ދުނިޔޭގެ އެންމެ ކުރިއަރާފައިވާ އިޤްތިޞާދުތައް ހިމެނޭ ގްރޫޕް އޮފް ސެވަން (ޖީ7) އިން ރަޝިޔާއާ ދެކޮޅަށް އަޅާފައިވާ ދަތިކުރުމުގެ ފިޔަވަޅުތައް އިތުރަށް ހަރުކަށިކުރަން ނިންމުމާ ގުޅިގެން އެކަމާ ނުރުހުން ފާޅުކުރުމުގެ ގޮތުން، އެމެރިކާގެ ކުރީގެ ރައީސް ބަރަކް އޮބާމާ ހިމެނޭ ގޮތުން އެމެރިކާގެ 500 ރައްޔިތުންނާ ދެކޮޅަށް ރަޝިޔާއިން ދަތިކުރުމުގެ ފިޔަވަޅުތައް އަޅައިފިއެވެ. ރަޝިޔާއިން ޔޫކްރެއިނަށް ސިފައިން ފޮނުވައިގެން ކުރަމުންދާ ހަނގުރާމައާ ގުޅިގެން ރަޝިޔާއާ ދެކޮޅަށް އަޅާފައިވާ ފިޔަވަޅުތައް އިތުރަށް ހަރުކަށި ކުރަން ޖީ7 ން ނިންމާފައި ވަނީ ޖަޕާނުގެ ހިރޯޝީމާގައި ކުރިއަށްދާ އެ އިއްތިޙާދުގެ ސަމިޓުގައެވެ.
ޖީ7 ގެ ނިންމުމާ ގުޅިގެން އެމެރިކާގެ 500 ރައްޔިތުންނާ ދެކޮޅަށް ރަޝިޔާއިން އަޅާފައިވާ ފިޔަވަޅުތަކުގެ ތެރޭގައި، ރަޝިޔާއަށް އެތެރެވުން މަނާކުރުން ހިމެނެއެވެ. އަދި، އެ ލިސްޓުގައި އޮބާމާ ހިމެނިވަޑައިގަންނަވާ ކަމަށްވެސް ރަޝިޔާގެ ޚާރިޖީ ވުޒާރާއިން ބުންޏެވެ. މީގެ އިތުރުން، ޖާސޫސްކުރުމުގެ ތުހުމަތުގައި ރަޝިޔާއިން ހައްޔަރުކޮށްފައިވާ އެމެރިކާގެ ނޫސްވެރިޔާ އެވިން ގަރސްކޮވިޗާ ބައްދަލުކުރުމުގެ ފުރުޞަތު އެމެރިކާގެ ޚާރިޖީ ވުޒާރާއަށް ނުދިނުން ހިމެނެއެވެ. ގަރސްކޮވިޗަކީ ދަ ވޯލް ސްޓްރީޓް ޖަރނަލްގެ ނޫސްވެރިއެކެވެ. އޭނާ ހައްޔަރުކޮށްފައި ވަނީ މާރިޗު މަހުގެ ތެރޭގައެވެ.
ގަރސްކޮވިޗާ ދެކޮޅަށް އަޅާފައިވާ ފިޔަވަޅުތައް ހަރުކަށިކުރަން ރަޝިޔާގެ ޚާރިޖީ ވުޒާރާއިން ނިންމާފައި ވަނީ، ރަޝިޔާގެ ޚާރިޖީ ވަޒީރު ސަރްގޭ ލެވްރޮފާއެކު ނިއުޔޯކަށް ދަތުރުކުރަން ހަމަޖެހިފައި އޮތް ރަޝިޔާގެ ނޫސްވެރިންގެ ޓީމަކަށް ވިސާދިނުމާ އެމެރިކާއިން ދެކޮޅުހެދުމާ ގުޅިގެންނެވެ. އޭޕްރިލް މަހުގެ ތެރޭގައި ލެވްރޮފް ނިއުޔޯކަށް ވަޑައިގަތީ އ.ދގެ ސަލާމަތީ މަޖިލީހުގެ ރިޔާސަތުގެ ހައިސިއްޔަތުން ބޭއްވެވި ބައްދަލުވުންތަކެއްގައި ބައިވެރިވެ ވަޑައިގަންނަވާށެވެ. އޭނާއާ އެކު ދަތުރު ކުރަން ހަމަޖެހިފައި އޮތް ނޫސްވެރިންނަށް އެމެރިކާއިން ވިސާދީފައެއް ނުވެއެވެ.
ރަޝިޔާގެ ނޫސްވެރިންނަށް ވިސާ ދޭން އެމެރިކާއިން ދެކޮޅު ހެދުމުން ލެވްރޮފް ވަނީ އެމެރިކާއަށް ދުވަހަކުވެސް މަޢާފު ނުކުރައްވާނެ ކަމަށް ވިދާޅުވެފައެވެ. އަދި، މި ފަދަ އަމަލުތަކުގެ ސަބަބުން ރަޝިޔާ ދެކެ އެމެރިކާއިން ވަރަށް ބޮޑަށް ބިރުގަނެ، ޖެހިލުންވެފައިވާ ކަން ހާމަވާކަމަށް ވެސް އޭނާ ވަނީ ވިދާޅުވެފައެވެ.
