ކުންފުނީގެ އިޖުތިމާޢީ ޒިންމާގެ ދަށުން މިިދިޔަ އަހަރު 400 އަށްވުރެ ގިނަ ހަރަކާތަކަށް 43.23 މިލިއަން ރުފިޔާގެ އެހީތެރިކަން ފޯރުކޮށްދީފައިވާކަމަށް އެމްޓީސީސީން ބުނެފިއެވެ.
އެމްޓީސީސީގެ މިދިޔަ އަހަރުގެ އަހަރީ ރިޕޯޓްގައި ބުނީ ވޭތުވެދިޔަ އަހަރަކީ ކުންފުނީގެ ތާރީޚްގައި އިޖުތިމާޢީ ޒިންމާގެ ދަށުން މުޖުތަމަޢުގެ ލާބައަށް އެންމެ ބޮޑު އެހީތެރިކަން ފޯރުކޮށްދެވުނު އަހަރުކަމަށެވެ. އެގޮތުން ކުންފުނީގެ މަޝްރޫޢުތައް ހިނގަމުންދާ ރަށްތަކުގައި ކުންފުނީގެ އިޖުތިމާޢީ ޒިންމާގެ ދަށުން ވާނީ 420 ހަރަކާތެއް ހިންގާ، މުޖުތަމަޢުގެ ލާބައަށް ޖުމުލަ 43.23 މިލިއަން ރުފިޔާގެ އެހީތެރިކަން ފޯރުކޮށްދީފައިވާޚަމަށް އެމްޓީސީސީން ބުނެއެވެ.
މާލެ ސަރަހައްދުގެ ރައްޔިތުން ޕިކްނިކް ދިއުމަށް ތަރައްޤީކުރުވުނު ކ.ކުޑަގިރިއަށް އިޖުތިމާޢީ ޒިންމާގެ ދަށުން 13 މިލިއަން ރުފިޔާ ވަނީ ހަރަދުކޮށްފައެވެ. މިއީ އެމްޓީސީސީގެ ތާރީޚްގައި އިޖުތިމާޢީ ޒިންމާގެ ދަށުން އެއް މަޝްރޫއަކަށް ހޭދަކުރެވުނު އެންމެ ބޮޑު އަދަދުކަމަށް އެ ކުންފުނިން ބުނެއެވެ.
އެމްޓީސީސީގެ މިދިޔަ އަހަރުގެ އަހަރީ ރިޕޯޓްގައި ބުނީކުންފުނީގެ އެކި ވިޔަފާރިތައް އިތުރަށް ފުޅާކޮށް ހަރުދަނާކުރުމަށް އަޅަޏްޖެހޭ އެންމެހާ ފިޔަވަޅުތަކާއި އިސްތިރާޖީ ޕްލޭންތައް ދަނީ އެކުލަވާލާ، ހާލަތު ބަދަލުވަމުންދާ މިންވަރަށް ރިޢާޔަތްކޮށް މުރާޖަޢު ކުރަމުންކަމަށެވެ. އަދި ވިޔަފާރިތަކަށް ގެންނަންޖެހޭ ބަދަލުތައް ދިރާސާކޮށް، ވިޔަފާރި ކުރިއަރުވާ، ކުންފުނީގެ މަޤްޞަދުތައް ޙާޞިލްކުރުމަށް ޙިކްމަތްތެރިކަމާއެކު ފިޔަވަޅުތައް އަޅައި، މިފިޔަވަޅުތަކުގެ ނަތީޖާ ހާސިލްކުރެވިފައިވާކަމަށްވެސް އެމްޓީސީސީން ފާހަގަކުރެއެވެ.
