އެމެޒަން ޖަންގައްޔަށް މީގެ 18 ދުވަސް ކުރިން ވެއްޓުނު މަތިންދާބޯޓުން ދަތުރުކުރި ހަތަރު ކުޑަކުދިން ސަލާމަތުން ފެނިފައިވާ ކަމަށް ބުނެވުނީ އޮޅުމަކުން ކަމުގައި ކޮލަމްބިޔާގެ ރައީސް ގުސްޓާވޯ ޕެޓްރޯ ވިދާޅުވެއްޖެއެވެ. އެ ހަތަރު ކުދިން ފެނިގެން ސަލާމަތްކޮށްފައިވާ ކަމަށް ބުނެ އޭނާ އެންމެ ފުރަތަމަ އިޢުލާނު ކުރައްވާފައި ވަނީ ކުރެއްވި ޓުވީޓެއްގައެވެ. ނަމަވެސް، އެ ޓުވީޓް މިހާރު ވަނީ ފޮހެލައްވާފައެވެ.
"އަޅުގަނޑަށް ކުރެވުނު ކުށަށް މަޢާފަށް އެދެން. އަސްކަރިއްޔާއާއި ޢާންމުން ގުޅިގެން އެ ހަތަރު ކުދިން ހޯދުމުގެ މަސައްކަތްތައް ހުއްޓައިނުލައި ދަނީ ކުރަމުން. މުޅި ޤައުމު އޮތީ އެ ކުދިންގެ ޚަބަރެއް ހޯދުމަށް ކެތް މަދުވެފައި. މި ވަގުތު އަޅުގަނޑުމެންގެ ކުރިމަތީގައި އޮތް އެންމެ ބޮޑު ޒިންމާއަކީ އެ ކުދިން ހޯދައި ސަލާމަތް ކުރުން. އެންމެ މުހިންމީ އެ ކުދިންގެ ފުރާނަ،" ޕެޓްރޯ ވިދާޅުވިއެވެ.
ޕައިލެޓުގެ އިތުރުން ހަ ފަސިންޖަރުންނާ އެކު ދަތުރު ކުރަމުންދިޔަ މަތިންދާބޯޓު ކޮލަމްބިޔާގެ ކެކޭތާ ސަރަޙައްދުގެ އެމެޒަން ޖަންގަލީގެ ތެރެއަށް ވެއްޓިފައި ވަނީ މޭ 1 ވަނަ ދުވަހުއެވެ. ޕައިލެޓާއި ދެ ފަސިންޖަރުން މި ހާދިސާގައި މަރުވެފައިވާއިރު، އޭގެ ތެރޭގައި ގެއްލިފައިވާ ހަތަރު ކުޑަކުދިންގެ މައިމީހާ ވެސް ހިމެނެއެވެ.
ގެއްލިފައި ވަނީ 13 އަހަރާއި، ނުވަ އަހަރާއި، ހަތަރު އަހަރުގެ ކުއްޖެއްގެ އިތުރުން 11 މަހުގެ ތުއްތުކުއްޖެކެވެ. ބޯޓު ވެއްޓުނު ސަރަޙައްދު ދޫކޮށް އެ ކުދިން ޖަންގަލި ތެރޭގައި ހިނގަމުންދާ ކަމަށް ބެލެވޭ ކަމުގައި އޮފިޝަލުން ވިދާޅުވިއެވެ. އެ ކުދިން ހޯދުމަށް ކޮލަމްބިޔާގެ އަސްކަރިއްޔާގެ 100 އަށްވުރެ ގިނަ ސިފައިންގެ މައްޗަށް އެކުލެވިގެންވާ ޓީމެއް ދަނީ މަސައްކަތް ކުރަމުންނެވެ.
ގެއްލިފައިވާ ހަތަރު ކުދިންގެ މާމަ ފިޑެންސިޔޯ ވެލެންސިޔާ ބުނީ އެ ކުދިން ދިރިހުއްޓާ ފެންނާނެ ކަމުގެ އުންމީދު ބޮޑު ކަމުގައެވެ. އަދި، އޭގެ ތެރެއިން ދޮށްޓަށް ތިބި ތިން ކުދިންނަކީ ވަލުތެރޭގައި ދިރިއުޅެން ފަރިތަ ތިން ކުދިން ކަމުގައި ވެސް އެ ކުދިންގެ މާމަ ކިޔައިދިނެވެ. އެއީ ކޮލަމްބިޔާގެ ޖަންގަލިތަކުގައި ދިރިއުޅޭ ވިޓޯޓާ ދަރިކޮޅަށް ނިސްބަތްވާ ކުދިންތަކެކެވެ. މިނިކާ ޖަނަވާރު ވެސް ދިރިއުޅޭ ޖަންގަލީގެ ތެރޭގައި އެ ކުދިން ފިލާ ތިބި ކަމަށް ބެލެވޭ އިރު، މޫސުން ގޯސްވެ ބޯކޮށް ވާރޭވެހެމުން ދިޔުމާ ގުޅިގެން އެ ކުދިން ހޯދުމަށް ކުރަމުންދާ މަސައްކަތްތަކަށް ވަނީ ހުރަސް އެޅިފައެވެ.
އެ ކުދިން ގެންގުޅުނު ކަމަށް ބެލެވޭ ކަތުރަކާއި ބޫޓު ކިބައަކާއި ބޮލުގައި އައްސާ ރަބަރުކޮޅެއްގެ އިތުރުން ތުއްތު ކުއްޖެއްގެ ބުއްފުޅިއެއް ޖަންގަލީގެ ތެރެއިން ވަނީ ފެނިފައެވެ. އަދި، އެއްފަޅި ކައިފައިވާ މޭވާއެއް ފެނިފައިވާ ކަމަށް ވެސް އެ ކުދިން ހޯދުމުގެ މަސައްކަތުގައި ހަރަކާތްތެރިވާ ސިފައިންގެ ޓީމުން ބުނެއެވެ.
ވެއްޓުނު ބޯޓުގައި ތިބި ޕައިލެޓާއި އިތުރު ދެ މީހުންގެ ހަށިގަނޑު ފެނިފައި ވަނީ މޭ 15 ވަނަ ދުވަހުއެވެ. މަތިންދާބޯޓު ވެއްޓިފައި ވަނީ އެމެޒަން ޖަންގަލީގެ ރަށެއް ކަމުގައިވާ ސަން ހޯސޭ ޑެލް ގުއަވިއަރޭން ފުރައިގެން ދަތުރުކުރަމުން ދަނިކޮށެވެ. މަތިންދާބޯޓު ވެއްޓެން މެދުވެރިވި ސަބަބު ދެނެގަނެވިފައި ނުވާއިރު، އޮފިޝަލުން މިހާރު ދަނީ އެ ކަން ތަހުޤީޤު ކުރަމުންނެވެ. ނަމަވެސް، ބޯޓުގެ އިންޖީނަށް މައްސަލައެއް ކުރިމަތިވެފައިވާ ކަން، ބޯޓާ ގުޅުން ކެނޑުމުގެ ކުޑަ ވަގުތުކޮޅެއް ކުރިން ޕައިލެޓް ވަނީ ރިޕޯޓުކޮށްފައެވެ.