ޔޫކްރެއިންގެ އިރުމަތީގައިވާ ބަޚްމުތް ހިފިއްޖެ ކަން ރަޝިޔާގެ ވެގްނަރ ގުރޫޕުގެ ކުލީ ސިފައިން ހާމަކުރުމުން ރައީސް ވްލަޑިމިޔަރ ޕުޓިން ވެގްނަރ ގުރޫޕަށާއި ރަޝިޔާ ސިފައިންނަށް މަރުޙަބާ ވިދާޅުވެއްޖެއެވެ. ބަޚްމުތް ހިފާފައިވާ ކަމަށް ވެގްނަރ ގުރޫޕާއި ރަޝިޔާގެ އަސްކަރިއްޔާއިން ހާމަކޮށްފައި ވަނީ މޭ 20 ވަނަ ދުވަހުއެވެ. ނަމަވެސް، އެ ރަށް ދިފާޢު ކުރަން ޔޫކްރެއިނުގެ ފައުޖުތަކުން އަދިވެސް ހަނގުރާމަ ކުރަމުންދާ ކަމުގައި ޔޫކްރެއިނުން ދަނީ ބުނަމުންނެވެ.
ބަޚްމުތަކީ ޑޮނެޓްސްކުގައި އޮންނަ ލޮނު މައިންކުރުމުގެ މަސައްކަތް ކުރާ ސިނާޢީ ރަށެކެވެ. ޑޮނެޓްސްކަކީ ރަޝިޔާއިން މިހާރު ބޮޑު ސަރަޙައްދެއް ކޮންޓްރޯލް ކުރަމުންދާ ދޮންބާސްގެ މައި ދެ ސަރަޙައްދުގެ ތެރެއިން އެއް ސަރަޙައްދެވެ. ރަޝިޔާ ސިފައިން ޔޫކްރެއިނަށް ފޮނުވައިގެން ޕުޓިން ހަނގުރާމަ ފައްޓަވާފައި ވަނީ 2022 ވަނަ އަހަރުގެ ފެބުރުވަރީ މަހުގެ 24 ވަނަ ދުވަހުއެވެ. ހަނގުރާމައިގެ އެންމެ ފުރަތަމަ ދުވަހުން ފެށިގެން ރަޝިޔާ ސިފައިން ވަނީ ބަޚްމުތް ހިފަން މަސައްކަތް ފަށާފައެވެ. މިހާރު އެ ރަށް އޮތީ މުޅިން ސުންނާފަތިވެފައެވެ.
ހަނގުރާމަ ފެށުމުގެ ކުރިން ބަޚްމުތަކީ 70,000 މީހުންގެ އާބާދީއެއް ދިރިއުޅެމުން ދިޔަ ރަށެކެވެ. އެ ރަށް ހިފުމަކީ، ފާއިތުވި 10 ވަރަކަށް މަހުގެ ތެރޭގައި ރަޝިޔާ ސިފައިންނަށް ލިބުނު އެންމެ ބޮޑު ކާމިޔާބީއެވެ. އެ ރަށް ހިފުމަށް ކުރި ލޭއޮހޮރުވުން ބޮޑު ހަނގުރާމައިގައި ދެ ޤައުމުގެ ފައުޖުތަކުގެ އެތަކެއް ސަތޭކަ ސިފައިންނެއް ވަނީ މަރުވެފައެވެ.
ރަޝިޔާގެ އަސްކަރިއްޔާއިން ބުނީ ބަޚްމުތް ހިފިފައި ވަނީ ވެގްނަރ ގުރޫޕާއި ރަޝިޔާގެ އަސްކަރިއްޔާއިން ގުޅިގެން ކުރި މަސައްކަތުން ކަމުގައެވެ. އެ ރަށް ހިފުމުގައި އެންމެ އިސް ދައުރެއް އަދާކޮށްފައި ވަނީ ވެގްނަރ ގުރޫޕުގެ ކުލީ ސިފައިންނެވެ. އަދި، ރަޝިޔާގެ އަސްކަރިއްޔާއިން ވަނީ އާޓިލަރީ ބަޑީގެ އެހީތެރިކަން ފޯރުކޮށްދީފައެވެ. ބަޚްމުތް ހިފުމުގައި ހަރަކާތްތެރިވި ވެގްނަރ ގުރޫޕުގެ ކުލީ ސިފައިންނާއި ރަޝިޔާގެ އަސްކަރިއްޔާގެ ސިފައިންނަށް ޕުޓިން މަރުޙަބާ ވިދާޅުވެފައިވާ ކަން ހާމަކޮށްފައި ވަނީ ރަޝިޔާގެ ދިފާޢީ ވުޒާރާއިން ނެރުނު ބަޔާނެއްގައެވެ.
