ރައްޔިތުންގެ މަޖިލީހުގެ ނާއިބު ރައީސްކަމުގެ މަޤާމުން ގަލޮޅު އުތުރު ދާއިރާގެ މެންބަރު އީވާ ޢަބްދުﷲ ވަކިކުރެއްވުމަށް އެމްޑީޕީގެ ޕާލިމަންޓްރީ ގްރޫޕްގެ އިއްތިފާޤުން ނިންމަވައިފިއެވެ.
އީވާ މެންބަރުކަމުން ވަކިކުރެއްވުމަށް ފާސްވީ ޕީޖީ ގްރޫޕްގެ ބައްދަލުވުމުގެ އިއްތިފާޤުން ކަމަށް ޕީޖީ ލީޑަރު މުޙައްމަދު އަސްލަމް ވަނީ ޕީއެސްއެމް ނިއުސްއަށް ކަށަވަރުކޮށްދެއްވައިފައެވެ.
އެމްޑީޕީގެ ސުޕަރ މެޖޯރިޓީއާއެކު ރައްޔިތުންގެ މަޖިލީހަށް އިންތިޚާބުވެވަޑައިގެން، މަޖިލީހުގެ ނާއިބު ރައީސްކަމަށް ޢައްޔަންކުރައްވާފައިވާ އީވާ ޢަބްދުﷲ ނާއިބު ރައީސްކަމުން ވަކިކުރެއްވުމުގެ މަސައްކަތް އެމްޑީޕީގެ ޕާލިމަންޓްރީ ގްރޫޕުން ކުރައްވަން ނިންމެވީ، އެޕާޓީން އީވާ އިއްޔެ ވަކިވެވަޑައިގަތުމާ ގުޅިގެންނެވެ.
އީވާގެ އިތުބާރު ނެތްކަމުގެ މައްސަލަ ވެއްދުމަށް މިހާރު ކުރިއަށްދަނީ މެންބަރުންގެ ސޮއި ހޯދުމުގެ މަސައްކަތެވެ. އެމްޑީޕީ ޕީޖީ ގްރޫޕުން ވިދާޅުވީ، އެމައްސަލައިގެ އިދާރީ ކަންކަން ފުރިހަމަވީހާ އަވަހަކަށް އެ މައްސަލަ މަޖިލީހަށް ވައްދާނެކަމަށެވެ.
މަޖިލިސް ޤަވާއިދު ބުނާގޮތުން މަޖިލީހުގެ ރައީސް ނުވަތަ ނާއިބު ރައީސް މަޤާމުން ވަކިކުރެވޭނީ، މަޖިލީހުގެ އެ ޖަލްސާއެއްގައި ޙާޒިރުވެ ވޯޓުގައި ބައިވެރިވި މެންބަރުންގެ އަޣްލަބިއްޔަތުން ފާސްކުރުމުންނެވެ.
އީވާ ހިމެނިވަޑައިގަންނަވާހެން އެމްޑީޕީގެ 12 މެންބަރަކު އެޕާޓީން ވަކިވެވަޑައިގެން، އެހެން ސިޔާސީ ޕާޓީއެއް އުފައްދަވާނެކަން ވަނީ އިޢުލާންކުރައްވާފައެވެ.