ކެނެޑާގެ ހުޅަނގުގައިވާ އެލްބަރޓާ ޕުރޮވިންސުގެ ޖަންގަލިތަކުގައި ރޯވެފައިވާ އަލިފާންގަނޑުތައް ޢާންމުން ދިރިއުޅޭ ސަރަޙައްދުތަކަށް ފެތުރި ގިނަ ޢަދަދެއްގެ ބަޔަކު ރައްކާތެރި ހިސާބުތަކަށް ބަދަލުކޮށްފިއެވެ. ޖަންގަލިތަކުގައި ރޯވެފައިވާ އަލިފާންގަނޑުތައް ޢާންމުން ދިރިއުޅޭ ސަރަޙައްދުތަކަށް ފެތުރެން ފެށުމާ ގުޅިގެން އެލްބަރޓާގައި މިހާރު ވަނީ ކުއްލި ހާލަތު އިޢުލާނުކޮށްފައެވެ.
އަލިފާންގަނޑުތަކުގެ ނުރައްކާ ކުރިމަތިވެފައިވާ ސަރަޙައްދުތަކުގައި ދިރިއުޅޭ 25,000 އަށްވުރެ ގިނަ މީހުން ރައްކާތެރި ހިސާބުތަކަށް ބަދަލުކޮށްފައިވާ ކަމުގައި އެލްބަރޓާގެ އޮފިޝަލުން ވިދާޅުވެއެވެ. އެ ޕުރޮވިންސުގެ ޖަންގަލިތަކުގައި 110 އަށްވުރެ ގިނަ އަލިފާންގަނޑު ރޯވެފައިވާއިރު، އަލިފާންގަނޑުތައް ނިއްވައިލަން އޮފިޝަލުން ދަނީ މަސައްކަތް ކުރަމުންނެވެ. ނަމަވެސް، އެ ސަރަޙައްދަށް ބާރަށް ވައިޖެހެމުން ދިޔުމާ ގުޅިގެން އެ މަސައްކަތްތަކަށް ވަނީ ހުރަސްއެޅިފައެވެ.
"އަލިފާންގަނޑުތައް ދަނީ ކޮންޓްރޯލް ނުވެ ފެތުރެމުން. ޕުރޮވިންސުގެ ހުރިހާ ސަރަޙައްދެއްގައި ކުއްލި ހާލަތު އިޢުލާނުކޮށްފައި ވަނީ ރައްޔިތުންގެ ސަލާމަތާއި ރައްކާތެރި ކަން ކަށަވަރު ކުރަން،" އެލްބަރޓާ ޕުރޮވިންސުގެ ޕްރިމިޔަރ ޑެނިއެލް ސްމިތް ވިދާޅުވިއެވެ. ކުއްލި ހާލަތު އިޢުލާނުކުރުމާ އެކު، އަލިފާންގަނޑު ކޮންޓްރޯލް ކޮށް ހާލުގައި ޖެހިފައިވާ މީހުންނަށް އެހީތެރިކަން ފޯރުކޮށްދިނުމަށް އިތުރު ފައިސާ ބޭނުން ކުރުމުގެ ފުރުޞަތު ހުޅުވިގެންދާނެވެ.
އެލްބަރޓާ ޕުރޮވިންސަކީ ކެނެޑާގެ އެންމެ ގިނަ ޢަދަދަކަށް ތެޔޮ އުފައްދާ ސަރަޙައްދެވެ. އެ ސަރަޙައްދުގެ ޖަންގަލިތަކުގައި ރޯވެފައި މި ވަނީ ވާރޭ ނުވެހި ގިނަދުވަސްތަކެއްވުމަށް ފަހުއެވެ. އެ ޕުރޮވިންސުގެ 20 ގެއަކާއި، ފިހާރައެއްގެ އިތުރުން ފުލުހުންގެ އިދާރާއެއްގައި މިހާރު އަލިފާން ރޯވެ، އަނދާފައިވާ ކަމުގައި އޮފިޝަލުން ވިދާޅުވެއެވެ. އެލްބަރޓާގެ އިތުރުން އެ ސަރަޙައްދުގައި އޮންނަ ސަސްކެޗުވަން ޕުރޮވިންސުގެ ޖަންގަލިތަކުގައި މި ފަދަ އަލިފާންގަނޑުތަކެއް ރޯވުމުގެ ފުރުޞަތު އޮތް ކަމުގައި މޫސުން ދިރާސާކުރާ ފަރާތްތަކުން ބުނެއެވެ.
އަލިފާންގަނޑު ސަބަބުން އެ ޕުރޮވިންސުގެ 20 ސަރަޙައްދެއްގައި ދިރިއުޅޭ ރައްޔިތުން ރައްކާތެރި ހިސާބުތަކަށް ބަދަލުކޮށްފައިވާއިރު، 122,000 ހެކްޓަރުގެ ސަރަޙައްދެއް މިހާރު ވަނީ މުޅިން އަނދާފައެވެ. އަދި، އަލިފާންގަނޑު ދަނީ މީހުން ދިރިއުޅޭ އެހެން ހިސާބުތަކަށް ފެތުރެމުންނެވެ.
ކެނެޑާއަށް މި ފަދަ ނުރައްކާތެރި އަލިފާނުގެ ހާދިސާއަކާ އެންމެ ފަހުން ކުރިމަތިލާން ޖެހުނީ 2016 ވަނަ އަހަރުއެވެ. އެ އަހަރު ޖަންގަލިތަކުގައި ރޯވި އަލިފާންގަނޑުތައް މީހުން ދިރިއުޅޭ ސަރަޙައްދުތަކަށް ފެތުރުމުގެ ސަބަބުން 100,000 އަށްވުރެ ގިނަ މީހުން ރައްކާތެރި ހިސާބުތަކަށް ބަދަލުކުރަން ޖެހުނެވެ. އަދި، 2021 ވަނަ އަހަރު އެ ޤައުމަށް ވަނީ ހޫނުގެ ތޫފާނެއް ކުރިމަތިވެ، 500 އެއްހާ މީހުން މަރުވެފައެވެ.