އެމެރިކާގައި އުފައްދާ "އެފް-16" މަރުކާގެ އަސްކަރީ މަތިންދާބޯޓު ޔޫކްރެއިނަށް ފޮނުވަން އެމެރިކާގެ ރައީސް ޖޯ ބައިޑަން ހުއްދަ ދެއްވައިފިއެވެ. އެފް-16 މަރުކާގެ އަސްކަރީ މަތިންދާބޯޓަކީ އެންމެ ފަހުގެ ޒަމާނީ ޓެކްނޮލޮޖީގެ ގާބިލުކަން ލިބިފައިވާ މަތިންދާބޯޓުތަކެކެވެ. ޒަމާނީ އަސްކަރީ މަތިންދާބޯޓު ލިބުމަކީ، ރަޝިޔާގެ އަތްދަށުން މިނިވަންކަން ހޯދަން ޔޫކްރެއިނުން ކުރަމުންދާ ހަނގުރާމައަށް ލިބޭނެ ބޮޑު ކުރިއެރުމެއްގެ ގޮތުގައި ޔޫކްރެއިނުން ސިފަކުރެއެވެ.
ޔޫކްރެއިނަށް އެފް-16 މަރުކާގެ އަސްކަރީ މަތިންދާބޯޓު ފޯރުކޮށްދިނުމަށް ހުއްދަ ދެއްވާފައިވާ ކަން ބައިޑަން އިޢުލާނު ކުރައްވާފައި ވަނީ ޖަޕާނުގައި މިހާރު ކުރިއަށްދާ އިޤުތިޞާދީ ގޮތުން އެންމެ ކުރިއަރާފައިވާ ގްރޫފް އޮފް ސެވަން (ޖީ7)ގެ މެންބަރު ޤައުމުތަކުގެ އިސްވެރިންގެ ސަމިޓުގައެވެ. ތިން ދުވަހުގެ މުއްދަތަށް ކުރިއަށްދާ މި ސަމިޓު މި އަހަރު ބާއްވަނީ ހިރޮޝީމާގައެވެ.
އެމެރިކާގެ ޤައުމީ ސަލާމަތާ ބެހޭ މުޝީރު ޖޭކް ސަލިވަން ވިދާޅުވީ، އެފް-16 މަރުކާގެ އަސްކަރީ މަތިންދާބޯޓު ޔޫކްރެއިނަށް ފޮނުވަން ބައިޑަން ހުއްދަ ދެއްވާފައިވީ ނަމަވެސް، އެ ތަކެތި ފޯރުކޮށްދޭނީ ނޭޓޯގެ އެހެން މެންބަރު ޤައުމުތަކުން ކަމުގައެވެ. އެމެރިކާގެ ސްޓޮކް ބޭނުންކޮށްގެން ޔޫކްރެއިނަށް މަތިންދާބޯޓު ފޮނުވަން އެމެރިކާއިން ނިންމާފައި ނުވާ ކަމުގައި ވެސް އޭނާ ވިދާޅުވިއެވެ.
ނަމަވެސް، އެފް-16 މަރުކާގެ މަތިންދާބޯޓު ޔޫކްރެއިނަށް ފޮނުވުމުގެ ކުރިން އެ ޤައުމުގެ ޕައިލެޓުން ތަމްރީނު ކުރުމަށް އެމެރިކާއިން އެހީތެރިކަން ފޯރުކޮށްދޭނެ ކަމުގައި ވެސް ސަލިވަން ވިދާޅުވިއެވެ. އެފް-16 މަރުކާގެ މަތިންދާބޯޓު ބޭނުންކުރަން ޔޫކްރެއިންގެ ޕައިލެޓުން ތަމްރީނުކޮށް، މަތިންދާބޯޓު އެ ޤައުމަށް ފޯރުކޮށްދޭން 18 މަސްދުވަސް ހޭދަވާނެ ކަމަށް އެމެރިކާއިން ވަނީ ބުނެފައެވެ. އެމެރިކާގެ ޤާނޫނު ބުނާ ގޮތުން، އެ ޤައުމުގައި އުފައްދާ ހަތިޔާރު ވިއްކާފައިވާ އެހެން ޤައުމަކަށް އެ ތަކެތި އެހެން ފަރާތަކަށް ވިއްކޭނީ ނުވަތަ ފޯރުކޮށްދެވޭނީ އެމެރިކާގެ ހުއްދައާ އެކުގައެވެ.
އެމެރިކާގެ ނިންމުމާ އެކު ޔޫކްރެއިންގެ ޕައިލެޓުން ތަމްރީނުތައް ފުރިހަމަ ކުރާނީ ވިލާތުގެ ޤައުމުތަކުގައެވެ. އަދި، ޑެންމާކުގެ ދިފާޢީ ވަޒީރު ވަނީ، އެ ޤައުމުގައި ޔޫކްރެއިންގެ ޕައިލެޓުން ތަމްރީނު ކުރުމުގެ މަސައްކަތް ފެށުމަށް ތައްޔާރަށް ހުންނެވި ކަމުގައި ވިދާޅުވެފައެވެ.
