އިޓަލީވިލާތުގެ އިރުމަތީ ސަރަޙައްދުތަކަށް ބޯކޮށް ވާރޭވެހި ފެންބޮޑުވުމާ ގުޅިގެން ހިނގި އެކި ހާދިސާތަކުގައި މަރުވި މީހުންގެ ޢަދަދު ނުވައަކަށް އަރައިފިއެވެ. އެ ޤައުމުގެ އުތުރުގައިވާ އެމީލިޔާ-ރޮމާޏާ ސަރަޙައްދަށް ބޯކޮށް ވާރޭވެހުމާ ގުޅިގެން ބައެއް ހިސާބުތަކުގެ ބިންގަނޑު ކަނޑައިގެން ގޮސްފައިވެއެވެ. އަދި، ފެންބޮޑުވެފައިވާ ސަރަޙައްދުތަކުގައި ދިރިއުޅޭ އެތަކެއް ހާސް މީހުން ވަނީ ރައްކާތެރި ހިސާބުތަކަށް ބަދަލުކޮށްފައެވެ.
އެ ޤައުމުގެ ސިވިލް ޕްރޮޓެކްޝަން މިނިސްޓަރު ނެއްލޯ މުޝޫމެޗީ ވިދާޅުވީ، އަހަރެއްގެ މައްޗަށް އެވްރެޖުކޮށް ވާރޭވެހޭ މިންވަރުގެ ދެބައިކުޅަ އެއްބަޔާ އެއްވަރަށް ފާއިތުވި 36 ގަޑިއިރުގެ ތެރޭގައި އެމީލިޔާ-ރޮމާޏާއަށް ވާރޭވެހިފައިވާ ކަމުގައެވެ. ބޯކޮށް ވާރޭވެހި ކޯރުތައް ފުރިގެން ބަންޑުންވެ، ޢާންމުން ދިރިއުޅޭ ސަރަޙައްދުތަކާއި ދަނޑުބިންތަކުގައި ފެންބޮޑުވެފައިވާ ކަމުގައި އޭނާ ވިދާޅުވިއެވެ.
ފެންބޮޑުވުމުގެ އަސަރު އެމީލިޔާ-ރޮމާޏާގެ 37 އަވަށަކަށް ކޮށްފައިވާއިރު، އެންމެ ބޮޑު ގެއްލުމެއް ލިބިފައި ވަނީ އެޑްރިޓޭޓިކް ކަނޑުގެ އައްސޭރިފަށުގައި އޮންނަ ރަވެންނާއަށެވެ. އެ ރަށުގައި ދިރިއުޅޭ 14,000 އަށްވުރެ ގިނަ މީހުން ރައްކާތެރި ހިސާބުތަކަށް ބަދަލުކޮށްފައިވާ ކަމުގައި އޮފިޝަލުން ވިދާޅުވެއެވެ.
ހުއްޓައިނުލައި ބޯކޮށް ވާރޭވެހުމާ ގުޅިގެން 120 ސަރަޙައްދެއްގެ ބިންގަނޑު ކަނޑައިގެން ގޮސް ކިސަޑު ފައިބާފައިވާ ކަމުގައި ވެސް އޮފިޝަލުން ވިދާޅުވެއެވެ. އަދި، ބޮލޯންޏާ ކައިރީގައި އޮންނަ ރަށެއްގައި ބްރިޖެއް ވެސް ވަނީ ވެއްޓިފައެވެ. ފެންބޮޑުވުމާ ގުޅިގެން އެމީލިޔާ-ރޮމާޏާގެ ގިނަ ސަރަޙައްދުތަކުގައި ރޭލު ދަތުރުފަތުރުގެ ޚިދުމަތް ވެސް ވަނީ މެދުކެނޑިފައެވެ.
މި ހާދިސާތަކުގައި މަރުވި ނުވަ މީހެއްގެ ހަށިގަނޑު މިހާތަނަށް ފެނިފައިވާއިރު، ހާލުގައި ޖެހިފައިވާ އެތަކެއް ހާސް މީހުންނަށް އެހީތެރިކަން ފޯރުކޮށްދިނުމަށް އޮފިޝަލުން ދަނީ މަސައްކަތް ކުރަމުންނެވެ. މުޝޫމެޗީ ވިދާޅުވީ، އެ މީހުންނަށް އެހީތެރިކަން ފޯރުކޮށްދިނުމަށް 22 މިލިޔަން އެމެރިކާ ޑޮލަރު ހޯދަން ކެބިނެޓަށް ހުށަހަޅުއްވާނެ ކަމުގައެވެ. ނަމަވެސް، ކެބިނެޓް ބައްދަލުވުމެއް ދެން ބޭއްވުމަށް ހަމަޖެހިފައި އޮތީ މޭ 23 ވަނަ ދުވަހު ކަން ފާހަގަކޮށްލަން ޖެހެއެވެ.
މިއީ، މި ހިނގާ މޭ މަހުގެ ތެރޭގައި އެމީލިޔާ-ރޮމާޏާއަށް ބޯކޮށް ވާރޭވެހި ފެންބޮޑުވެފައިވާ ދެވަނަ ފަހަރެވެ. މޭ މަހުގެ ކުރީކޮޅު ފެންބޮޑުވުމާ ގުޅިގެން ހިނގި އެކި ހާދިސާތަކުގައި ދެ މީހަކު މަރުވިއެވެ. އެ ސަރަޙައްދަށް ބޯކޮށް ވާރޭވެހިފައި މި ވަނީ، ގިނަ ދުވަސްތަކެއް ވަންދެން ހަނަފަސްކަމާ ކުރިމަތިވުމަށް ފަހުއެވެ. އެމީލިޔާ-ރޮމާޏާގެ ބައެއް ސަރަޙައްދުތަކަށް 36 ގަޑިއިރުގެ ތެރޭގައި 1,000 މިލިމީޓަރުގެ ވާރޭވެހިފައިވާއިރު، އެހެން ސަރަޙައްދުތަކަށް 200 އާއި 500 މިލިމީޓަރާ ދެމެދުގެ މިންވަރަކަށް ވާރޭވެހިފައިވެއެވެ.