އެރިޓްރިއާގައި ހިފެހެއްޓި 2 ބޯޓާއި ދިވެހި ފަޅުވެރިންގެ ޙާލު އަންނަނީ ބަލަމުން: ފޮރިން މިނިސްޓްރީ
މިސްރުން ފުރައިގެން ރާއްޖެއަށް ދަތުރުކުރަނިކޮށް އެފްރިކާގެ ޤައުމެއްކަމަށްވާ އެރިޓްރިއާއިން ހިހެހެއްޓި އެފްއެސްއެމްގެ 2 ތެޔޮ ބޯޓާއި
އޭގައި ތިބި ދިވެހި ފަޅުވެރިންގެ ޙާލު ބަލައި އެހީތެރިކަން ފޯރުކޮށްދިނުމަށް މެދުނުކެނޑި މަސައްކަތް ކުރައްވަމުން ގެންދަވާ ކަމަށް ފޮރިން މިނިސްޓްރީން ހާމަކުރައްވައިފިއެވެ.
އެމިނިސްޓްރީން ވިދާޅުވީ އެރިޓްރިއާގައި ދިވެހި އަދި މިޞްރު ފަޅުވެރިންނާއެކު އެފް.އެސް.އެމް އާއި ޕެޓްރޯލިއަމް ލިންކް ޕްރައިވެޓް ލިމިޓެޑްގެ ބޯޓުތަކެއް ހިފަހައްޓާފައިވާކަމުގެ މަޢުލޫމާތު ލިބުމާއެކު އެކަން ވަރަށް ގާތުން ބައްލަވަމުން ގެންދަވާ ކަމަށެވެ. އަދި ރާއްޖެއިން ބޭރުގައި ޤާއިމު ކުރެވިފައިވާ ދިވެހިރާއްޖޭގެ އެމްބަސީތަކުން އެޤައުމުތަކުގައި ހުރި އެރިޓްރިއާގެ އެމްބަސީތައް މެދުވެރިކޮށް އެރިޓްރިއާގެ ސަރުކާރާ ވާހަކަ ދައްކައިގެން އިތުރު މަޢުލޫމާތު ހޯދުމަށާއި އެބޯޓުތަކުގައި ތިބި ދިވެހި ފަޅުވެރިންގެ ޙާލު ބަލައި އެހީތެރިކަން ފޯރުކޮށްދިނުމަށް މެދުނުކެނޑި މަސައްކަތް ކުރައްވަމުން އަންނަ ކަމަށް އެމިނިސްޓްރީން ވިދާޅުވެއެވެ.
އެގޮތުން، ނިއުޔޯކުގައި ހުންނަ އެރިޓްރިއާގެ ދާއިމީ މިޝަނާއި ރާއްޖޭގެ ދާއިމީ މިޝަނުންދަނީ މިމައްސަލަ އަށް އަވަސް ޙައްލެއް ހޯދޭތޯ ބައްލަވަމުން ގެންދަވާ ކަމަށާއި، ނިއުދިއްލީގައި ހުންނަ ދިވެހިރާއްޖޭގެ ހައިކޮމިޝަނުންވެސް އެރިޓްރިއާ އިން ދިވެހިރާއްޖެއަށް ކަނޑައަޅުއްވާފައިވާ އެމްބަސީ މެދުވެރިކޮށް އެރިޓްރިއާ ސަރުކާރުގެ އެހީތެރިކަން ހޯދުމަށް މަސައްކަތްތައް ކުރައްވަމުން ގެންދަވާ ކަމަށް ފޮރިން މިނިސްޓްރީން ވިދާޅުވެއެވެ. . އަދި މިކަމާ ގުޅިގެން އެރިޓްރިއާގައި ތިބި ދިވެހި ފަޅުވެރިންނަށް ކޮންސިއުލަރ އެހީތެރިކަން ފޯރުކޮށްދިނުމަށްޓަކައި ފޮރިން މިނިސްޓްރީޣެ އޮފިޝަލަކު ވަރަށް އަވަހަށް އެރިޓްރިއާއަށް ދަތުރެއް ކުރެއްވުމަށް ހަމަޖެހިފައިވާ ކަމަށްވެސް އެމިނިސްޓްރީން ވިދާޅުވެއެވެ.
އެފްއެސްއެމްގެ މި ދެ ބޯޓް ހިފަހައްޓާފައިވަނީ މިދިޔަމަހުގެ 26 ވަނަ ދުވަހު ވަރަށް ބޮޑަށް މޫސުން ގޯސްވެ ދަތުރު ނުކުރެވިގެން އެރިޓްރިއާގައި ބަނދަރުކުރުމުން ކަމަށް އެފްއެސްއެމުންވަނީ ހާމަކޮށްފައެވެ. މި ދެ ބޯޓް ހިފަހައްޓާފައިވަނީ ހުއްދަ ނުހޯދައި ބަނދަރުކުރިކަމަށް ބަލާފައިކަމަށާއި، ނަމަވެސް ބޯޓުގެ ސެޓުން ބަނދަރުކުރުމުގެ ކުރިން ހުއްދައަށް އެދުނުކަމަށްވެސް އެފްއެސްއެމުންވަނީ ބުނެފައެވެ. މިދެ ބޯޓުގައި ހަތަރު ދިވެހިންނާއި މިސުރުގެ ހަތަރު ފަޅުވެރިއަކު ތިބި ކަމަށްވެސް އެފްއެސްއެމުންވަނީ ބުނެފައެވެ.