"އީޖާދީ ތަރައްޤީއަށް ހިތްވަރުދިނުމާއި، ޚިދުމަތުގެ ފެންވަރު ރަނގަޅުކޮށް، ކުންފުނީގެ ކަންކަން އިޞްލާޙުކުރުމުގަ އިމެދުނުކެނޑި މަސައްކަތް ކުރާނެކަމުގައިވެސް ދަންނަވަން. ކުންފުނީޣެ އެންމެހާ ވިޔަފާރިތައް ކުރިއަރުވާ ކުންފުނީގެ ޙިއްޞާދާރުންނާއި މުޖުތަމަޢުއަށް ނަފާ ލިބޭގޮތަށް މަސައްކަތް ކުރިއަށް ގެންދާނެކަމުގެ އިތުބާރާއި ޔަޤީންކަން އަރުވަން" އެމްޓީސީސީގެ ރިޕޯޓްގައިވެއެވެ.
1981 ވަނަ އަހަރު ސަރުކާރުން އުފެއްދި އެމްޓީސީސީއަކީ ސަރުކާރާއި ދިވެހި ރައްޔިތުން ހިއްސާވާ ރާއްޖޭގެ އެންމެ ބިޔަ ޓްރާންސްޕޯޓް އަދި ކޮންޓްރެކްޓިންގ ކުންފުންޏެވެ.
2022 ވަނަ އަހަރު އެމްޓީސީސީން ހާސިލްކޮށްފައިވާ ލަނޑުދަނޑިތަކަށް ބަލާއިރު، ރާއްޖޭގެ ޢުމްރާނީ ތަރައްޤީގެ މުހިއްމު މަސައްކަތެއް ވަނީ ކުރިއަށްގެންގޮސްފައެވެ. އެގޮތުން މިދިޔަ އަހަރު ތެރޭގައި ޢުމްރާނީ ތަރައްޤީގެ އައު 65 މަޝްރޫޢުއަކާއި ކުންފުނިން ހަވާލުވެ، 42 މަޝްރޫއެއްގެ މަސައްކަތް ވަނީ ކާމިޔާބުކަމާއިއެކު ނިންމާލާފައެވެ. އަދި ރާއްޖޭގެ ތަރައްޤީއާއި ކުރިއެރުމާއި ގުޅުންހުރި ގިނަ މަސައްކަތްތަކެއްވެސް އެމްޓީސީސީން އަންނަނީ ކުރިއަށްގެންދަމުންނެވެ.
އެމްޓީސީސީގެ މިދިޔަ އަހަރުގެ މާލީ ހިސާބުތައް ދައްކާގޮތުން މިިދިޔަ އަހަރު އެ ކުންފުންޏަށް 2.47 ބިލިއަން ރުފިޔާގެ އާމްދަނީއެއް ވަނީ ލިބިފައެވެ. އަދި ހިންގުމުގެ ފައިދާގެ ގޮތުގައި ވަނީ 324.16 މިލިއަން ރުފިޔާ ލިބިފައެވެ.
މިއީ މިދިޔަ އަހަރު ލިބުނު އާމްދަނީއާއި ހިންގުމުގެ ފައިދާއާ އަޅާބަލާއިރު އިތުރު އަދަދެއްގެ އިތުރުން، މިއީ އެމްޓީސީސީގެ ތާރީހުގައިވެސް އެންމެ ބޮޑު އާމްދަނީއަކާއި ހިންގުމުގެ ފައިދާއެއް ލިބުނު އަހަރެވެ.
އެމްޓީސީސީން ބުނީ އާމްދަނީއާއި ހިންގުމުގެ ފައިދާ އިތުރުވިނަމަވެސް ކުންފުންޏަށް ލިބުނު ފައިދާ %36.15 ދަށްވެފައިވާކަމަށެވެ. އެގޮތުން ޓެކްސްއަށް ކެނޑުމުގެ ކުރިން ފައިދާގެ ގޮތުގައި 2021 ވަނަ އަހަރު 271.82 މިލިއަން ރުފިޔާ ލިބިފައިވާއިރު މިދިޔަ އަހަރު ލިބުނު ފައިދާ އުޅެނީ 229.53 މިލިއަން ރުފިޔާގައެވެ. އަދި ޓެކްސްއަށް ކެނޑުމަށްފަހު ސާފު ފައިދާގެ ގޮތުގައި މިދިޔަ އަހަރު ވަނީ 231 މިލިއަން ރުފިޔާ ލިބިފައެވެ.