މެދުތެރޭ އެފްރިކާގެ ޤައުމެއް ކަމުގައިވާ ޑިމޮކްރެޓިކް ރިޕަބްލިކް އޮފް ކޮންގޯއަށް ބޯކޮށް ވާރޭވެހުމުގެ ސަބަބުން ކުރިމަތިވި ފެންބޮޑުވުމާއި، ބިންގަނޑު ކެނޑުމާއި، ކިސަޑު ފޭބުމުގެ ހާދިސާތަކުގައި ގެއްލުނު ގިނަ ޢަދަދެއްގެ ބަޔަކު ހޯދުމުގެ މަސައްކަތް ކުރަމުން އެބަދެއެވެ. މީގެ ހަތަރު ވަރަކަށް ދުވަސް ކުރިން އެ ޤައުމުގައި ހިނގި ފެންބޮޑުވުމާއި ބިންގަނޑު ކަނޑައިގެން ދިޔުމުގެ ހާދިސާތަކުގައި ގެއްލިފައިވާ މީހުންގެ ފުރިހަމަ ޢަދަދު ސާފެއް ނޫނެވެ.
އެ ހާދިސާތަކުގައި މަރުވެފައިވާ މީހުންގެ ޢަދަދު މިހާރު ވަނީ 400 އަށްވުރެ މައްޗަށް އަރާފައެވެ. އަދި، ގެއްލިފައިވާ ކަމަށް ބެލެވޭ މީހުންގެ ހަށިތައް ފެންނަމުންދާ ވަރަކަށް، މަރުވި މީހުންގެ ޢަދަދުތައް އިތުރުވާނެ ކަމަށް ބެލެވޭ ކަމުގައި ކޮންގޯގެ އޮފިޝަލުން ވިދާޅުވެއެވެ.
ފެންބޮޑުވުމާއި ބިންގަނޑު ކެނޑުމުގެ ހާދިސާތަކުގައި އެންމެ ބޮޑަށް އަސަރުކޮށްފައި ވަނީ ކޮންގޯގެ ދެކުނުގައިވާ ކީވޫ ޕުރޮވިންސަށެވެ. ބޯކޮށް ވާރޭވެހި އެ ސަރަޙައްދުގައި އޮންނަ ލޭކް ކީވޫ ފެންގަނޑު ވަނީ ބަންޑުންވެފައެވެ. މަރުވެފައިވާ ގިނަ ޢަދަދެއްގެ މީހުންގެ ހަށިތައް އެ ފެންގަނޑުން ވަނީ ހޯދިފައެވެ.
ކޮންގޯ ސަރުކާރުގެ ތަރުޖަމާނު ޕެޓްރިކް މުޔާޔާ ވިދާޅުވީ މަރުވި މީހުންގެ ޢަދަދު 401 އަށް އަރާފައިވާ ކަމުގައެވެ. ބައެއް ޢާއިލާތަކުގެ ހުރިހާ މެންބަރުން ކަހަލަ ގޮތަކަށް ވަނީ މަރުވެފައެވެ. އަދި، ގެއްލިފައިވާ ކަމަށް ބެލެވޭ މީހުންގެ ޢަދަދު އަދިވެސް ސާފުވެފައި ނުވާ ކަމަށާއި، ނަމަވެސް އެ މީހުން ހޯދުމުގެ މަސައްކަތްތައް ހުއްޓުމެއް ނެތި ކުރަމުންދާ ކަމުގައި އޭނާ ވިދާޅުވިއެވެ. ގެއްލިފައިވާ މީހުންގެ ޢަދަދު އެތަކެއް ސަތޭކައަކަށް އަރާނެ ކަމަށް ބެލެވޭ ކަމުގައި އޮފިޝަލުން އަންދާޒާ ކުރެއެވެ.