"ރަޝިޔާއާ ދެކޮޅަށް އެމެރިކާއިން އަޅާ ކޮންމެ ފިޔަވަޅަކަށް ރަޝިޔާއިން ރައްދު ދޭނެ ކަން އެމެރިކާއަށް މިހާރު ވިސްނެން ވެއްޖެ. އެ ކަން ވިސްނެން ވެއްޖެތާ މިހާރު ކިތަންމެ ދުވަހެއް. އެމެރިކާގެ ކޮންމެ ފިޔަވަޅަކަށް އެ ޤައުމަށް އަދަބު ދޭނަން،" ރަޝިޔާގެ ޚާރިޖީ ވުޒާރާއިން ބުންޏެވެ.
އޮބާމާ ހިމެނިވަޑައިގަންނަވާ ގޮތުން އެމެރިކާގެ 500 މީހަކާ ދެކޮޅަށް ރަޝިޔާއިން ދަތިކުރުމުގެ ފިޔަވަޅުއަޅާފައި މި ވަނީ، ރަޝިޔާގެ 300 މީހުންނާ ދެކޮޅަށް އެމެރިކާއިން ވެސް ދަތިކުރުމުގެ ފިޔަވަޅުތައް އަޅާފައިވާ ދަނޑިވަޅެއްގައެވެ. ރަޝިޔާއިން ޔޫކްރެއިންގައި ކުރަމުންދާ ހަނގުރާމައަށް 15 މަސް ފުރުމާ ގާތްވެފައިވާއިރު، ހުޅަނގުގެ ބާރުތަކުން ރަޝިޔާއާ ދެކޮޅަށް އަޅާފައިވާ ދަތިކުރުމުގެ ފިޔަވަޅުތައް އިތުރަށް ހަރުކަށި ކުރުމުގެ ގޮތުން، އެ ޤައުމަށް އެކްސްޕޯޓުކުރާ މުދަލުގެ ޢަދަދު މަދުކުރަން ޖީ7ގެ ޤައުމުތަކުން ވަނީ އެއްބަސްވެފައެވެ.
ރަޝިޔާއަށް އެކްސްޕޯޓު ކުރުން މަދުކުރަން ޖީ7ގެ މެންބަރު ޤައުމުތަކުން ނިންމާފައިވާ ތަކެތީގެ ތެރޭގައި ހިމެނެނީ އެ ޤައުމުގެ އަސްކަރިއްޔާ ކުރިއަރުވައި ހަތިޔާރު އުފައްދަން ބޭނުންކުރާ ސާމާނާއި، ސިނާޢީ އަދި ޓެކްނޮލޮޖީގެ ދާއިރާގެ އުފެއްދުންތަކަށް ބޭނުންވާ ސާމާނެވެ. އަދި، ރަޝިޔާއިން އެކި މަޢުދަންތައް ބޭރުކުރުން ހުއްޓުވަން ވެސް ފިޔަވަޅުތައް އެޅުމަށް ޖީ7 ން ވަނީ ނިންމައިފައެވެ. މަޢުދަންތަކުގެ ތެރޭގައި އަލިމަސް ވެސް ހިމެނެއެވެ.
ޖީ7ގައި ހިމެނެނީ އެމެރިކާ، ޖަޕާން، ޖަރުމަނުވިލާތް، އިނގިރޭސިވިލާތް، ފަރަންސޭސިވިލާތް، ކެނެޑާ އަދި އިޓަލީވިލާތެވެ. ޖީ7 ގެ މެންބަރު ޤައުމުތަކުގެ އިތުރުން މި އަހަރުގެ ސަމިޓުގައި އޮސްޓްރޭލިޔާ، ބްރެޒިލް، ކޮމޮރޯސް، ކޫކް އައިލެންޑްސް، އިންޑިޔާ އަދި އިންޑޮނީޝިޔާގެ އިތުރުން ދެކުނު ކޮރެޔާއާއި ވިއެޓްނާމްގެ އިސްވެރިން ވެސް ބައިވެރިވެ ވަޑައިގަންނަވައެވެ.
އެމެރިކާއާއި ރަޝިޔާއާ ދެމެދު މި ވަގުތު އުފެދިފައިވާ އެންމެ ބޮޑު ނުތަނަސްކަމަކީ ޔޫކްރެއިނަށް އަރައި ރަޝިޔާއިން ކުރަމުންދާ ހަނގުރާމައާ ގުޅިގެން އުފެދިފައިވާ މައްސަލައެވެ. އެ ހަނގުރާމައިގައި އެމެރިކާއިން ދަނީ ޔޫކްރެއިނަށް ހަތިޔާރާއި އަސްކަރީ އެހީގެ އިތުރުން މާލީ ގޮތުންވެސް އެހީތެރިކަން ދެމުންނެވެ. ޔޫކްރެއިނަށް މިހާތަނަށް އެންމެ ބޮޑު ޢަދަދެއްގެ އެހީތެރިކަމެއް ދީފައި ވަނީވެސް އެމެރިކާއިންނެވެ. މީގެ އިތުރުން، ރަޝިޔާއިން ޗައިނާއާ ގުޅުން ބަދަހިކުރުމަކީ ވެސް އެމެރިކާ ރުހޭ ކަމެއް ނޫނެވެ.