ރަޝިޔާއިން ޔޫކްރެއިނުގައި ފަށާފައިވާ ހަނގުރާމައާ ގުޅިގެން އެ ޤައުމާ ދެކޮޅަށް އަޅާފައިވާ ދަތިކުރުމުގެ ފިޔަވަޅުތައް އިތުރަށް ހަރުކަށި ކުރަން އިޤުތިޞާދީ ގޮތުން އެންމެ ކުރިއަރާފައިވާ ގްރޫފް އޮފް ސެވަން (ޖީ7)ގެ މެންބަރު ޤައުމުތަކުން ނިންމައިފިއެވެ. އެ އިއްތިހާދުން މި ގޮތަށް އަމަލުކުރަން ނިންމާފައި ވަނީ ޖަޕާނުގެ ހިރޮޝީމާގައި ކުރިއަށްދާ އެ އިއްތިހާދުގެ އިސްވެރިންގެ ސަމިޓުގައެވެ.
މި ބައްދަލުވުމުގައި ބައިވެރިވެ ވަޑައިގެންނެވުމަށް ޔޫކްރެއިންގެ ރައީސް ވޮލޮޑޮމީރް ޒެލެންސްކީ ވެސް ވަނީ ޖަޕާނަށް ވަޑައިގަންނަވާފައެވެ. ރަޝިޔާއިން ޔޫކްރެއިނަށް އަރައި ހަނގުރާމަ ފަށާފައި ވަނީ މީގެ 15 މަސް ކުރިން 2022 ވަނަ އަހަރުގެ ފެބުރުވަރީ މަހުގެ 24 ވަނަ ދުވަހުއެވެ. އެއީ، ހަނގުރާމައެއްގެ ގޮތުގައި ރަޝިޔާއިން ނުދެކެވެ.
މި ހަނގުރާމައާ ގުޅިގެން ހުޅަނގުގެ ބާރުތަކުން ރަޝިޔާއާ ދެކޮޅަށް އަޅާފައިވާ ދަތިކުރުމުގެ ފިޔަވަޅުތައް އިތުރަށް ހަރުކަށި ކުރުމުގެ ގޮތުން، އެ ޤައުމަށް އެކްސްޕޯޓު ކުރާ މުދަލުގެ ޢަދަދު މަދު ކުރަން ޖީ7ގެ ޤައުމުތަކުން ވަނީ އެއްބަސްވެފައެވެ. ރަޝިޔާއަށް އެކްސްޕޯޓު ކުރުން މަދުކުރުމަށް ނިންމާފައިވާ ތަކެތީގެ ތެރޭގައި ހިމެނެނީ އެ ޤައުމުގެ އަސްކަރިއްޔާ ކުރިއަރުވައި ހަތިޔާރު އުފައްދަން ބޭނުންކުރާ ސާމާނާއި، ސިނާޢީ އަދި ޓެކްނޮލޮޖީގެ ދާއިރާގެ އުފެއްދުންތަކަށް ބޭނުންވާ ސާމާނެވެ. އަދި، ރަޝިޔާއިން އެކި މައުދަންތައް ބޭރުކުރުން ހުއްޓުވަން ވެސް ފިޔަވަޅުތައް އެޅުމަށް ޖީ7އިން ވަނީ ނިންމާފައެވެ.
ރަޝިޔާގެ އިތުރުން ޗައިނާއާ ދެކޮޅަށް މަސައްކަތްތަކެއް ކުރުމަށް ވެސް ޖީ7ގެ މެންބަރު ޤައުމުތަކުން މަޝްވަރާ ކުރިއެވެ. ޗައިނާއަކީ ދުނިޔޭގެ އިޤުތިޞާދީ ރައްކާތެރިކަމަށް އޮތް ހުރަހެއް ކަމުގައި އެ ޤައުމުތަކުން ދެކެއެވެ. ޗައިނާއަކީ ދުނިޔޭގެ ދެވަނައަށް އެންމެ ބޮޑު އިޤުތިޞާދެވެ. ޗައިނާގެ އިޤުތިޞާދަށް އެއްވެސް ހީނަރުކަމެއް އަންނާނެ ފަދަ ކަމެއް ކުރުމަށް ޖީ7ގެ މެންބަރުން އެއްބަސްވެފައެއް ނުވެއެވެ. ނަމަވެސް، ޗައިނާއަށް ޖީ7ގެ މެންބަރު ޤައުމުތަކުން ބަރޯސާވާ މިންވަރު މަދުކުރަން އެ އިއްތިހާދުން ވަނީ ނިންމާފައެވެ.
ތައިވާނުގެ މިނިވަންކަމާ ގުޅޭ މައްސަލައާ މެދު ވެސް ޖީ7ގެ މެންބަރުން ވަނީ މަޝްވަރާ ކުރައްވާފައެވެ. އަދި، ތައިވާނުގެ މިނިވަންކަމާއި ސިޔާދަތު ހިމާޔަތް ކުރަން އެ ޤައުމަށް އެހީތެރިކަން ފޯރުކޮށްދިނުމަކީ ސަރަޙައްދީ ސުލްޙައާއި ހަމަޖެހުން ދެމެހެއްޓުމަށް މުހިންމު ފިޔަވަޅެއްގެ ގޮތުގައި އެ އިއްތިހާދުން ދެކެއެވެ. ރަޝިޔާ-ޔޫކްރެއިން ހަނގުރާމަ ނިމުމަކަށް ގެނައުމަށް ޗައިނާއިން މުހިންމު ދައުރެއް އަދާކުރެވޭނަ ކަމަށް ވެސް ޖީ7އިން ގަބޫލުކުރެއެވެ.
ޖީ7ގައި ހިމެނެނީ އެމެރިކާ، ޖަޕާން، ޖަރުމަނުވިލާތް، އިނގިރޭސިވިލާތް، ފަރަންސޭސިވިލާތް، ކެނެޑާ އަދި އިޓަލީވިލާތެވެ. ޖީ7 ގެ މެންބަރު ޤައުމުތަކުގެ އިތުރުން މި އަހަރުގެ ސަމިޓުގައި އޮސްޓްރޭލިޔާ، ބްރެޒިލް، ކޮމޮރޯސް، ކޫކް އައިލެންޑްސް، އިންޑިޔާ އަދި އިންޑޮނީޝިޔާގެ އިތުރުން ދެކުނު ކޮރެޔާއާއި ވިއެޓްނާމްގެ އިސްވެރިން ވެސް ބައިވެރިވެ ވަޑައިގަންނަވައެވެ.
ހިރޮޝީމާގައި ކުރިއަށްދާ ޖީ7ގެ އިސްވެރިންގެ ބައްދަލުވުން ތިން ދުވަހުގެ މުއްދަތަށް ކުރިއަށްދާނެއެވެ. ހިރޮޝީމާގައި ޖީ7ގެ ސަމިޓު ބާއްވަން ނިންމާފައި ވަނީ، ހަތިޔާރުގެ ވިޔަފާރި ހުއްޓުވަން ކުރަމުންދާ މަސައްކަތްތަކަށް ބާރުދިނުމުގެ ގޮތުން ކަމުގައި ޖަޕާނުގެ ބޮޑުވަޒީރު ފުމިޔޯ ކިޝިޑާ ވިދާޅުވެއެވެ.