ނައިޖީރިޔާގެ ކޯރެއްގައި ދަތުރުކުރަމުންދިޔަ ބޯޓެއް ބަންޑުންޖަހައިލާ 15 ކުޑަކުދިން މަރުވެ، އިތުރު 25 ކުދިން ގެއްލިއްޖެއެވެ. ގިނަ އަދަދެއްގެ ކުދިންނާ އެކު ދަތުރުކުރަމުން ދިޔަ ބޯޓު ބަންޑުންޖަހައިލާފައި ވަނީ އެ ޤައުމުގެ ހުޅަނގުއުތުރުގައިވާ ޝަގީރީ ކޯރުގައެވެ. މި ހާދިސާގައި މަރުވެފައި ވަނީ ސޮކޯޓޯ ސްޓޭޓްގެ ޑުންޑޭޖީ އަވަށުގެ ކުދިންތަކެކެވެ. އެ ކުދިންގެ އުމުރު ސާފެއް ނޫނެވެ.
މި ހާދިސާ ހިނގާފައި ވަނީ، ޝަގީރީ ކޯރުގެ އަނެއް ފަރާތުގައި އޮންނަ ޖަންގަލި ބޯ ސަރަޙައްދަކުން ދަރުހޮވަން އެ ކުދިން ދަތުރުކުރި މަގުމަތީގައި ކަމަށް ޝަގީރީ ޑިސްޓްރިކްޓުގެ އިސް އޮފިޝަލެއް ކަމުގައިވާ ޢަލީޔޫ އަބޫބަކުރު ވިދާޅުވިއެވެ. މި ހާދިސާ މަރުވި ކުދިންގެ ތެރޭގައި 13 އަންހެން ކުދިންނާއި ދެ ފިރިހެން ކުދިން ހިމެނޭ ކަމުގައި އޭނާ ވިދާޅުވިއެވެ.
އެ ކުދިންގެ ހަށިތައް ފެނިފައިވާއިރު، ކޯރަށް ގެއްލިފައިވާ އިތުރު ކުދިން ހޯދުމުގެ މަސައްކަތް ދަނީ ކުރަމުންނެވެ. މި ކަމުގައި ޑައިވަރުންގެ ޓީމުތަކުން ވެސް މިހާރު ދަނީ ހަރަކާތްތެރިވަމުންނެވެ. މި ހާދިސާގައި މަރުވި ކުދިންގެ ޢަދަދު އިތުރުވާނެ ކަމަށް ބެލެވޭ ކަމުގައި ވެސް އޭނާ ވިދާޅުވިއެވެ.
ކޯރުތަކުގައި މި ފަދަ ހާދިސާތައް ހިނގުން ނައިޖީރިޔާގައި ވަނީ ޢާންމުވެފައެވެ. މި ފަދަ ހިތާމަވެރި ހާދިސާތައް ހިނގާފައިވާ ބައެއް ސަބަބުތަކުގެ ތެރޭގައި، ޤަވާޢިދާ ޚިލާފަށް ގިނަ ޢަދަދެއްގެ މީހުން ގޮވައިގެން ދަތުރުކުރުމާއި، ބޯޓުފަހަރު މަރާމާތު ނުކުރުމާއި، ވިއްސާރަ މޫސުމުގައި ފެންބޮޑުވުމުގެ އިތުރުން އޮޑިދޯނިފަހަރުގެ ސަލާމަތާއި ރައްކާތެރި ކަމުގެ ޤަވާޢިދުތަކަށް އިޙުތިރާމު ނުކުރުން ފާހަގަ ކުރެވެއެވެ.
2022 ވަނަ އަހަރުގެ އޭޕްރިލް މަހުގެ ތެރޭގައި ވެސް ސޮކޯޓޯ ސްޓޭޓްގައި މި ފަދަ ހާދިސާއެއް ހިނގައި 29 ކުޑަކުދިން މަރުވިއެވެ. ގިޑާން މަގާނާ އަވަށް ކައިރީގައި ހިނގި އެ ހާދިސާގައި ވެސް ބޯޓު ފެތިފައި ވަނީ ހަމަ އެއް ހިސާބުގަނޑަކަށެވެ. އެ ހާދިސާ ހިނގީ ވެސް ދަރުހޮވަން ކުދި ބަޔަކު ކުރި ދަތުރެއްގެ ތެރެއިންނެވެ.
2022 އަހަރުގެ ޑިސެންބަރު މަހު ނައިޖީރިޔާގެ ސަރަޙައްދުތަކަށް ކުރި ވިއްސާރައިގައި ފެންބޮޑުވުމާ ގުޅިގެން ވެސް 76 މީހަކު ވަނީ މަރުވެފައެވެ. އެ މީހުން މަރުވެފައި ވަނީ އިރުދެކުނުގައިވާ އަނަންބްރާ ސްޓޭޓްގެ ކޯރެއް ބަންޑުންޖަހައިލުމާ ގުޅިގެންނެވެ. އެ އެންމެން ވެސް މަރުވީ ގެނބިގެންނެވެ.
ނައިޖީރިޔާގައި ފަހުގެ ތާރީޚެއްގައި ހިނގާފައިވާ މި ފަދަ އެންމެ ހިތާމަވެރި ހާދިސާ ހިނގާފައި ވަނީ 2021 ވަނަ އަހަރުގެ މޭ މަހުގެ ތެރޭގައެވެ. ގިނަ ޢަދަދެއްގެ ބަޔަކު ގޮވައިގެން ދަތުރުކުރަމުންދިޔަ ބޯޓެއް ބަންޑުންޖަހައިލި އެ ހާދިސާގައި 150 އެއްހާ މީހުން ކޯރުގެ ތެރެއަށް ގެއްލުނެވެ. އޭގެ ތެރެއިން ސަލާމަތް ކުރެވިފައި ވަނީ އެންމެ 20 މީހުންނެވެ.
މި ފަދަ ހާދިސާތައް ހުއްޓުވުމުގެ ގޮތުން ރޭގަނޑުގެ ވަގުތުގައި ކޯރުތަކުގައި ދަތުރު ކުރުން މަނާ ކުރަން ނައިޖީރިޔާގެ ސަރުކާރުން ދަނީ މަސައްކަތް ކުރަމުންނެވެ. އަދި، ޤަވާޢިދަށް ވުރެ އިތުރަށް ފަސިންޖަރުން އުފުލުމަކީ ޖިނާޢީ ކުށެއްގެ ގޮތުގައި ވަނީ ކަނޑައަޅާފައެވެ. ނަމަވެސް، ގިނަ އޮޑިދޯނިފަހަރުގެ ވެރިންނާއި ކައްޕިތާނުން މި ފަދަ ޤަވާޢިދުތަކަށް އިޙުތިރާމު ނުކުރާ ކަމުގައި މަސްރަޙު ދިރާސާކުރާ ފަރާތްތަކުން ބުނެއެވެ.