ޔޫކްރެއިނަށް ޒަމާނީ އަސްކަރީ މަތިންދާބޯޓު ފޯރުކޮށްދޭނެ ކަން ނޭޓޯގެ ބައެއް މެންބަރު ޤައުމުތަކުން ވަނީ އިޢުލާނު ކޮށްފައެވެ. މި ކަމުގައި ނެދަލެންޑްސްއާ ގުޅިގެން މަސައްކަތް ކުރާނެ ކަމުގައި އިނގިރޭސިވިލާތުން ވަނީ ބުނެފައެވެ. ނަމަވެސް، އޭގެ ތެރޭގައި އެފް-16 މަރުކާގެ މަތިންދާބޯޓު ހިމެނޭ ކަން އެއްވެސް ޤައުމަކުން އަދި ހާމަކޮށްފައެއް ނުވެއެވެ. ހިރޮޝީމާގައި ކުރިއަށްދާ ސަމިޓުގެ ހަވާސާގައި ޔޫކްރެއިންގެ ރައީސް ވޮލޮޑޮމީރް ޒެލެންސްކީއާ ބައްދަލުކުރައްވައި ވާހަކަފުޅު ދައްކަވަމުން އިނގިރޭސިވިލާތުގެ ބޮޑުވަޒީރު ރިޝީ ސުނަކް ވަނީ މި ޚަބަރު އޭނާއަށް ދެއްވާފައެވެ.
ޔޫކްރެއިނަށް އެންމެ ފަހުގެ ޒަމާނީ އަސްކަރީ މަތިންދާބޯޓު ފޯރުކޮށްދޭން ނޭޓޯގެ ބައެއް ޤައުމުތަކުން ނިންމުމުން ރަޝިޔާއިން ވަނީ މި ކަމާ މެދު ކަންބޮޑުވުން ފާޅުކޮށް އިންޒާރު ދީފައެވެ. ރަޝިޔާގެ ޚާރިޖީ ވަޒީރުގެ ނައިބު އެލެގްޒެންޑަރ ގްރުޝްކޯ ވިދާޅުވީ އެފް-16 މަރުކާގެ މަތިންދާބޯޓު ޔޫކްރެއިނަށް ފޮނުވުމަކީ އެ ޤައުމުތަކަށް ހެދޭނެ އެންމެ ބޮޑު ގޯހަށް ވާނެ ކަމުގައެވެ.
"ނޭޓޯގެ ޤައުމުތަކުން މަސައްކަތް ކުރަމުން އެ ދަނީ މަސްރަޙު އިތުރަށް ގޯސްކުރަން. ޔޫކްރެއިނަށް ޒަމާނީ އަސްކަރީ މަތިންދާބޯޓު ފޮނުވުމަކުން ރަޝިޔާގެ ރޭވުންތަކަށް ބަދަލެއް ނާންނާނެ. ރަޝިޔާގެ ލަނޑުދަނޑިތައް ހާސިލް ކުރުމުގެ ފުރިހަމަ ގާބިލުކަމާއި ވަސީލަތްތައް އެބަހުރި،" ގްރުޝްކޯ ވިދާޅުވިއެވެ.
2022 ވަނަ އަހަރުގެ ފެބުރުވަރީ މަހުގެ 24 ވަނަ ދުވަހު ރަޝިޔާއިން ފެށި ހަނގުރާމައިގެ ފުރަތަމަ ދުވަހުން ފެށިގެން ވެސް ޒަމާނީ ހަތިޔާރު ހޯދަން ޒެލެންސްކީ ގެންދެވީ މަސައްކަތް ކުރައްވަމުންނެވެ. އަދި، ޒަމާނީ އަސްކަރީ މަތިންދާބޯޓަކީ ރަޝިޔާގެ އިސްތިއުމާރީ ސިފައިންގެ އަތްދަށުން ޔޫކްރެއިން މިނިވަން ކުރަން ކޮންމެހެން ބޭނުން ހަތިޔާރެއް ކަމުގައި އޭނާ ގެންދެވީ ވިދާޅުވަމުންނެވެ.
ޔޫކްރެއިން އަސްކަރިއްޔާގައި ޒަމާނީ އަސްކަރީ މަތިންދާބޯޓުތަކެއް ނުހުރެއެވެ. އަދި، މިހާރު ބޭނުން ކުރަމުން ދަނީ ކުރީގެ ރޫސީ ވިލާތުގެ ޒަމާނުގައި އުފައްދާފައިވާ މަތިންދާބޯޓުތަކެވެ. ޕޮލެންޑާއި ސްލޮވާކިޔާއިން ދާދި ފަހުން ވަނީ ޔޫކްރެއިނަށް "މިގް-29" މަރުކާގެ 27 އަސްކަރީ މަތިންދާބޯޓު ފޯރުކޮށްދީފައެވެ. އެއީ ވެސް، ރޫސީ ވިލާތުގެ ޒަމާނުގައި އުފައްދާފައިވާ މަތިންދާބޯޓުތަކެކެވެ.