ސޫރިޔާގެ ދާޚިލީ މައްސަލަތަކުގައި ތަދައްޚުލްވުމަކީ ޢަރަބި ލީގުގެ ޤައުމުތަކަށް އޮތް ހައްޤެއް ނޫން ކަމަށް ވިދާޅުވެ، އެ ޤައުމުގެ ދާޚިލީ ކަންކަމާ ބަސް ނުބުނުމަށް ރައީސް ބައްޝާރް ހާފިޛް އަލް-އަސަދު ޢަރަބި ލީގަށް ގޮވައިލައްވައިފިއެވެ. އޭނާ މި ކަމަށް ގޮވައިލައްވާފައި ވަނީ ސަޢޫދީ ޢަރަބިއްޔާގެ ޖިއްދާގައި ބޭއްވި ޢަރަބި ލީގުގެ ސަމިޓުގައި ތަޤުރީރު ކުރައްވަމުންނެވެ.
ޖިއްދާގައި ބާއްވާފައިވާ ޢަރަބި ލީގުގެ މިސަޓަކީ 2011 ވަނަ އަހަރު ސޫރިޔާގައި ސޫރިޔާގައި ދާޚިލީ ހަނގުރާމަ ފެށި ފަހުން އަސަދު ބައިވެރިވެ ވަޑައިގެންނެވި އެ ސަމިޓުގެ ފުރަތަމަ ބައްދަލުވުމެވެ. އަދި، މިއީ ހަނގުރާމަ ފެށި ފަހުން އޭނާ ސަޢޫދީ ޢަރަބިއްޔާއަށް ވަޑައިގެންނެވި ފުރަތަމަ ފަހަރެވެ.
"ސޫރިޔާގެ ރައްޔިތުންނަކީ ޢަރަބީންގެ ލޭ ހިނގާ ބައެއް. ސޫރިޔާގެ ތާރީޚާއި ކުރިމަގު ވެސް އޮތީ ޢަރަބީންނާ އެކު. އިހުސާސްތަކާއި ދެކޭ ގޮތް ބަދަލުވި ނަމަވެސް، ތާރީޚާއި ސޫރިޔާގެ ރައްޔިތުންގެ ހިތެއް ބަދަލެއް ނުވާނެ. އަދި ބަދަލެއް ނުކުރެވޭނެ. ނަމަވެސް، ސޫރިޔާގެ ދާޚިލީ ކަންކަމާ ބަސްބުނެ، ކަންކަމުގެ ތެރެއަށް ތަދައްޚުލްވުމަކީ އެހެން އެއްވެސް ޤައުމަކަށް އޮތް ހައްޤެއް ނޫން،" އަސަދު ވިދާޅުވިއެވެ.
2011 ވަނަ އަހަރުގެ ނޮވެންބަރު މަހު ސޫރިޔާގެ ޢާންމު ރައްޔިތުންނާ ދެކޮޅަށް އަސަދު ފެއްޓެވި ހަނގުރާމައާ ގުޅިގެން ޢަރަބި ލީގުން ވަނީ އެ ޤައުމު އެކަހެރިކޮށްފައެވެ. މި ހަނގުރާމައިގައި މަރުވި މީހުންގެ ޢަދަދު 500,000 އަށްވުރެ މައްޗަށް އަރައެވެ. އަދި، އެތަކެއް މިލިޔަން ރައްޔިތުންނެއްގެ ގެދޮރު ގެއްލި ރެފިއުޖީންނަށްވިއެވެ. މިހަނގުރާމައާ ގުޅިގެން ޢަރަބި ލީގުގެ މެންބަރު ޤައުމުތަކުން ވަނީ ސޫރިޔާއާ އެކު އޮތް ގުޅުންތައް ކަނޑައިލާފައެވެ. ނަމަވެސް، އެ ޤައުމުތަކުން މިހާރު ދަނީ ސޫރިޔާއާ އަލުން ގުޅުން ގާއިމުކުރަން މަސައްކަތް ކުރަމުންނެވެ.
އަސަދު އެންމެ ފަހުން ޢަރަބި ލީގުގެ ސަމިޓެއްގައި ބައިވެރިވެ ވަޑައިގަންނަވާފައި ވަނީ 2010 ވަނަ އަހަރުއެވެ. އެ އަހަރު ސަމިޓު ބާއްވާފައި ވަނީ ލީބިޔާގައެވެ. މި މަހު ބޭއްވި ސަމިޓަށް އަސަދަށް ދަޢުވަތު އަރުވާފައި މި ވަނީ، ރިޔާޟާއި ދިމިޝްޤާ ދެމެދު އަލުން ގުޅުން ގާއިމުކުރިތާ ދުވަސްކޮޅެއް ފަހުންނެވެ. ދެ ޤައުމުން ވަނީ ޚާރިޖިއްޔާގެ އޮފީސްތައް ހުޅުވައި ގުޅުންތައް އިތުރަށް ބަދަހިކުރަން އެއްބަސްވެފައެވެ.
ސޫރިޔާގެ ދާޚިލީ ހަނގުރާމައާ ގުޅިގެން ސަޢޫދީ ޢަރަބިއްޔާއިން އެ ޤައުމާ އެކު އޮތް ގުޅުން ކަނޑައިލާފައި ވަނީ 2012 ވަނަ އަހަރުއެވެ. އަދި، ސޫރިޔާގެ ވެރިކަމުން އަސަދު ދުރުކުރަން ސަޢޫދީ ޢަރަބިއްޔާއިން ވަނީ ފާޅުގައި ގޮވައިލާ، އަސަދުގެ ސަރުކާރާ ދެކޮޅަށް ހަނގުރާމަ ކުރަމުންދިޔަ އިދިކޮޅު ފަރާތްތަކަށް އެހީތެރިކަން ވެސް ފޯރުކޮށްދީފައެވެ. ރިޔާޟުން ދިމިޝްޤާ އެކު އަލުން ގުޅުން ގާއިމުކޮށްފައި ވަނީ ސޫރިޔާއާއި ތުރުކީވިލާތަށް ފެބުރުވަރީ 6 ވަނަ ދުވަހު އައި ބާރުގަދަ ބިންހެލުމަށް ފަހުއެވެ.
މާރިޗު މަހުގެ ތެރޭގައި ސަޢޫދީ ޢަރަބިއްޔާގެ ޚާރިޖީ ވަޒީރު ޕްރިންސް ފައިޞަލް ބިން ފަރްޙާން އަލް-ސަޢުދު ވަނީ ދިމިޝްޤަށް ޒިޔާރާތެއް ކުރައްވައި، އަސަދާ ބައްދަލުކުރައްވާފައެވެ. އެއީ، ސޫރިޔާގެ ދާޚިލީ ހަނގުރާމަ ފެށި ފަހުން ސަޢޫދީ އިސް އޮފިޝަލަކު ދިމިޝްޤަށް ކުރެއްވި ފުރަތަމަ ދަތުރުފުޅެވެ. ޢަރަބި ލީގުގެ ޤައުމުތަކުގެ ތެރެއިން ސޫރިޔާއާ އެކު ފުރަތަމަ އަލުން ގުޅުން ގާއިމުކޮށްފައި ވަނީ އެކުވެރި ޢަރަބި ޢިމާރާތް (ޔޫ.އޭ.އީ)އިންނެވެ. އެއީ، 2018 ވަނަ އަހަރުއެވެ.