އެމްޑީޕީގެ ރިޔާސީ ޕްރައިމަރީގައި ބޮޑު ތަފާތަކުން ބަލިވުމުން ރައްޔިތުންގެ މަޖިލީހުގެ ރައީސް، ރައީސް މުޙައްމަދު ނަޝީދު އިސްވެ ހުންނަވައިގެން "ފިކުރެއްގެ ދިރުން" މިނަމުގައި ހިންގެވި ޙަރަކާތުން ސިޔާސީ ޕާޓީއެއް އުފައްދަން ނިންމައިފިއެވެ.
ފިކުރެއްގެ ދިރުމުން މިކަން ހާމަކޮށްފައި މިވަނީ އެމް.ޑީ.ޕީގެ އަސާސީ ޤަވާޢިދާއި، އުޞޫލުތަކާ ޚިލާފަށް ޢަމަލުކުރައްވާފައިވާތީ އެޕާޓީގެ މެމްބަރުކަމުން ރައްޔިތުންގެ މަޖިލީހުގެ މެދުހެންވޭރު ދާއިރާގެ މެމްބަރު ޢަލީ ޢާޒިމް ވަކިކޮށްފައި ވަނިކޮށެވެ. އާޒިމްގެ އިތުރުންވެސް އިތުރު މެމްބަރުންތަކެއް ވަކިކުރާނެކަމުގެ އިންޒާރު ދީފައިވަނިކޮށް މަޖިލީހުގައި ހިމެނޭ އެމްޑީޕީގެ 12 މެމްބަރަކު މިވަނީ ޕާޓީން ވަކިވެވެވަޑައިގެންފައެވެ.
ޕާޓީން ވަކިވެވަޑައިގެންފައިވަނީ ރައްޔިތުންގެ މަޖިލީހުގެ ނާއިބު ރައީސް އީވާ ޢަބްދުﷲ، މާފަންނު މެދުދާއިރާގެ މެންބަރު އިބްރާހީމް ރަޝީދު، މައްޗަންގޮޅި އުތުރު ދާއިރާގެ މެންބަރު މުޙައްމަދު ރަޝީދު، ހުޅުދޫ ދާއިރާގެ މެންބަރު އިލްޔާސް ލަބީބް، މާފަންނު އުތުރު ދާއިރާގެ މެންބަރު އިމްތިޔާޒު ފަހުމީ، ވިލުފުށީ ދާއިރާގެ މެންބަރު ޙަސަން ޢަފީފް، ކުޅުދުއްފުށީ އުތުރު ދާއިރާގެ މެންބަރު ޔާސިރު ޢަބްދުއްލަޠީފް، ތޮއްޑޫ ދާއިރާގެ މެންބަރު ޙަސަން ޝިޔާން، ހެންވޭރު ހުޅަނގު ދާއިރާގެ މެންބަރު ޙަސަން ލަޠީފް، މަޑަވެލި ދާއިރާގެ މެންބަރު ޙުސައިން ފިރުޝާން، އުނގޫފާރު ދާއިރާގެ މެންބަރު މުޙައްމަދު ވަޙީދު އަދި ގައްދޫ ދާއިރާގެ މެންބަރު އަޙްމަދު ޒާހިރެވެ.
މި މެމްބަރުން އިސްވެ ބޭއްވި ނޫސްވެރިންގެ ބައްދަލުވުމުގައި ވަނީ "ފިކުރެއްގެ ދިރުން" ނަމުގައި އުފައްދާ ޕާޓީން ކުރިޔަށް އޮތް ރިޔާސީ އިންތިޚާބުގައި ކެންޑިޑޭޓަކު ނެރޭނެ ކަން ހާމަކޮށްފައެވެ. ނަމަވެސް ނެރޭނީ ކޮން ކެނޑިޑޭޓެއްކަން ހާމަކޮށްފައެއް ނުވެއެވެ. އަދި ޕާޓީ އުފެއްދުމުގެ މަސައްކަތްތައް އަންނަ ހަފްތާގެ ތެރޭގައި ފަށާނެކަމަށް ވެސް ވަނީ ބުނެފައެވެ.
"ފިކުރެއްގެ ދިރުން" އުފެދިގެން އައީ އެމްޑީޕީގެ ޕްރައިމަރީގައި، ރައީސް ނަޝީދުއަށް ތާއީދު ހޯދުމަށެވެ. ނަމަވެސް އެ އިންތިޚާބުގައި ރައީސް ނަޝީދަށް ވަނީ ބޮޑު ނާކާމިޔާބީއަކާއި ކުރިމަތިވެވަޑައިގެންފައެވެ.