އިޒްރޭލުގެ ބާރުތަކުން ފަލަސްޠީނާ ދެކޮޅަށް ފެށި ލާއިންސާނީ އަމަލުތައް ކުށްވެރިކޮށް އެކަން ފާހަގަކުރުމަށް އދ.ގެ މައި މަރުކަޒުގައި ފުރަތަމަ ފަހަރަށް ބޭއްވި ޖަލްސާގައި ފަލަސްޠީނުގެ މިނިވަން ދައުލަތެއް އުފެއްދުމަށް ގޮވާލާ ގޮވާލުން ރާއްޖެއިން ތަކުރާރުކުރައްވައިފިއެވެ.
އިޒްރޭލުގެ ބާރުތަކުން 1948ގައި ފެށި ލާއިންސާނީ ޢަމަލުތަކުގައި އެތައް ލައްކަ ފަލަސްޠީނު ރައްޔިތުންނެއް މަޖުބޫރުކަމާއެކު އެމީހުންގެ ޤައުމުން ނެރެ ފަލަސްޠީނުގެ އެތައް ސަތޭކަ އަވަށެއް ފަޅުކޮށް، އެތައް ހާސް ރައްޔިތުންނެއް ވަނީ ޝަހީދުކޮށްލާފައެވެ. މިޙާދިސާއަށް ފަލަސްޠީނުގައި ކިޔައި އުޅެނީ ނަކްބާއެވެ. ނަކްބާ ފާހަގަކޮށް އެކަންކަމާ ދެކޮޅަށް އ.ދ.ގެ މައި މަރުކަޒުގައި ފުރަތަމަ ފަހަރަށް ވަނީ ޚާއްސަ އިޙްތިފާލެއް ބާއްވާފައެވެ.
މި އިޙްތިފާލްގައި ނަކްބާއަށް 75އަހަރު ފުރުން އ.ދ.ގައި ފާހަގަކުރުމަށް ގޮވާލައި އ.ދ.ގެ ޢާއްމު މަޖިލީހަށް ހުށަހެޅި ޤަރާރު ފާސްކުރުމަށް ދިވެހިރާއްޖެއިން ވަނީ ވޯޓުދެއްވާފައެވެ. މިޤަރާރު ފާސްވެފައިވަނީ އ.ދ.ގެ މެމްބަރު ޤައުމުތަކުގެ ތެރެއިން 90 ޤައުމުގެ ތާއީދާއެކުއެވެ.
މި އިޙްތިފާލްގައި ރާއްޖެއިން ވަނީ ފަލަސްޠީނުގެ ރައްޔިތުންގެ އުނިނުކުރެވޭނެ ޙައްޤުތައް ހޯދުމަށް އެރައްޔިތުން ކުރަމުންދާ މަސައްކަތްތަކަށް އެއްވެސް ޝަރުތަކާނުލާ ރާއްޖެއިން ފުރިހަމައަށް ތާއީދުކުރާކަން ތަކުރާރުކޮށްފައެވެ. އެގޮތުން 1967 ވަނަ އަހަރުގެ ކުރިން ކަނޑައަޅާފައިވާ އިންތަކުގެ މައްޗަށް ޤާއިމުކޮށްފައިވާ، އިރުމަތީ ޤުދުސް ވެރިރަށެއްގެ ގޮތުގައި ކަނޑައެޅިފައިވާ، މިނިވަން، މުސްތަޤިއްލު ފަލަސްޠީނުގެ ދައުލަތެއް އުފެއްދުމަށް ދިވެހިރާއްޖެއިން ތާއީދުކުރާކަން މިބަޔާނުގައި ވަނީ ފާހަގަކޮށްފައެވެ. އަދި މިނިވަން، މުސްތަޤިއްލު، ފަލަސްޠީނެއް ޤާއިމުވުމާ ހަމައަށް ފަލަސްޠީނުގެ ރައްޔިތުންނާއެކު ދެގޮތެއްނުވެ ސާބިތުކަމާއެކު ދެމިތިބޭނެކަން ރާއްޖޭގެ ބަޔާނުގައިވެއެވެ.
1948ވަނަ އަހަރުން ފެށިގެން މިއަދާ ހަމައަށްވެސް، ފަލަސްޠީނުގެ ރައްޔިތުންނާ ދެކޮޅަށް އިޒްރޭލުން ލާއިންސާނީ ޢަމަލުތައް ހުއްޓުމެއް ނެތި ހިންގަމުންދާކަން ފާހަގަކޮށް، ރާއްޖެއިން ވަނީ އެޢަމަލުތައް އެންމެ ހަރުކަށި ޢިބާރާތުން ކުށްވެރިކޮށްފައެވެ. އަދި އިޒްރޭލުގެ ޢަމަލުތަކުގެ ސަބަބުން މެދުއިރުމަތީގައި ޞުލްޙަ ޤާއިމުކުރުމަށް ހުރަސްއެޅޭކަން ފާހަގަކޮށް، އިޒްރޭލުން ޣައްޒާގައި ހިންގަމުންދާ ޤާނޫނާ ޚިލާފު ޢަމަލުތައް ވަގުތުން ހުއްޓާލުމަށާއި ޤާނޫނާ ޚިލާފަށް ޣައްޒާ ޙިޞާރުކޮށްގެން ތިބި ތިބުން ހުއްޓާލުމަށާއި ފަލަސްޠީނުގެ ރައްޔިތުންނަށް އެހީވުމަށް ރާއްޖެއިން ގޮވާލިއެވެ.
ފަލަސްޠީނުގައި ޔަހޫދީ ދައުލަތެއް އުފެއްދުމަށްޓަކައި ޒަޔަނިސްޓު ބާރުތަކުން ފަލަސްޠީނުގެ ރައްޔިތުންނާ ދެކޮޅަށް 1948 ވަނަ އަހަރުގެ މެއި މަހުގެ 14 ވަނަ ދުވަހު ފެށި ލާއިންސާނީ ޢަމަލުތައް ކުށްވެރިކޮށް އެޙާދިސާ ހިނގިތާ މިއަހަރަށް މިވަނީ 75 އަހަރު ފުރިފައެވެ.