރަތަމަ ޖައްވަށް ދަތުރުކުރައްވާފައިވާ ސަޢޫދީ ރައްޔިތަކީ ޕްރިންސް ސުލްޠާން ބިން ސަލްމާން ޢަބްދުލްޢަޒީޒް އަލް-ސަޢުދެވެ. އެމެރިކާއިން އިންތިޒާމު ކުރި ދަތުރެއްގައި އޭނާ ޖައްވަށް ވަޑައިގަންނަވާފައި ވަނީ 1985 ވަނަ އަހަރުއެވެ.
ޖައްވީ ދިރާސާގެ ދާއިރާއިން މެދުއިރުމައްޗާއި ޢަރަބި ޤައުމުތަކުން ފަހަކަށް އައިސް ދަނީ ބޮޑެތި ކުރިއެރުންތަކެއް ހޯދަމުންނެވެ. 2019 ވަނަ އަހަރު އެކުވެރި ޢަރަބި ޢިމާރާތް (ޔޫ.އޭ.އީ)ގެ އެސްޓްރޮނޯޓެއް ކަމުގައިވާ ހައްޒާ އަލް-މަންޞޫރީ ވަނީ އައި.އެސް.އެސްއަށް ދަތުރުކޮށްފައެވެ. އެއީ، ޢަރަތްބަކު އައި.އެސް.އެސްއަށް ކުރި ފުރަތަމަ ދަތުރެވެ. އަދި، ހުސްވި އޭޕްރިލް މަހުގެ ތެރޭގައި ޔޫ.އޭ.އީގެ އެސްޓްރޮނޯޓް ސުލްޠާން އަލް-ނިޔާދީ ވަނީ ޖައްވުގެ ތެރޭގައި ހިނގައިލާފައެވެ. އެއީ، ޢަރަތްބަކު ޖައްވުގައި ހިނގާފައިވާ ފުރަތަމަ ފަހަރެވެ.