އިޖްތިމާއީ - ސިޔާސީ ދާއިރާގައި އަންހެނުންގެ ބާރުވެރިކަން އިތުރުކުރެވޭނެ ގޮތްތަކާއި ގުޅޭގޮތުން "އެފްރިކަން ވުމަން ސަމިޓް 2023"ގައި މިނިސްޓަރ އޮފް ޑިފެންސް މާރިޔާ އަޙުމަދު ދީދީ ތަޤުރީރުކުރައްވައިފިއެވެ.
ސަމިޓްގައި ބައިވެރިވެވަޑައިގަތުމަށް ސައުތް އެފްރިކާގެ ކޭޕްޓައުންއަށް ވަޑައިގެންނެވީ އިއްޔެއެވެ. މިނިސްޓަރގެ މިދަތުރުފުޅަކީ، އެފްރިކާ ވިމެން ސަމިޓް އޮގަނައިޒޭޝަންގެ ދަޢުވަތަކަށް ކުރައްވާ ދަތުރުފުޅެއްކަމަށް ޑިފެންސް މިނިސްޓްރީން ވިދާޅުވިއެވެ.
"އެފްރިކަން ވިމެން ސަމިޓް-23" މިސަމިޓަކީ، އެފްރިކާގެ ބައްރަށް ޢަމާޒުކޮށް، އަންހެނުން ބާރުވެރިކުރުވުމަށާއި، އަންހެނުންގެ ޙައްޤުތައް ކަށަވަރުކޮށް، އިޖްތިމާއީ، ދިފާޢީ، ސިޔާސީ، އަދި އެހެނިހެން ދާއިރާތަކުގައި އަންހެނުންގެ ދައުރު ފުޅާކުރުމުގެ މަޤްސަދުގައި ބާއްވަމުން އަންނަ ސިލްސިލާ ސަމިޓްއެކެވެ. އަދި، މިސަމިޓްގައި، އެފްރިކާގެ ބައްރުގެ ބޭރުން، އެހެނިހެން ދާއިރާތަކާއި ރޮނގުތަކުން ފާހަގަކުރެވޭ އަންހެން ބޭކަނބަލުން ބައިވެރިވެ، ތަޤްރީރްކުރެއްވުމަށްވެސް ވަނީ ހަމަޖެހިފައެވެ.
ސަމިޓް ފެއްޓުމަށް ބޭއްވި އިވެންޓްގައި ދެއްވި "ކީނޯޓް" ސްޕީޗްގައި މިނިސްޓަރ މާރިޔާ ވަނީ އަންހެނުންގެ ބައިވެރިވުން އިތުރުކުރުން މުހިންމު ދާއިރާތަކުގެ މައްޗަށް އަލިއަޅުއްވާލައްވާފައެވެ. އެގޮތުން އިޖްތިމާޢީ ސިޔާސަތުގެ ދާއިރާއާއި، ތަޢުލީމާއި ތަމްރީން އަދި އެކި ދާއިރާތަކުން ކުރިއެރުމުގެ ފުރުޞަތުތައް އިތުރުކޮށްދިނުމުގެ މައްޗަށް އަލިއަޅުއްވާލެއްވިއެވެ. ޚާއްސަކޮށް އަންހެނުންނާމެދު އޮންނަ ތަފާތުކުރުންތައް ނައްތާލާ، ހަމަހަމަ ފުރުޞަތު ފަހިކޮށްދިނުމަށް މިނިސްޓަރ ގޮވާލެއްވިއެވެ.
މިނިސްޓަރ ވަނީ "ވިމެންސް އިންކްލޫޝަން އެންޑް ޕޮލިޓިކަލް ޕަރޓިސިޕޭޝަން"ގެ ނަމުގައި ބޭއްވި ޕެނަލް ޑިސްކަޝަންގެ ބައިވެރިވެވަޑައިގެން، އެކަމަނާގެ ތަޖުރިބާއާއި ޚިޔާލު ޙިއްސާކުރައްވާފައެވެ. އެގޮތުން ސިޔާސީ ދާއިރާގައި އަންހެނުންނަށް ހުރި ދަތިތަކާއި ކުރިމަތިވާ ކަންކަަމާއި އެކަންކަން ޙައްލުކުރުމަށް ޤާނޫނާއި، ދަޢުލަތުގެ މަތީ ފަންތީގައި ނިންމިދާނެ ނިންމުންތަކާއި ގުޅޭގޮތުން މަޝްވަރާކުރެއްވިއެވެ. އަދި ސިޔާސީ ޕާޓީތަކުން މިކަމުގައި އިސްނެގޭނެ ކަންކަމަށް ރިޢާޔަތްކުރެއްވިއެވެ.
މި ދަތުރުފުޅުގައި މިނިސްޓަރގެ އަރިހުގައި، ރާއްޖެއިން ސްރީލަންކާއަށް ކަނޑައަޅުއްވާފައި ހުންނަވާ ޑިފެންސް އެޑްވައިޒަރ ކާނަލް ޙަސަން ޢާމިރާއި، މިނިސްޓަރ ބިއުރޯގެ މިލިޓަރީ އެއިޑް ވޮރަންޓް އޮފިސަރ 2 ޢަބްދުﷲ ރަޝީދު ބައިވެރިވެވަޑައިގަންނަވައެވެ.