ސޫދާންގެ އަސްކަރިއްޔާއާއި ރެޕިޑް ސަޕޯޓް ފޯސަސް (އާރް.އެސް.އެފް)ގެ ފައުޖުތަކާ ދެމެދު ޙަމަލާ ބަދަލުކުރުން ހަތް ދުވަހުގެ މުއްދަތަކަށް މެދުކަނޑައިލަން ދެ ފަރާތުން އެއްބަސްވެއްޖެއެވެ. ސޫދާންގެ އަސްކަރިއްޔާގެ އިސްވެރިޔާ ޖެނެރަލް ޢަބްދުލް ފައްތާޙް އަލް-ބުރުހާނާއި އާރް.އެސް.އެފްގެ އިސްވެރިޔާ ޖެނެރަލް މުޙައްމަދު ޙަމްދާން ދަގަލޯގެ ފައުޖުތަކާ ދެމެދު ހަނގުރާމަ ކުރަން ފަށާފައި ވަނީ އޭޕްރިލް 15 ވަނަ ދުވަހުއެވެ.
އާރް.އެސް.އެފްގެ ފައުޖުތަކުން ވަނީ ވެރިރަށް ޚަރްތޫމަށް އަރައި ރިޔާސީ ގަނޑުވަރާއި އަލް-ބުރްހާންގެ ގެކޮޅު ވަށައިލާ، އެ ތަންތަން ހިސާރުކުރަން މަސައްކަތް ކޮށްފައެވެ. ރިޔާސީ ގަނޑުވަރާއި ޚަރްތޫމްގެ ވައިގެ ބަނދަރުގެ ބޮޑު ބައެއް މިހާރު އޮތީ އާރް.އެސް.އެފްގެ ބާރުގެ ދަށުގައެވެ. ނަމަވެސް، އަސްކަރީ އެއްވެސް މަރުކަޒެއް ހިފިފައެއް ނުވެއެވެ. އ.ދއާއި އެމެރިކާއާއި ސަޢޫދީ ޢަރަބިއްޔާގެ އިސްނެގުމުގެ ދަށުން ދެ ފަރާތުގެ މެދުގައި ސުލްޙައިގެ މަޝްވަރާތައް ޖިއްދާގައި ފަށާފައިވާއިރު، ހަތް ދުވަހުގެ މުއްދަތަކަށް ހަމަލާ ބަދަލުކުރުން ހުއްޓައިލަން ދެ ފަރާތުން ވެސް ވަނީ އެއްބަސްވެފައެވެ.
މީގެ ކުރިން ވެސް މި ފަދަ އެއްބަސްވުންތައް އެކުލަވައިލި ނަމަވެސް، އެ ކަން ތަންފީޒުކޮށްފައި ނެތުމުން، މި ފަހަރު ވެސް އެއްބަސްވުމަށް އަމަލުކުރާނެ ކަމާ މެދު ވަނީ ސުވާލު އުފެދިފައެވެ. ޙަމަލާ ބަދަލުކުރުން ހުއްޓައިލުމުގެ އެއްބަސްވުން ތަންފީޒުކުރޭތޯ ބެލުމަށް އެމެރިކާއާއި ސަޢޫދީ ޢަރަބިއްޔާ ގުޅިގެން މަސައްކަތް ކުރުމަށް ނިންމާފައިވާ ކަމަށް އެ ދެ ޤައުމުން ބުނެއެވެ.
ޙަމަލާ ބަދަލުކުރުން މެދުކަނޑައިލުމުގެ އިތުރުން ހާލުގައި ޖެހިފައިވާ އެތަކެއް މިލިޔަން މީހުންނަށް އިންސާނީ އެހީތެރިކަން ފޯރުކޮށްދޭން މަސައްކަތް ކުރުމަށް ވެސް ދެ ފަރާތުން ވަނީ އެއްބަސްވެފައެވެ. އަދި، މެދުކެނޑިފައިވާ އަސާސީ ޚިދުމަތްތައް އަލުން ގުޅައިދޭން ވެސް ދެ ފަރާތުން ވަނީ ނިންމާފައެވެ. ސޫދާންގައި ދާޚިލީ ހަމަނުޖެހުންތައް 16 ވަނަ ހަފުތާއަކަށް ދެމިގެން ގޮސްފައިވާއިރު، ޙަމަލާތަކުގައި މަރުވެފައިވާ މީހުންގެ ޢަދަދު ވަނީ 705 އަށް އަރާފައެވެ. އަދި، 5,287 މީހުން ވަނީ ޒަޚަމުވެފައެވެ.
ހަމަނުޖެހުންތަކާ ގުޅިގެން ސޫދާންގައި އަމިއްލަ ވަޒަނާއި ގެދޮރު ދޫކޮށް ރައްކާތެރި ހިސާބުތަކަށް ދަތުރުކޮށްފައިވާ މީހުންގެ ޢަދަދު 1.1 މިލިޔަނަށް އަރާ ކަމުގައި ދުނިޔޭގެ ޞިއްޙަތު ޖަމުޢިއްޔާ (ޑަބްލިޔު.އެޗް.އޯ)އިން ބުނެއެވެ. އޭގެ ތެރެއިން ގިނަ ޢަދަދެއްގެ ބަޔަކު ވަނީ އަވައްޓެރި ޤައުމުތަކަށް ހިޖުރަކޮށްފައެވެ. ސޫދާންގައި ހަނގުރާމަ ކުރަމުންދާ އަސްކަރިއްޔާއާއި އާރް.އެސް.އެފްގެ ފައުޖުތަކަކީ އެ ޤައުމުގެ ކުރީގެ ރައީސް އުމަރު އަލް-ބަޝީރުގެ ސަރުކާރު ވައްޓައިލަން އެކުގައި މަސައްކަތް ކުރި ދެ ފަރާތެވެ.