ދެކުނު އެމެރިކާގެ ޤައުމެއް ކަމުގައިވާ ޕެރޫގެ ދެކުނުގައިވާ އާރޭކީޕާގައި ހުންނަ މައިނެއްގައި ހިނގި ނުރައްކާތެރި އަލިފާނުގެ ހާދިސާއެއްގައި 27 މީހުން މަރުވެއްޖެއެވެ. މި ހާދިސާ ހިނގާފައި ވަނީ ލާ އެސްޕެރެންޒާ 1ގެ ނަން ދީފައިވާ ރަން ނަގާ މައިނެއްގައެވެ. އެ މައިން އޮންނަނީ އާރޭކީޕާގެ ރަށްފުށު ސަރަޙައްދެއް ކަމުގައިވާ ކޮންދޭސުޔޯސް ޕުރޮވިންސުގައެވެ.
މައިންގެ ތެރޭގައި އަލިފާން ރޯވާން މެދުވެރިވީ ކަރަންޓު ޝޯޓް ސަރކިޓުވުމުގެ ސަބަބުން ކަމަށް ބެލެވޭ ކަމުގައި ފުލުހުންނާއި ޕަބްލިކް ޕްރޮސިކިޔުޓަރގެ އޮފީހުން ބުނެއެވެ. އަލިފާނުގެ ހާދިސާ ހިނގުމުގެ ކުރިން މައިންގެ ތެރޭގައި ބާރުގަދަ ގޮވުމެއް ގޮވާފައިވާ ކަމުގައި ޕެރޫގެ މީޑިޔާއިން ރިޕޯޓު ކުރެއެވެ.
މައިންގެ ތެރޭގައި މަރުވެފައިވާ 27 މީހުންގެ ހަށިގަނޑު އެ ތަނުން ނެރުމަށް މަސައްކަތް ކުރަމުންދާ ކަމުގައި ވެސް ޕަބްލިކް ޕްރޮސިކިޔުޓަރ ޖޮވާނީ މާޓޯސް ވިދާޅުވިއެވެ. ނަމަވެސް، މައިންގެ އެތެރޭގައި ޖަހާފައިވާ ތަނބުތަކަށް އަލިފާނުގެ ހާދިސާގައި ގެއްލުންވެފައިވުމުގެ ސަބަބުން، އެ ކަމަށް ވަނީ ހުރަސް އެޅިފައެވެ.
މައިންގެ ތެރޭގައި އަލިފާނުގެ ހާދިސާ ހިނގި ވަގުތު އެ ތަނުގައި މަސައްކަތް ކުރާ މީހުން ތިބީ 100 މީޓަރު އަޑީގައި ކަމަށް އާރޭކީޕާގެ މީޑިޔާތަކުން ރިޕޯޓު ކުރެއެވެ. މި ހާދިސާ ހިނގި ވަގުތު މައިންގެ ތެރޭގައި ހުރި ކަމަށް ބެލެވޭ އެއްވެސް މީހަކު ދިރިހުއްޓާ ސަލާމަތް ކުރެވިފައިވާ ކަމުގައި ރިޕޯޓެއް ކޮށްފައެއް ނެތެވެ. ޕެރޫގައި ޤަވާޢިދާ ޚިލާފަށް މައިންކުރުމުގެ މަސައްކަތް ކުރުމަކީ ޢާންމުވެފައިވާ ކަމެއް ނަމަވެސް، މި ހާދިސާ ހިނގާފައި ވަނީ ލައިސެންސް ނަގައިގެން ޤަވާޢިދާ އެއްގޮތަށް ހިންގަމުންދާ މައިނެއްގައެވެ.
އާރޭކީޕާގެ އެހެން މައިނެއްގައި 2020 ވަނަ އަހަރު ވެސް މި ފަދަ ހިތާމަވެރި ހާދިސާއެއް ހިނގާފައިވެއެވެ. އެ ހާދިސާގައި މައިންގެ ތެރޭގައި ތާށިވެ ހަތަރު މީހުން މަރުވިއެވެ. ޕެރޫއަކީ ދުނިޔޭގައި ދެވަނައަށް އެންމެ ގިނައިން ރިއްސާއި، ރަތުލޮލާއި، ޒިންކު މައިންކުރާ ޤައުމެވެ. އަދި، ލެޓިން އެމެރިކާގެ ޤައުމުތަކުގެ ތެރެއިން އެންމެ ގިނައިން ޓިނާއި، ޒިންކާއި، ލެޑުގެ އިތުރުން މެލިބްޑެނަމް ވެސް މައިންކުރާ ޤައުމެވެ.