އިންޑިޔާގައި ގިނަ ޢަދަދެއްގެ ބަޔަކު ގޮވައިގެން ދަތުރުކުރަމުންދިޔަ ބޯޓެއް ބަންޑުންޖަހައިލުމުގެ ސަބަބުން 22 މީހުން މަރުވެއްޖެއެވެ. މި ހާދިސާ ހިނގާފައި ވަނީ އެ ޤައުމުގެ ދެކުނުގައިވާ ކެރަލާ ސްޓޭޓްގެ މަލައްޕޫރަމް ޑިސްޓްރިކްޓުގެ ރަށެއް ކަމުގައިވާ ތަނޫރްގައެވެ. އެއީ، ކަނޑުގެ އައްސޭރިފަށުގައި އޮންނަ ރަށެކެވެ. ބަންޑުންޖަހައިލާފައި ވަނީ ދެ ބުރިއަށް ނަގާފައިވާ ބޯޓެކެވެ.
މި ހާދިސާގައި ކަނޑުވި މީހުން ސަލާމަތްކޮށް، މަރުވި މީހުންގެ ހަށިތައް ނެގުމަށް އޮފިޝަލުން ދަނީ މަސައްކަތް ކުރަމުންނެވެ. ރޭގަނޑުގެ ވަގުތުގައި ހިނގި މި ހާދިސާގައި މަރުވި ކަން ކަށަވަރު ކުރެވިފައިވާ މީހުންގެ ތެރޭގައި ހިމެނެނީ 15 އަންހެނުންނާއި ހަތް ފިރިހެނުންނެވެ. މި ހާދިސާގައި ގެނބުނު އިތުރު ހަ މީހަކަށް ހޮސްޕިޓަލުގައި އެޑްމިޓްކޮށްގެން މިހާރު ދަނީ ފަރުވާ ދެމުންނެވެ.
މަރުވި މީހުންގެ ތެރޭގައި އެއް ޢާއިލާއަކަށް ނިސްބަތްވާ 11 މީހުން ހިމެނޭ ކަމަށާއި، އޭގެ ތެރެއިން ތިން މީހުންނަކީ ކުދަކުދިން ކަމުގައި ކެރަލާ ސްޓޭޓްގެ އޮފިޝަލުން ވިދާޅުވިއެވެ. މި ހާދިސާ ހިނގި ވަގުތު އެ ބޯޓުގައި 30 ވަރަކަށް ފަސިންޖަރުން ތިއްބެވެ. އޭގެ ތެރޭގައި ގިނަ ޢަދަދެއްގެ ސްކޫލް ދަރިވަރުން ތިބި ކަމުގައި ކެރަލާ ސްޓޭޓްގެ ކުޅިވަރާއި މަސްވެރިކަމާ ބެހޭ ވަޒީރު ވީ. ޢަބްދުއްރަޙީމް ވިދާޅުވިއެވެ. ފަރުވާ ދެމުންދާ މީހުންގެ ތެރެއިން ހަތަރު މީހެއްގެ ހާލު ސީރިޔަސް ކަމުގައި ވެސް އޭނާ ވިދާޅުވިއެވެ.
މި ހާދިސާ ހިނގި ވަގުތު ބޯޓުގައި ތިބި ފަސިންޖަރުން ތިބީ ލައިފްޖެކެޓު ނާޅައެވެ. އިންޑިޔާގެ ބޮޑުވަޒީރު ނަރެންދްރަ މޯދީ ވަނީ މި ހާދިސާގައި މަރުވި މީހުންގެ ޢާއިލާތަކަށް ތަޢުޒިޔާ ދަންނަވާފައެވެ. އަދި، މަރުވި މީހުންގެ ޢާއިލާތަކަށް ފައިސާގެ އެހީތެރިކަން ފޯރުކޮށްދެއްވާނެ ކަމުގައި ވެސް މޯދީ ވަނީ ވިދާޅުވެފައެވެ. މި ހާދިސާ ހިނގަން މެދުވެރިވި ސަބަބު ދެނެގަތުމަށް ކެރަލާ ސްޓޭޓްގެ އޮފިޝަލުން ދަނީ މަސައްކަތް ކުރަމުންނެވެ.