ރަޝިޔާއިން ޔޫކްރެއިންގެ ރަށްތަކަށް އަމާޒުކޮށް ދިން ވަރުގަދަ ޙަމަލާތަކެއްގައި ޢާންމުންގެ އަށް މީހުން މަރުވެއްޖެއެވެ. މީގެ ތެރެއިން، ޚަރްސަން ސަރަޙައްދުގައި އޮންނަ ޒެލެނީވްކާއަށް ދިން ޙަމަލާތަކުގައި ތިން މީހުން މަރުވެފައިވާއިރު އޭގެ ތެރޭގައި ފަސް އަހަރުގެ ކުޑަކުއްޖަކު ވެސް ހިމެނޭ ކަމުގައި ޚަރްސަންގެ ގަވަރުނަރު އޮލެގްޒެންޑަރ ޕްރޮކުޑިން ވިދާޅުވިއެވެ.
ޒެލެނީވްކާއަށް ދިން ޙަމަލާތަކުގެ ތެރެއިން އެއް ޙަމަލާ އަރާފައި ވަނީ ސުޕަރމާކެޓަކަށެވެ. މި ޙަމަލާގައި އިތުރު ދެ މީހުން ޒަޚަމުވި ކަމުގައި ވެސް ޕްރޮކުޑިން ވިދާޅުވިއެވެ. "ރަޝިޔާއިން މި ވަނީ ޒެލެނީވްކާގެ ޢާންމުންނަށް އަމާޒުކޮށް ނުރައްކާތެރި ޓެރެރިސްޓު ޙަމަލާތަކެއް ދީފައި. އެއް ޙަމަލާ އަމާޒުކޮށްފައި ވަނީ ޢާންމުން ދިރިއުޅޭ ސަރަޙައްދެއްގައި ހުންނަ ފިހާރައަކަށް،" ރައީސް ވޮލޮޑޮމީރް ޒެލެންސްކީ ވިދާޅުވިއެވެ. އަދި، މި ފަދަ ޙަމަލާތައް ހުއްޓުވަން ބައިނަލްއަޤުވާމީ މުޖުތަމަޢުން ރަޝިޔާއަށް އިތުރު ފިއްތުންތައް ކުރިމަތިކުރުމަށް ވެސް އޭނާ ވަނީ ގޮވައިލައްވާފައެވެ.
ފަސް އަހަރުގެ ކުޑަކުއްޖާ މަރުވެފައި ވަނީ ހޮސްޕިޓަލަށް ގެންގޮސް ފަރުވާދެމުން ދަނިކޮށް ކަމުގައި ޕްރޮކުޑިން ވިދާޅުވިއެވެ. މި ޙަމަލާގައި މަރުވި މީހުންގެ ތެރޭގައި އެ ކުއްޖާގެ ކާފަވެސް ހިމެނެއެވެ. އަދި، މި ޙަމަލާތަކުގައި ޒަޚަމުވި 16 އަހަރުގެ އެހެން ކުއްޖަކު ވެސް ހޮސްޕިޓަލުގައި އެޑްމިޓްކޮށްގެން މިހާރު ދަނީ ފަރުވާ ދެމުންނެވެ.
ރަޝިޔާގެ ޙަމަލާތަކުގެ ރައްދުގައި ޔޫކްރެއިނުން ވެސް ވަނީ ޑޮނެޓްސްކުގެ ބައެއް ސަރަޙައްދުތަކަށް ޙަމަލާދީފައެވެ. ޑޮނެޓްސްކަކީ ރަޝިޔާއިން އަތްގަދަ ކޮށްފައިވާ ޔޫކްރެއިނުގެ ދޮންބާސްގައި އޮންނަ އޮންނަ ސަރަޙައްދެކެވެ. ޑޮނެޓްސްކަށް ޔޫކްރެއިނުން ދިން ޙަމަލާތަކުގައި ފަސް މީހުން މަރުވެ، އިތުރު 15 މީހުން ޒަޚަމުވި ކަމުގައި ރަޝިޔާއިން އެ ސަރަޙައްދަށް ކަނޑައަޅާފައި ހުންނަ މޭޔަރު އެލެކްސީ ކޫލެމްޒިން ބުންޏެވެ.
ކޫލެމްޒިން ބުނީ ޔޫކްރެއިނުން ޑޮނެޓްސްކުގެ އެކި ސަރަޙައްދުތަކަށް އާޓިލަރީ ބަޑިން 163 ޙަމަލާއާއި 20 ރޮކެޓް ޙަމަލާ ދީފައިވާ ކަމުގައެވެ. މި ޙަމަލާތަކުގައި މަރުވި މީހުންގެ ތެރޭގައި 13 އަހަރުގެ ކުޑަކުއްޖަކު ހިމެނޭ ކަމުގައި ވެސް އޭނާ ބުންޏެވެ. ޔޫކްރެއިންގެ ޙަމަލާތައް އަމާޒުކޮށްފައި ވަނީ ޢާންމުން ދިރިއުޅޭ ޢިމާރާތްތަކަށް ކަމަށާއި، މި ޙަމަލާތަކުގައި 23 މީހުން ޒަޚަމުވި ކަމުގައި ވެސް ރަޝިޔާގެ އޮފިޝަލަކު ބުންޏެވެ.
ޔޫކްރެއިންގެ ދެކުނުގައިވާ އޮޑެސާއަށް ވެސް ރަޝިޔާއިން ވަނީ ވަރުގަދަ ޙަމަލާތަކެއް ދީފައެވެ. މީގެ ތެރެއިން، އެ ރަށުގައި ހުންނަ ސިނާޢީ މަސައްކަތްތައް ކުރާ ކާރުޚާނާއަކަށް ދިން ޙަމަލާއެއްގައި އެކަކު މަރުވިއެވެ. މި ޙަމަލާތަކުގައި އިތުރު ދެ މީހުން ޒަޚަމުވިއެވެ. އަދި، ވެރިރަށް ކީވަށް އަމާޒުކޮށް ރަޝިޔާއިން ފޮނިވައިލި މިސައިލްތަކެއް ޔޫކްރެއިނުން ވައްޓައިލުމުން ދެ ސަރަޙައްދެއްގައި އަލިފާން ރޯވި ކަމަށް ވެސް ޔޫކްރެއިނުން ބުނެއެވެ. ކީވަށް ޙަމަލާދޭން ރަޝިޔާއިން ބޭނުންކޮށްފައި ވަނީ ކްރޫޒް މިސައިލްތަކެކެވެ.