އެމެޒަން ޖަންގައްޔަށް މީގެ 17 ދުވަސް ކުރިން ވެއްޓުނު މަތިންދާބޯޓެއްގައި ތިބި ހަތަރު ކުޑަކުދިން ހޯދައި އެ ކުދިން ސަލާމަތްކޮށްފިއެވެ. މަތިންދާބޯޓު ވެއްޓިފައި ވަނީ ކޮލަމްބިޔާގެ ޖަންގަލީގެ ސަރަޙައްދަށެވެ. މި ހާދިސާގައި ތިން މީހުން މަރުވިއެވެ. އޭގެ ތެރޭގައި ސަލާމަތް ކުރެވުނު ހަތަރު ކުޑަކުދިންގެ މައިމީހާ ވެސް ހިމެނެއެވެ.
މީގެ ދެ ހަފުތާއެއްހާ ދުވަސް ކުރިން މަތިންދާބޯޓު ވެއްޓުނު ހާދިސާގައި ގެއްލުނު މީހުން ހޯދައި ސަލާމަތް ކުރުމަށް ކޮލަމްބިޔާގެ އަސްކަރިއްޔާއިން ވަނީ ހެލިކޮޕްޓަރުތަކާއި އެހެން ވަސީލަތްތައް ބޭނުންކޮށްގެން ބޮޑެތި މަސައްކަތްތަކެއް ކޮށްފައެވެ. އެ މަސައްކަތުގައި 100 އަށްވުރެ ސިފައިން ހަރަކާތްތެރިވެފައިވެއެވެ. މި ހާދިސާގައި ގެއްލުނު ހަތަރު ކުޑަކުދިން ސަލާމަތާއި އެކު ފެނިފައިވާ ކަން އިޢުލާނު ކުރައްވާފައި ވަނީ ކޮލަމްބިޔާގެ ރައީސް ގުސްޓާވޯ ޕެޓްރޯއެވެ.
ސަލާމަތް ކުރެވިފައި ވަނީ 13 އަހަރާއި، ނުވަ އަހަރާއި، ހަތަރު އަހަރުގެ ކުއްޖެއްގެ އިތުރުން 11 މަހުގެ ތުއްތުކުއްޖެކެވެ. އެ ކުދިން ފެނިފައި ވަނީ ކޮލަމްބިޔާގެ އެމެޒަން ޖަންގަލީގެ ކެކޭތާ ސަރަޙައްދުންނެވެ. އެ ކުދިން ފެނިފައި ވަނީ ބޯޓު ވެއްޓުނު ސަރަޙައްދާ ތަންކޮޅެއް ދުރުގައިވާ ހިސާބަކުން ކަމުގައި އޮފިޝަލުން ވިދާޅުވެއެވެ. އެމެޒަން ޖަންގައްޔަކީ ނުރައްކާތެރި މިނިކާ ޖަނަވާރު ވެސް ދިރިއުޅޭ ޖަންގައްޔެކެވެ. ނަމަވެސް، އެ ފަދަ ޖަނަވާރެއްގެ ފުށުން އެ ކުދިންނަށް އެއްވެސް ނުރައްކަލެއް ކުރިމަތިވެފައިވާ ކަމުގެ ރިޕޯޓެއް ކޮށްފައެއް ނެތެވެ.
މަތިންދާބޯޓު ވެއްޓިފައި ވަނީ މޭ މަހުގެ 1 ވަނަ ދުވަހު، އެމެޒަން ޖަންގަލީގެ ރަށެއް ކަމުގައިވާ ސަން ހޯސޭ ޑެލް ގުއަވިއަރޭން ފުރައިގެން ދަތުރުކުރަމުން ދަނިކޮށެވެ. އެ ބޯޓުގައި ޕައިލެޓާއި ހަތަރު ކުޑަކުދިންގެ އިތުރުން ދެ ބޮޑެތި މީހުން ތިބި ކަމުގައި އޮފިޝަލުން ވިދާޅުވިއެވެ. މަތިންދާބޯޓު ވެއްޓެން މެދުވެރިވި ސަބަބު ދެނެގަނެވިފައި ނުވާއިރު، އޮފިޝަލުން މިހާރު ދަނީ އެ ކަން ތަހުޤީޤު ކުރަމުންނެވެ. ނަމަވެސް، ބޯޓުގެ އިންޖީނަށް މައްސަލައެއް ކުރިމަތިވެފައިވާ ކަން، ބޯޓާ ގުޅުން ކެނޑުމުގެ ކުޑަ ވަގުތުކޮޅެއް ކުރިން ޕައިލެޓް ވަނީ ރިޕޯޓުކޮށްފައެވެ.