ރާއްޖޭގެ އެންމެ ގިނަދުވަސްވީ އަދި އެންމެ ބޮޑު ސިޔާސީ ޕާޓީ، އެމްޑީޕީގެ ބޮޑު ދިދަ، މީހުން ދިރިއުޅޭ ހުރިހާ ރަށެއްގައި ނަގައިފިއެވެ. މިއީ އެމްޑީޕީގެ ރިޔާސީ ކެނޑިޑޭޓް ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙްގެ ރިޔާސީ ކެމްޕެއިން ރަސްމީގޮތުން ފަށަން ތައްޔާރުވުމުގެ ގޮތުން ހިންގި ޙަރަކާތެއްކަމަށް އެމްޑީޕީން ބުންޏެވެ.
ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙްގެ ރިޔާސީ ކެމްޕެއިން ރަސްމީގޮތުން ފެށުމަށް ހަމަޖެހިފައިވަނީ އަންނަ މަހުއެވެ. އެމްޑީޕީން ބުނީ ކެމްޕެއިން ރަސްމީގޮތުން ފެށުމުގެ ކުރިން މީހުން ދިރިއުޅޭ ހުރިހާ ރަށެއްގައި އެޕާޓީގެ ބޮޑު ދިދަ ނެގުމުގެ އިތުރުން، ޕޯސްޓަރު ހަރުކުރުމާއި، ރިޔާސީ މެނިފެސްޓޯއަށް ބޭނުންވާ މަޢުލޫމާތުތައް އެއްކުރުން ކުރިއަށްދާކަމަށެވެ.
އައްޑޫސިޓީ ހުޅުދޫގައި ކެންޕެއިން ޕޯސްޓަރ ހަރުކުރުގެ ހަރަކާތް ކުރިއަށްދަނީ.
— MDP Secretariat (@MDPSecretariat) May 19, 2023
ރިޔާސީ އިންތިޚާބުގެ ކެމްޕޭނަށް މަޢުލޫމާތު އެއްކުރުމަށް ރާއްޖޭގެ މީހުންދިރިއުޅޭ ހުރިހާ ރަށަަކަށް އެމްޑީޕީގެ މެމްބަރުން ކުރައްވާ ދަތުރުތަކުގެ ތެެރެއިން #RaajjeDhathuru#Ibu2023 pic.twitter.com/lGW5L9t9nh
އެމްޑީޕީން ބުނީ ކެމްޕެއިން ފެށުމުގެ ތައްޔާރީތަކަށް 400 އަށްވުރެ ގިނަ ޙަރަކާތްތެރިން ރަށްރަށް ގޮސްފައިވާކަމަށެވެ. އަދި އަތޮޅުތަކުގައި ތިބި ޙަރަކާތްތެރިން ހިމެނޭހެން 1000 ވުރެ ގިނަ މީހުން މި ހަރަކާތްތަކުގައި ބައިވެރިވާކަމަށް އެމްޑީޕީން ބުންޏެވެ.
އެމްޑީޕީގެ ބޮޑު ދިދަ ނެގުމުގެ ހަރަކާތް ޅ.ހިންނަވަރުގައި ކުރިއަށްދަނީ. #RaajjeDhathuru#Ibu2023 pic.twitter.com/MN0fyyHIQA
— MDP Secretariat (@MDPSecretariat) May 19, 2023
ވެރިކަންކުރާ މައި ޕާޓީ އެމްޑީޕީން މިއަހަރުގެ ރިޔާސީ އިންތިޚާބުގެ ކެމްޕެއިނާއި، މެނިފެސްޓޯ އެކުލަވައިލުމުގެ މަސައްކަތް ރޯދަމަސް ނިމުމާއެކު ފަށާނެކަމަށް އެމްޑީޕީގެ ޗެއަރޕާސަން ފައްޔާޒު އިސްމާޢީލް މީގެ ކުރިން ވިދާޅުވެފައިވެއެވެ.
އެމްޑީޕީއަކީ އަބަދުވެސް ރައްޔިތުންގެ އަޑު އަހައިގެން ރައްޔިތުންގެ އުންމީދުތަކާ އެއްގޮތަށް ވަޢުދުތައްވެ، އެވަޢުދުތައް ފުއްދާ ޕާޓީއެއްކަމަށް ފައްޔާޟް ވިދާޅުވިއެވެ. ކުރިއަށް އޮތް ރިޔަސީ އިންތިޚާބުގައި ވެސް އެމްޑީޕީން އެކުލަވައިލައި ސިޔާސަތުތައް ނުވަތަ މެނިފެސްޓޯ ބިނާވާނީ ރައްޔިތުންގެ ޚިޔާލާއި މަޝްވަރާއަށް ކަމަށްވެސް އޭނާ ވިދާޅުވިއެވެ.