ބަޚްމުތް ހިފުމަށް ކުރި ހަނގުރާމައިގައި ފާހަގަކޮށްލެވޭ މަސައްކަތްތަކެއް ކޮށްފައިވާ ސިފައިންނަށް ޕުޓިން އެވޯޑު ދެއްވާނެ ކަމުގައި ވެސް އެ ވުޒާރާއިން ބުންޏެވެ. ބަޚްމުތް ހިފިފައިވާ ކަމަށް ވެގްނަރ ގުރޫޕުން މީގެ ކުރިން ވެސް އެތަކެއް ފަހަރެއްގެ މަތިން ވަނީ އިޢުލާނުކޮށްފައެވެ. ނަމަވެސް، މިއީ ރަޝިޔާގެ ދިފާޢީ ވުޒާރާއިން އެ ކަން ކަށަވަރުކޮށްދިން ފުރަތަމަ ފަހަރެވެ. ވެގްނަރ ގުރޫޕުގެ އިސްވެރިޔާ ޔެވްގެނީ ޕްރިގޮޜިން ބުނީ ބަޚްމުތް ބަލައިފާސްކުރުމަށް ފަހު ރަޝިޔާގެ އަސްކަރިއްޔާއާ އެ ރަށް ހަވާލުކުރާނެ ކަމުގައެވެ.
ބަޚްމުތް ހިފާފައިވާ ކަމަށް ޕްރިގޮޜިން ބުނުމުން ޔޫކްރެއިނުން ވަނީ އެ ކަން ދޮގުކޮށްފައެވެ. ނަމަވެސް، ރަޝިޔާގެ ދިފާޢީ ވުޒާރާއިން ނެރުނު ބަޔާނަށް ޔޫކްރެއިނުން ރައްދުދީފައެއް ނުވެއެވެ. ބަޚްމުތަށް އަރާފައިވާ ރަޝިޔާގެ ފައުޖުތައް ފަހަތަށް ޖައްސައި، ކުރިއެރުންތަކެއް ހޯދާފައިވާ ކަމުގައި ޔޫކްރެއިނުން ހުސްވި ހަފުތާތަކުގެ ތެރޭގައި ބުނެފައިވެއެވެ. "ބަޚްމުތްގެ ހާލަތު ވަރަށް ނުރައްކާތެރި. އެ ރަށުގައި އަދިވެސް ދަނީ ވަރުގަދައަށް ހަނގުރާމަ ކުރަމުން. ޔޫކްރެއިން ސިފައިން އެ ރަށުގެ ބައެއް ސަރަޙައްދުތަކުގައި އަދިވެސް އެބަތިބި،" ޔޫކްރެއިންގެ ދިފާޢީ ވަޒީރުގެ ނައިބު ހެނާ މާލިއާރް ވިދާޅުވިއެވެ.
ބަޚްމުތްގެ ހުޅަނގާއި އުތުރުގެ އިތުރުން ދެކުނުގައިވާ ބައެއް ސަރަޙައްދުތައް ޔޫކްރެއިން ސިފައިން މިނިވަންކޮށްފައިވާ ކަމަށް ޔޫކްރެއިނުން ވަނީ ބުނެފައެވެ. ރަޝިޔާއިން ވެސް މީގެ ކުރިން ވަނީ އެ ކަން ކަށަވަރު ކޮށްދީފައެވެ. ޔޫކްރެއިނުން ބުނީ، އަމާޒަކީ ޔޫކްރެއިންގެ އެކި ސަރަޙައްދުތަކަށް ފޮނުވާފައިވާ ރަޝިޔާގެ ސިފައިން ފައުޖުތައް ބަޚްމުތަށް ޖަމާކުރުން ކަމުގައެވެ. މިއީ، ރަޝިޔާގެ އިސްތިއުމާރީ ސިފައިންނާ ދެކޮޅަށް ފަށަން ތައްޔާރުވަމުންދާ އަސްކަރީ ކެމްޕޭނަށް މުހިންމު އުކުޅެއް ކަމުގައި މަސްރަޙު ދިރާސާކުރާ ފަރާތްތަކުން ދެކެއެވެ.