މިސްރުން ފުރައިގެން ރާއްޖެއަށް ދަތުރުކުރަނިކޮށް އެފްރިކާގެ ޤައުމެއްކަމަށްވާ އެރިޓްރިއާއިން އެފްއެސްއެމްގެ 2 ތެޔޮ ބޯޓު ހިފަހައްޓައިފިއެވެ.
އެފްއެސްއެމްގެ މެނޭޖިންގ ޑިރެކްޓަރ މުހައްމަދު ގަސަމް ވިދާޅުވީ މި ދެ ބޯޓް ހިފަހައްޓާފައިވަނީ މިދިޔަމަހުގެ 26 ވަނަ ވަރަށް ބޮޑަށް މޫސުން ގޯސްވެ ދަތުރު ނުކުރެވިގެން އެރިޓްރިއާގައި ބަނދަރުކުރުމުންކަމަށެވެ.
މި ދެ ބޯޓް ހިފަހައްޓާފައިވަނީ ހުއްދަ ނުހޯދައި ބަނދަރުކުރިކަމަށް ބަލާފައިކަމަށާއި، ނަމަވެސް ބޯޓުގެ ސެޓުން ބަނދަރުކުރުމުގެ ކުރިން ހުއްދައަށް އެދުނުކަމަށްވެސް ގަސަމް ވިދާޅުވިއެވެ.
އެ ދެ ބޯޓުގައި ތިބީ ހަތަރު ދިވެހިންނާއި މިސުރުގެ ހަތަރު ފަޅުވެރިއެކެވެ. ބޯޓުގަ ތިބި މީހުންގެ ހާލު ރަނގަޅު ކަމަށާއި ދެ ފަހަރެއްގެ މަތިން ކާބޯތަކެތިވެސް ފޯރުކޮށްދީފައިވާކަމަށް ގަސަމް ވިދާޅުވިއެވެ.
ގަސަމް ވިދާޅުވީ ހިފަހައްޓާފައިވާ ދެ ބޯޓަކީ ރާއްޖޭގައި ދުއްވުމަށް ގެންނަ، 250 ހާސް ލިޓަރުގެ ކެޕޭސިޓީގެ ބާޖު ގޮތަށް ހަދާފައިވާ ބޯޓުތަކެެއްކަމަށެވެ.
ގަސަމް ވިދާޅުވީ އެރިޓްރިއާއަކީ ރާއްޖެއާއި މާބޮޑު ގުޅުމެއް އޮންނަ ޤައުމަކަށް ނުވުމުން އިންޑިޢާގައި ހުންނަ އެރިޓްރިއާގެ އެމްބަސީ މެދުވެރިކޮށް ބޯޓު ދޫކޮށްލާތޯ އިންޑިއާގައި ހުންނަ ޘިވެހި ހައިކޮމިޝަނުން ވާހަކަދައްކަމުން އަންނަކަމަށެވެ. ނަމަވެސް އެކަމާއި ގުޅޭގޮތުން ގޮތެއް ނިންމާނީ ބޯޓާއި ގުޅޭގޮތުން ހިނގަމުންދާ ތަހުޤީޤު ނިމުމުންކަމަށް އިންޑިއާގައި ހުންނަ އެރިޓްރިއާގެ އެމްބަސީން މައުލޫމާތު ދީފައިވާކަމަށްވެސް ގަސަމް ވިދާޅުވިއެވެ.
އެފްއެސްއެމްގެ ދެ ބޯޓުގެ އިތުރުން، ދިވެހި އަމިއްލަ ކުންފުންޏެއްގެ ބޯޓުވެސް އެރިޓްރިއާގައި ހިފަހައްޓާފައިވާކަމަށް މައުލޫމާތު ލިބެ އެވެ. ނަމަވެސް އެ ބޯޓާއި ގުޅޭ މާބޮޑު ތަފްސީލެއް ލިބިފައެއް ނުވެއެވެ.