ފެންބޮޑުވުމާއި ބިންގަނޑު ކެނޑުމުގެ ސަބަބުން ގިނަ ޢަދަދެއްގެ ގެދޮރަށް ބޮޑެތި ގެއްލުންތައް ލިބިފައިވާއިރު، 3,000 އަށްވުރެ ގިނަ މީހުންގެ ގެދޮރު ހަލާކުވެ، އެ މީހުން މަގުމަތިވެފައިވާ ކަމުގައި އ.ދގެ އިންސާނީ އެހީއާ ބެހޭ އިދާރާ - އޮފީސް ފޯރ ދަ ކޯޑިނޭޝަން އޮފް ހިޔުމެނިޓޭރިއަން އެފެއާޒް (އޯ.ސީ.އެޗް.އޭ)އިން ބުނެއެވެ. އެ މީހުންނަށް ވަގުތީ ހިޔާވަހިކަން ހޯދައިދިނުމަށް ކޮންގޯގެ ސަރުކާރުން ދަނީ މަސައްކަތް ކުރަމުންނެވެ. ނަމަވެސް، ގިނަ ޢަދަދެއްގެ ބަޔަކު އަދިވެސް ދިރިއުޅެމުން ދަނީ ވަގުތީ ހިޔާވަހިކަމެއް ނެތިއެވެ.
އޯ.ސީ.އެޗް.އޭއިން ބުނީ މަރުވެފައިވާ އެތަކެއް ސަތޭކަ މީހުންގެ ހަށިތައް ވަޅުލުމުގެ މަސައްކަތް ކުރުމަށް ކޮންގޯއަށް އެހީތެރިކަން ބޭނުންވާ ކަމުގައެވެ. އަދި، ހާލުގައި ޖެހިފައިވާ އެތަކެއް ހާސް ރައްޔިތުންނަށް ބާކޯތަކެއްޗާއިން ހިޔަވާހިކަން ފޯރުކޮށްދިނުމަށް ވެސް އެ ޤައުމަށް އެހީތެރިކަން ބޭނުންވާ ކަމުގައެވެ. މި ކަންކަމުގައި އެހީތެރިކަން ފޯރުކޮށްދިނުމަށް އ.ދގެ އިތުރުން މަދަނީ ޖަމުޢިއްޔާތަކުގެ މެންބަރުން ވަނީ ކޮންގޯއަށް ދަތުރުކޮށްފައެވެ.
ދުނިޔޭގެ އެހެން ހިސާބުތަކެކޭ އެއްގޮތަށް މޫސުމީ ބަދަލުތަކުގެ ސަބަބުން އެފްރިކާ ބައްރުގެ ޤައުމުތަކަށް ކުރިމަތިވާ ޤުދުރަތީ ކާރިސާތަކުގެ ނުރައްކާތެރި ކަން ދަނީ އިތުރުވަމުންނެވެ. އަދި، ޤުދުރަތީ ކާރިސާތަކުގައި މަރުވާ މީހުންނާއި، ހާލުގައި ޖެހޭ މީހުންގެ ޢަދަދުތައް ދަނީ އިތުރުވަމުންނެވެ. ކޮންގޯގައި ފެންބޮޑުވެ ގިނަ ޢަދަދެއްގެ ބަޔަކު މަރުވެފައި މި ވަނީ، ރުވާންޑާގެ ސަރަޙައްދުތަކަށް ބޯކޮށް ވާރޭވެހި ފެންބޮޑުވެ 131 މީހުން މަރުވެފައިވާ ދަނޑިވަޅެއްގައެވެ.
ކޮންގޯއަކީ ބޮޑުމިނުގެ ގޮތުން މުޅި ވިލާތުގެ ބައްރާ އެއް ވަރުގެ ޤައުމެކެވެ. ނަމަވެސް، އެއީ ދުނިޔޭގައިވާ އެންމެ ފަގީރު އެއް ޤައުމެވެ. އެ ޤައުމަށް ކުރިމަތިވެފައިވާ އެންމެ ބޮޑެތި މައްސަލަތަކުގެ ތެރޭގައި ކޮރަޕްޝަނާއި ހަމަނުޖެހުންތައް ހިމެނެއެވެ. ކޮންގޯއަށް ކާރިސާއެއް ކުރިމަތިވެފައި މި ވަނީ، މޫސުމީ ބަދަލުތަކާ ގުޅިގެން ފަގީރު ޤައުމުތަކަށް ކުރިމަތިވަމުންދާ ޤުދުރަތީ ކާރިސާތަކުގައި ލިބެމުންދާ ގެއްލުންތައް ބޮޑުވަމުން ދިޔުމާ ގުޅިގެން އ.ދގެ ސެކްރެޓަރީ ޖެނެރަލް އެންޓޯނިޔޯ ގުތެރޭޝް މުއްސަނދި ޤައުމުތަކަށް ފާޑުވިދާޅުވެފައިވާ ދަނޑިވަޅެއްގައެވެ.